Deuteronomio 8:1-20
8 “Tunggal bilin nga ibilbilinko kenka ita nga aldaw rebbeng nga annadanyo a salimetmetan,+ tapno makapagtultuloykayo a sibibiag+ ken pudno nga umadukayo ken sumrekkayo ket tagikuaenyo ti daga a maipapan iti dayta nagsapata ni Jehova kadagidi ammayo.+
2 Ket masapul a laglagipem ti isuamin a dalan a nangpapagnaan kenka ni Jehova a Diosmo kadagitoy uppat a pulo a tawen iti let-ang,+ tapno pagpakumbabaennaka,+ tapno subokennaka+ iti kasta maammuan no ania idi ti adda ita pusom,+ no salimetmetam met laeng dagiti bilinna wenno saan.
3 Gapuna pinagpakumbabanaka ken binay-annaka nga agbisin+ ket tinaraonannaka iti manna,+ a saanmo a naammuan wenno uray dagiti ammam saanda a naammuan; tapno ipakaammona kenka a saan a babaen iti tinapay laeng nga agbiag ti tao no di ket babaen iti tunggal ebkas ti ngiwat ni Jehova nga agbiag ti tao.+
4 Ti kagaymo saan a narunot kenka, wenno uray ti sakam saan a limteg kadagitoy uppat a pulo a tawen.+
5 Ket pagaammom unay iti bukodmo a puso a no kasano a ti maysa a tao lintegenna ti anakna, linintegnaka ni Jehova a Diosmo.+
6 “Ket masapul a salimetmetam dagiti bilin ni Jehova a Diosmo babaen ti pannagna iti daldalanna+ ken babaen ti panagbuteng kenkuana.+
7 Ta ipannaka ni Jehova a Diosmo iti nasayaat a daga,+ maysa a daga dagiti naapres a ginget ti danum, dagiti ubbog ken dagiti nadanum a yuyeng nga agayus iti ginget a tanap+ ken iti nakabambantay a rehion,
8 maysa a daga dagiti trigo ken sebada ken ubas ken higos ken granada,+ maysa a daga dagiti lana nga olibo ken diro,+
9 maysa a daga a sadiay saankanto a mangan a sikikirang iti tinapay, a sadiay saankanto nga agkurang iti aniaman, maysa a daga a landok ti batbatona ket manipud iti bambantayna agminaskanto iti gambang.
10 “Inton nakapangankan ken napennekmon ta bagim,+ masapul met a bendituem+ ni Jehova a Diosmo gapu iti nasayaat a daga nga intedna kenka.+
11 Agaluadka tapno saanmo a malipatan+ ni Jehova a Diosmo nga iti kasta saanmo a masalimetmetan dagiti bilinna ken dagiti hudisial a pangngeddengna ken dagiti paglinteganna nga ibilbilinko kenka ita nga aldaw;+
12 ta amangan no manganka ket pudno a mapennekmo ta bagim, ket mangbangonka iti nasayaat a balbalay ket pudno nga agnaedka kadakuada,+
13 ket ti pangenmo ken arbanmo umaduda, ket ti pirak ken balitok umaduda maipaay kenka, ket isuamin a kukuam umadu;
14 ket ta pusom pudno nga agpannakkel+ ket pudno a malipatam ni Jehova a Diosmo, a nangiruar kenka manipud daga ti Egipto, manipud balay dagiti adipen;+
15 a namaglasat kenka iti dakkel ken nakaam-amak a let-ang,+ nga addaan kadagiti nagita a serpiente+ ken manggagama ken addaan iti mawaw a daga nga awanan danum; a nangpataud iti danum maipaay kenka manipud pimmamulinawen a bato;+
16 a nangtaraon kenka iti manna+ idiay let-ang, a saan a naammuan dagiti ammam, tapno pagpakumbabaennaka+ ken tapno subokennaka iti kasta agaramid kenka iti naimbag iti kamaudianan ti al-aldawmo;+
17 ket kunaem iti pusom, ‘Ti bukodko a bileg ken ti intero a pannakabalin ti bukodko nga ima ti nangaramid itoy a kinabaknang maipaay kaniak.’+
18 Ket masapul a lagipem ni Jehova a Diosmo, agsipud ta isu ti manangipaay iti bileg kenka nga agaramid iti kinabaknang;+ tapno itungpalna ti tulagna nga insapatana kadagidi ammam, kas itoy nga aldaw.+
19 “Ket mapasamakto a no lipatem latta ni Jehova a Diosmo ket pudno a sumurotka kadagiti sabali a didios ket agserbika kadakuada ken agruknoyka kadakuada, saksiak ti maibusor kadakayo ita nga aldaw a madadaelkayto a di bumurong.+
20 Kas kadagiti nasion a dadaelen ni Jehova iti sangoyo, kastanto ti pannakapukawyo, agsipud ta saankayto nga umimdeng iti timek ni Jehova a Diosyo.+
