Amos 4:1-13
4 “Denggenyo daytoy a sao, dakayo a bakbaka ti Basan,+ nga adda iti bantay ti Samaria,+ a mangsasaur kadagidiay nanumo,+ a mangilupitlupit kadagidiay napanglaw, nga agkunkuna kadagiti appoda, ‘Mangyegkayo, ket uminumtayo!’
2 Ti Soberano nga Apo Jehova nagsapata babaen ti kinasantona,+ ‘“Adtoy! Adda al-aldaw nga um-umayen kadakayo, ket sigurado nga ingatonakayto babaen kadagiti kawit ti partidor ket ti maudi a pasetyo babaen kadagiti banniit.+
3 Ket babaen kadagiti giwang rummuarkayto,+ tunggal maysa nga agtartarus iti masanguanan; ket sigurado a maipalladawkayto idiay Harmon,” kuna ni Jehova.’
4 “‘Umaykayo iti Bethel ket agsalungasingkayo.+ Idiay Gilgal sansanenyo ti agsalungasing,+ ket iyegyo dagiti sakripisioyo iti bigat; iti maikatlo nga aldaw, dagiti apagkapulloyo.+
5 Ket manipud iti nalebaduraan mamagasukkayo iti sakripisio ti panagyaman,+ ket mangiwaragawagkayo kadagiti boluntario a daton;+ ipablaakyo dayta, ta kasta ti pagay-ayatyo, O annak ti Israel,’+ kuna ti Soberano nga Apo Jehova.
6 “‘Ket siak met, iti biangko, inikkankayo iti kinadalus dagiti ngipen+ kadagiti amin a siudadyo ken kinakirang iti tinapay kadagiti amin a dissoyo;+ ngem dikay nagsubli kaniak,’+ kuna ni Jehova.
7 “‘Ket no maipapan kaniak, impaidamko met kadakayo ti bayakabak idi adda pay laeng tallo a bulan sakbay ti panagani;+ ket pinagtudok iti maysa a siudad, ngem iti sabali pay a siudad saanko a pagtuduen. Adda idi maysa a benneg ti daga a matuduan, ngem iti maysa a benneg ti daga a saanko a pagtuduen agmaga.+
8 Ket dua wenno tallo a siudad nagbariringda nga agturong iti maysa a siudad tapno uminumda iti danum,+ ket saanda a mapnek; ngem dikay nagsubli kaniak,’+ kuna ni Jehova.
9 “‘Kinabilkayo iti pannakakset ken buot.+ Adda panangpaadu kadagiti minuyonganyo ken kadagiti kaubasanyo, ngem dagiti kayoyo a higos ken dagiti kayoyo nga olibo alun-onen dagiti arabas;+ kaskasdi a dikay nagsubli kaniak,’+ kuna ni Jehova.
10 “‘Nangibaonak kadakayo iti angol a kas iti kita ti angol ti Egipto.+ Babaen ti kampilan pinatayko dagiti agtutuboyo a lallaki,+ agraman ti panangkautibo kadagiti kabalioyo.+ Ket ti bangsit dagiti pakarsoyo intultuloyko a pinagpangato uray kadagiti abut ti agongyo;+ ngem dikay nagsubli kaniak,’+ kuna ni Jehova.
11 “‘Nangduprakak iti tengngayo, kas iti panangduprak ti Dios iti Sodoma ken Gomorra.+ Ket nagbalinkayo a kas iti tarikayo a narabsut iti pannakapuor;+ ngem dikay nagsubli kaniak,’+ kuna ni Jehova.
12 “Gapuna dayta ti aramidekto kenka, O Israel. Gapu iti kinapudno nga aramidekto kenka daytoy met laeng a banag, agsaganaka a sumabet iti Diosmo,+ O Israel.
13 Ta, adtoy! ti Nangporma iti bambantay+ ken ti Namarsua iti angin,+ ken Daydiay mangibagbaga iti naindagaan a tao no ania ti pakaseknan ti isipna,+ Daydiay mamagbalin iti bannawag a kinalidem,+ ken Daydiay bumadbaddek kadagiti nangato a disso ti daga,+ Jehova a Dios ti buybuyot ti naganna.”+
