1 Cronicas 17:1-27
17 Ket naaramid nga apaman a nangrugi a nagnaed ni David iti bukodna a balay,+ ni David kinunana ken Natan+ a mammadto: “Adtoy agnanaedak iti balay a sedro,+ ngem ti lakasa+ ti tulag ni Jehova adda iti sirok dagiti lupot ti tolda.”+
2 Kalpasan dayta ni Natan kinunana ken David: “Isuamin nga adda ita pusom aramidem,+ ta adda kenka ti pudno a Dios.”+
3 Ket naaramid iti dayta a rabii a ti sao+ ti Dios dimteng ken Natan, a kunkunana:
4 “Mapanka, ket masapul a kunaem ken David nga adipenko, ‘Daytoy ti kinuna ni Jehova: “Saanto a sika ti mangibangon maipaay kaniak iti balay a pagnaedak.+
5 Ta saanak a nagnaed iti balay nanipud idi aldaw a panangaonko ti Israel agingga itoy nga aldaw,+ no di ket nagtalinaedak iti tinoldatolda ken manipud maysa a tabernakulo+ agingga iti sabali.+
6 Bayat ti isuamin a tiempo a nagpagnapagnaak+ iti intero nga Israel, nangisaoak aya iti maysa a sao iti maysa kadagiti ukom ti Israel a binilinko a mangipastor iti ilik, a kinunak, ‘Apay a saandak nga imbangonan iti balay a sedro?’”’+
7 “Ket ita daytoy ti kunaemto ken adipenko a David, ‘Daytoy ti kinuna ni Jehova ti buybuyot: “Siak innalaka iti pagpaaraban manipud panangsaruno iti arban+ tapno agbalinka a panguluen+ iti ilik nga Israel.
8 Ket addaakto kenka sadinoman a pagnaam,+ ket gessatekto amin a kabusormo+ manipud sanguanam, ket sigurado nga iyaramidankanto iti nagan+ kas iti nagan dagidiay naindaklan nga adda iti rabaw ti daga.+
9 Ket sigurado a mangitudingakto iti lugar maipaay iti ilik nga Israel ket imulak ida,+ ket pudno nga agtaengdanto iti ayanda ket saandanton a mariribuk; ket saanto ida a paksuyen manen ti annak ti kinakillo,+ kas iti inaramidda idi damo,+
10 uray pay nanipud kadagiti aldaw a panangikabilko iti uk-ukom+ a mangituray iti ilik nga Israel. Ket sigurado a pagpakumbabaekto amin a kabkabusormo.+ Ket ibagak kenka, ‘Kasta met nga ibangonannakanto ni Jehova iti maysa a balay.’+
11 “‘“Ket mapasamakto nga inton naan-anayen dagiti aldawmo tapno mapanka a makikadua kadagidi ammam,+ sigurado a bangonekto ti bin-im iti kalpasam nga isunto ti maysa kadagiti annakmo,+ ket pudno nga ipasdekkonto a sititibker ti kinaarina.+
12 Isunto ti mangibangon iti balay+ maipaay kaniak, ket sigurado nga ipasdekkonto a sititibker ti tronona agingga iti tiempo a di nakedngan.+
13 Siak agbalinakto nga amana,+ ket isu agbalinto nga anakko;+ ket ti naayat a kinamanangngaasik saankonto nga ikkaten kenkuana+ kas ti panangikkatko iti dayta iti daydi immun-una ngem sika.+
14 Ket isu pagtakderekto iti balayko+ ken iti kinaarik+ agingga iti tiempo a di nakedngan, ket ti met laeng tronona+ agbalinto a maysa nga agpaut agingga iti tiempo a di nakedngan.”’”
15 Maitunos kadagitoy amin a sasao ken maitunos iti isuamin daytoy a sirmata kasta ti panagsao ni Natan ken David.+
16 Kalpasan dayta simrek ni Ari David ket nagtugaw iti sango ni Jehova+ ket kinunana: “Siasinoak,+ O Jehova a Dios, ket ania ti balayko+ ta inyegnak agingga ditoy?+
17 Kasla maysa daytoy a banag a bassit kadagita matam,+ O Dios,+ kaskasdi nga agsaoka maipapan iti balay ti adipenmo agingga iti adayo pay a tiempo iti masanguanan,+ ket kimmitaka kaniak sigun iti gundaway ti tao a tumantan-ok,+ O Jehova a Dios.
18 Ania pay ti masao kenka ni David no maipapan iti panangpadayawmo iti adipenmo,+ idinto ta sika pagaammom unay ti adipenmo?+
19 O Jehova, maipagapu iti adipenmo ken maitunos iti bukodmo a puso+ inaramidmo amin dagitoy naindaklan a banag babaen ti panangipakaammom kadagiti amin a naindaklan a gapuanan.+
20 O Jehova, awan ti umasping kenka,+ ket awan ti Dios malaksid kenka+ mainaig iti amin a nangngegmi kadagiti lapayagmi.
21 Ket ania pay a sabali a nasion iti daga ti umasping iti ilim nga Israel,+ a sinubbot ti pudno a Dios maipaay iti bagina kas ili,+ tapno mangitudingka maipaay kenka iti nagan dagiti naindaklan a gapuanan+ ken nakaam-amak a bambanag babaen ti panamagtalawmo kadagiti nasion+ manipud sanguanan ti ilim a sinubbotmo manipud Egipto?
22 Ket imbilangmo ti ilim nga Israel kas ilim+ agingga iti tiempo a di nakedngan, ket sika, O Jehova, nagbalinka a Diosda.+
23 Ket ita, O Jehova, ti sao a sinaom maipapan iti adipenmo ken maipapan iti balayna mapaneknekan koma a matalek agingga iti tiempo a di nakedngan, ket aramidem ti kas iti sinaom.
24 Ket mapaneknekan koma a matalek ti naganmo+ ken agbalin a naindaklan+ agingga iti tiempo a di nakedngan, a kunaen, ‘Ni Jehova ti buybuyot,+ ti Dios ti Israel,+ ket Dios iti Israel,’+ ket ti balay ni David nga adipenmo maysa koma nga agpaut iti sanguanam.+
25 Ta sika, Diosko, impalgakmo iti adipenmo ti panggep nga isu ibangonam iti balay.+ Dayta ti makagapu a nakasarak ti adipenmo iti gundaway nga agkararag iti sanguanam.
26 Ket ita, O Jehova, sika ti pudno a Dios,+ ket ikarim daytoy a kinaimbag maipapan iti adipenmo.+
27 Ket ita masapul nga aklonem ket bendisionam ti balay ti adipenmo tapno agtalinaed dayta agingga iti tiempo a di nakedngan iti sangom;+ ta sika, O Jehova, binendisionam, ket bendito dayta agingga iti tiempo a di nakedngan.”+
