Ezequiel 10:1-22
10 Ket intuloyko ti kumita, ket, adtoy! iti rabaw ti tangatang+ nga adda iti ngatuen ti ulo dagiti kerubin adda maysa a banag a kasla bato a safiro,+ kas iti langa nga umasping iti maysa a trono,+ nga agparang iti ngatuenda.
2 Ket kinunana iti lalaki a sikakawes iti lienso,+ kinunana a mismo: “Sumrekka iti baet ti pilpilid,+ iti baba dagiti kerubin, ket dagiti lukong ti dua nga imam punnuem kadagiti beggang+ ti apuy manipud iti baet dagiti kerubin ket ipuruakmo ida iti siudad.”+ Gapuna isu simrek a kitkitaek.
3 Ket dagiti kerubin sitatakderda iti makannawan ti balay idi simrek ti lalaki, ket ti ulep pumpunnuenna idi ti makin-uneg a paraangan.+
4 Ket ti dayag ni Jehova+ nagpangato manipud kadagiti kerubin nga agturong iti arsadanan ti balay, ket ti balay nagin-inut a napno iti ulep,+ ket ti met laeng paraangan napno iti kinaraniag ti dayag ni Jehova.
5 Ket ti met laeng uni ti paypayak dagiti kerubin+ nangngegan agingga iti makinruar a paraangan, kas iti timek ti Dios a Mannakabalin-amin no isu agsao.+
6 Ket naaramid, idi binilinna ti lalaki a sikakawes iti lienso, a kunkunana: “Mangalaka iti apuy manipud baet ti pilpilid, manipud baet dagiti kerubin,” nga isu simrek ket nagtakder iti abay ti pilid.
7 Idin inyunnat ti kerubin ti imana manipud baet dagiti kerubin nga inggaw-at iti apuy+ nga adda iti baet dagiti kerubin+ ket inawitna ket inkabilna kadagiti lukong ti im-ima daydiay sikakawes iti lienso,+ nga itan innalana dayta ket rimmuar.
8 Ket nakita nga addaan dagiti kerubin iti ladawan ti ima ti naindagaan a tao iti baba dagiti payakda.+
9 Ket intuloyko ti kumita, ket, adtoy! adda uppat a pilid iti abay dagiti kerubin, maysa a pilid iti abay ti maysa a kerubin ken maysa a pilid iti abay ti sabali pay a kerubin,+ ket ti langa dagiti pilid kasla iti rangrang ti bato a krisolito.
10 Ket no maipapan iti langada, isuda nga uppat agkakaaspingda, kasla no ti maysa a pilid adda iti tengnga ti maysa a pilid.+
11 No mapanda, mapanda iti uppat a sikiganda. Saanda nga agbaliw iti turong no mapanda, agsipud ta iti lugar a sanguen ti ulo, mapanda a sumurot iti dayta. Saanda nga agbaliw iti turong no mapanda.+
12 Ket ti isuamin a lasagda ken dagiti bukotda ken dagiti imada ken dagiti payakda ken dagiti pilid napnoda kadagiti mata iti intero nga aglikmut.+ Isuda nga uppat adda dagiti pilidda.
13 No maipapan kadagiti pilid, kadakuada naipukkaw kadagiti lapayagko, “O pilpilid!”
14 Ket tunggal maysa addaan iti uppat a rupa.+ Ti umuna a rupa isu ti rupa ti kerubin, ket ti maikadua a rupa isu ti rupa ti naindagaan a tao,+ ket ti maikatlo isu ti rupa ti maysa a leon, ket ti maikapat isu ti rupa ti maysa nga agila.+
15 Ket agpangato dagiti kerubin+—dayta met laeng ti sibibiag a parsua a nakitak iti karayan Kebar+—
16 ket idi napan dagiti kerubin, mapan dagiti pilid iti sibayda;+ ket idi intag-ay dagiti kerubin ti paypayakda tapno ngumatoda iti ngatuen ti daga, saan nga agbaliw ti turong dagiti pilid, uray isuda, manipud iti sibayda.+
17 Idi nagtakder a siiintek dagitoy, isuda agtakderda a siiintek; ket idi nagpangato dagitoy,+ isuda agpangatoda a maikuyog kadakuada, ta ti espiritu ti sibibiag a parsua adda kadagita.+
18 Ket ti dayag+ ni Jehova rimmuar manipud ngatuen ti arsadanan ti balay ket nagintek iti ngatuen dagiti kerubin.+
19 Ket dagiti kerubin intag-ayda itan dagiti payakda ket nagpangatoda manipud iti daga+ iti imatangko. Idi napanda, dagiti met pilid addada iti arpadda; ket nangrugida a nagtakder iti makindaya a pagserkan ti ruangan ti balay ni Jehova, ket ti dayag ti Dios ti Israel adda idi iti rabawda, manipud iti ngato.
20 Daytoy ti sibibiag a parsua+ a nakitak iti baba ti Dios ti Israel idiay karayan Kebar,+ iti kasta naammuak a kerubinda.
21 No maipapan iti uppat, tunggal maysa addaan iti uppat a rupa+ ket tunggal maysa addaan iti uppat a payak, ket ti kaasping dagiti ima ti naindagaan a tao adda idi iti baba dagiti payakda.
22 Ket no maipapan iti kaasping dagiti rupada, isuda dagiti rupa a ti langada nakitak iti igid ti karayan Kebar, dagidiay a mismo.+ Mapanda tunggal maysa nga agtartarus iti sanguanan.+
