Deuteronomio 13:1-18
13 “No kas pagarigan tumaud iti tengngam ti maysa a mammadto+ wenno maysa a managtagtagainep+ iti tagtagainep ket ikkannaka iti pagilasinan wenno tanda,+
2 ket pumudno ti pagilasinan wenno ti tanda a sinaona kenka,+ a kunkunana, ‘Sumurotta kadagiti sabali a didios, isuda a saanmo a naammuan, ket agserbita kadakuada,’
3 dika umimdeng iti sasao dayta a mammadto wenno iti managtagtagainep iti dayta a tagtagainep,+ agsipud ta subsubokennakayo ni Jehova a Diosyo+ tapno maammuan no ayatenyo ni Jehova a Diosyo buyogen ti isuamin a pusoyo ken isuamin a kararuayo.+
4 Rebbeng a sumurotkayo ken Jehova a Diosyo, ket rebbeng nga agbutengkayo kenkuana, ket rebbeng a salimetmetanyo ti bilbilinna, ket rebbeng nga umimdengkayo iti timekna, ket rebbeng nga agserbikayo kenkuana, ket rebbeng a kumpetkayo kenkuana.+
5 Ket dayta a mammadto+ wenno dayta a managtagtagainep iti tagtagainep rebbeng a mapapatay,+ agsipud ta nagsao iti iyaalsa ken Jehova a Diosyo, a nangiruar kadakayo manipud daga ti Egipto ken nangsubbot kenka iti balay dagiti adipen, tapno isiasinaka iti dalan nga imbilin ni Jehova a Diosmo a pagnaam;+ ket masapul nga ikkatem ti dakes iti tengngam.+
6 “No kas pagarigan ti kabsatmo a lalaki, ti anak ni inam, wenno ti anakmo a lalaki wenno ti anakmo a babai wenno ti ipatpategmo nga asawa wenno ti kaduam a kas iti bukodmo a kararua,+ padasennaka a guyugoyen iti nalimed, a kunkunana, ‘Mapanta ket agserbita kadagiti sabali a didios,’+ isuda a saanmo a naammuan, sika wenno uray dagidi ammam,
7 ti sumagmamano kadagiti didios ti il-ili nga adda iti intero nga aglikmutyo, dagidiay asideg kenka wenno dagidiay adayo kenka, manipud maysa nga ungto ti daga agingga iti sabali nga ungto ti daga,
8 dika umannugot iti kayatna wenno umimdeng kenkuana,+ saanto met a mangay-ay kenkuana ta matam, saanka met a maasian,+ saanmo met a salakniban;
9 no di ket papatayem a di bumurong.+ Ta imam umuna iti amin rebbeng nga agdisso kenkuana tapno papatayem, ket ti ima dagiti amin nga umili kalpasanna.+
10 Ket masapul nga uborem iti batbato, ket masapul a matay,+ agsipud ta inkagumaannaka nga itallikud ken Jehova a Diosmo, a nangiruar kenka manipud daga ti Egipto, manipud balay dagiti adipen.+
11 Kalpasanna mangngegto ti intero nga Israel ket agbutengda, ket saandanto nga aramidenen ti aniaman a kas itoy dakes a banag iti tengngam.+
12 “No kas pagarigan mangngegmo a naikuna iti maysa kadagiti siudadmo, nga ited kenka ni Jehova a Diosmo tapno agnaedka sadiay,
13 ‘Dagiti awan kaes-eskanna a tattao pimmanawda iti tengngam+ tapno padasenda a pagtallikuden dagiti agnanaed iti siudadda,+ a kunkunada: “Mapantayo ket agserbitayo kadagiti sabali a didios,” isuda a saanyo a naammuan,’
14 masapul met nga agsukimatka ken agusisaka ken agimtuodka a naan-anay;+ ket no ti banag maipasdek a kas kinapudno, naaramid iti tengngam daytoy nakarimrimon a banag,
15 di bumurong a kabilem dagiti agnanaed iti dayta a siudad babaen ti tadem ti kampilan.+ Ipaaymo dayta ken ti isuamin nga adda iti dayta, ken dagiti naamo nga animalna, iti pannakadadael+ iti tadem ti kampilan.
16 Ket ti isuamin a samsamna ummongem iti tengnga ti publiko a plasana, ket masapul a puoram iti apuy ti siudad+ ken ti isuamin a samsamna kas sibubukel a daton ken Jehova a Diosmo, ket agbalinto a bunton dagiti rebba agingga iti tiempo a di nakedngan.+ Rebbeng a saan a pulos mabangon manen.
17 Ket rebbeng nga awan a pulos ti kumpet ita imam iti banag a napagbalin a sagrado babaen ti panangiparit,+ tapno agbaw-ing ni Jehova manipud sumsumged nga ungetna+ ket pudno nga ipaayannaka iti asi ken sigurado nga ipakitaannaka iti asi+ ket paaduennaka, kas iti insapatana kadagidi ammam.+
18 Ta rebbeng nga umimdengka iti timek ni Jehova a Diosmo babaen ti panangsalimetmetmo iti amin a bilbilinna+ nga ibilbilinko kenka ita nga aldaw, tapno aramidem ti umiso kadagiti mata ni Jehova a Diosmo.+
