1 Cronicas 5:1-26
5 Ket ti annak ni Ruben+ nga inauna ni Israel—ta isu idi ti inauna;+ ngem gapu iti panangtabbaawna iti idda ni amana+ ti kalinteganna kas inauna naited iti annak ni Jose+ nga anak ni Israel, iti kasta saan idi a maipasalista a mayannurot iti kapuonan maipaay iti kalintegan ti inauna.
2 Ta ni met laeng Juda+ natantan-ok idi iti kakabsatna, ket nagtaud kenkuana daydiay agbalin a panguluen;+ ngem ti kalintegan kas inauna kukua ni Jose+—
3 ti annak ni Ruben nga inauna ni Israel isu da Hanoc+ ken Pallu,+ Hezron ken Carmi.+
4 Ti annak ni Joel isu da Semaias nga anakna, Gog nga anakna, Simei nga anakna,
5 Mikias nga anakna, Reaias nga anakna, Baal nga anakna,
6 Beerah nga anakna, nga indestiero ni Tilgat-pilneser+ nga ari ti Asiria, yantangay maysa a panguluen dagiti Rubenita.
7 Ket ti kakabsatna sigun kadagiti pamiliada iti pannakaipasalista a mayannurot iti kapuonan+ sigun kadagiti putotda isu da, kas ti pannakaulo, Jeiel, ken Zacarias,
8 ken Bela nga anak ni Azaz nga anak ni Sema nga anak ni Joel+—isu agnanaed idi idiay Aroer+ ken agingga idiay Nebo+ ken Baal-meon.+
9 Uray iti daya isu nagnaed agingga iti sumrekan ti maysa idiay let-ang iti karayan Eufrates,+ ta dagiti met laeng dinguenda nagbalin a nakaad-adu iti daga ti Galaad.+
10 Ket idi kaaldawan ni Saul nakigubatda kadagiti Hagrita,+ isuda a napasag babaen iti imada; ket iti kasta nagnaedda kadagiti toldada iti isuamin a pagilian iti daya ti Galaad.
11 No maipapan iti annak ni Gad+ iti sanguananda, nagnaedda iti daga ti Basan+ agingga iti Saleca.+
12 Ni Joel ti pannakaulo, ken ni Safam ti maikadua, ken da Janai ken Safat idiay Basan.
13 Ket ti kakabsatda a kameng ti balay dagidi ammada isu da Miguel ken Mesullam ken Sheba ken Jorai ken Jacan ken Zia ken Eber, pitoda.
14 Dagitoy ti annak ni Abihail nga anak ni Huri, ti anak ni Jaroa, ti anak ni Galaad, ti anak ni Miguel, ti anak ni Jesisai, ti anak ni Jado, ti anak ni Buz;
15 ni Ahi nga anak ni Abdiel, ti anak ni Guni, pannakaulo ti balay dagidi ammada.
16 Ket nagtultuloyda nga agnaed idiay Galaad,+ idiay Basan+ ken kadagiti agpampannuray nga ilina+ ken kadagiti amin a pagpaaraban ti Saron agingga kadagiti paginggaanda.
17 Naipasalistada amin a mayannurot iti kapuonan idi kaaldawan ni Jotam+ nga ari ti Juda ken idi kaaldawan ni Jeroboam+ nga ari ti Israel.
18 No maipapan iti annak ni Ruben ken kadagiti Gadita ken iti kagudua a tribu ni Manases; kadagidiay maingel+ a tattao, lallaki nga agaw-awit iti kalasag ken kampilan ken mangbalballok iti bai ken nasanay iti gubat, adda uppat a pulo ket uppat a ribu pito gasut ket innem a puloda a mapan iti buyot.+
19 Ket nangrugida a makigubat kadagiti Hagrita,+ ken kada Jetur+ ken Nafis+ ken Nodab.
20 Ket natulonganda a bumusor kadakuada, iti kasta naited iti imada dagiti Hagrita ken amin dagidiay naikuyog kadakuada, ta ti Dios ti immasuganda iti tulong+ iti gubat, ket impalubosna nga isu mapagpakaasian iti pabor kadakuada agsipud ta nagtalekda kenkuana.+
21 Ket kinautiboda dagiti dinguenda,+ dagiti kamelioda limapulo a ribu, ken karkarnero dua gasut ket limapulo a ribu, ken as-asno dua ribu, ken natauan a karkararua sangagasut a ribu.+
22 Ta adu ti napasag a napapatay, agsipud ta ti panagrurupak biang ti pudno a Dios.+ Ket nagtultuloyda nga agnaed iti lugarda agingga iti tiempo ti pannakaidestiero.+
23 No maipapan iti annak ti kagudua a tribu ni Manases,+ nagnaedda iti daga manipud Basan+ agingga iti Baal-hermon+ ken Senir+ ken Bantay Hermon.+ Isuda nagbalinda a nakaad-adu.
24 Ket dagitoy dagiti pannakaulo ti balay dagidi ammada: Efer ken Isi ken Eliel ken Azriel ken Jeremias ken Hodavias ken Jadiel, lallaki a maingel, nabileg a tattao, agdindinamag a lallaki, dagiti pannakaulo ti balay dagidi ammada.
25 Ket nangrugida nga agtignay a di simamatalek iti Dios dagidi ammada ket naaddaanda iti imoral a pannakidenna+ iti didios+ dagiti ili ti daga, isuda a tinalipupos ti Dios manipud sanguananda.
26 Gapuna ti Dios ti Israel tinignayna ti espiritu+ ni Pul+ nga ari ti Asiria+ uray ti espiritu ni Tilgat-pilneser+ nga ari ti Asiria, iti kasta indestierona+ dagiti kameng dagiti Rubenita ken dagiti Gadita ken ti kagudua a tribu ni Manases ket impanna ida idiay Hala+ ken Habor ken Hara ken iti karayan Gozan tapno agtalinaedda agingga itoy nga aldaw.
