Ezequiel 11:1-25
11 Ket impangatonak+ ti maysa nga espiritu+ ket impannak iti makindaya a ruangan ti balay ni Jehova a sumangsango iti daya,+ ket, adtoy! iti pagserkan ti ruangan adda duapulo ket lima a lallaki,+ ket nakitak iti tengngada ni Jaazanias nga anak ni Azur ken ni Pelatias nga anak ni Benaias, piprinsipe dagiti umili.+
2 Idin kinunana kaniak: “Anak ti tao, dagitoy ti lallaki a mangganggandat iti panangpasakit ken mangibalbalakad iti dakes a pammatigmaan maibusor iti daytoy a siudad;+
3 nga agkunkuna, ‘Saan aya nga asidegen ti panagbangon iti balbalay?+ Isu ti nalawa ti ngarabna a paglutuan a banga,+ ket datayo ti lasag.’
4 “Gapuna agipadtoka maibusor kadakuada. Agipadtoka, O anak ti tao.”+
5 Idin immapay kaniak ti espiritu ni Jehova,+ ket kinunana kaniak: “Sawem, ‘Daytoy ti kinuna ni Jehova:+ “Sinaoyo ti umiso a banag, O balay ti Israel; ket no maipapan iti bambanag a tumpuar iti espirituyo, siak pagaammok+ dayta.
6 Pinaaduyo dagidiay napapatay kadakayo iti daytoy a siudad, ket pinunnoyo dagiti kalsadana kadagidiay napapatay.”’”+
7 “Gapuna daytoy ti kinuna ti Soberano nga Apo Jehova, ‘No maipapan kadagidiay napapatay kadakayo nga inkabilyo iti tengngana, isuda ti lasag,+ ket isu ti nalawa ti ngarabna a paglutuan a banga;+ ket dakayo mairuarkayto manipud iti tengngana.’”+
8 “‘Nagbutengkayo iti kampilan,+ ket mangyegakto kadakayo iti kampilan,’ kuna ti Soberano nga Apo Jehova.+
9 ‘Ket sigurado nga iruarkayto manipud iti tengngana ken iyawatkayo iti ima dagiti ganggannaet+ ken ipakatko kadakayo dagiti aramid ti panangukom.+
10 Babaen iti kampilan mapasagkayto.+ Iti ketegan ti Israel+ ukomenkayto; ket kasapulanto a maammuanyo a siak ni Jehova.+
11 Isu saanto nga agbalin kadakayo a maysa a nalawa ti ngarabna a paglutuan a banga,+ ket dakayo saankayto nga agbalin a lasag iti tengngana. Iti ketegan ti Israel ukomenkayto,
12 ket kasapulanto a maammuanyo a siak ni Jehova, agsipud ta saankayo a nagna kadagiti alagadek ket saanyo a tinungpal dagiti panangukomko,+ no di ket nagaramidkayo maitunos kadagiti panangukom ti nasnasion nga adda iti aglikmutyo.’”+
13 Ket naaramid nga apaman a nagipadtoak natay a mismo ni Pelatias nga anak ni Benaias,+ ket insubusobko ti rupak ken imkisak iti natbag a timek+ ken kinunak: “Ay, O Soberano nga Apo Jehova!+ Mangipakpakatka aya iti panangtalipupos kadagidiay nabatbati iti Israel?”+
14 Ket ti sao ni Jehova nagtultuloy a dumteng kaniak, a kunkunana:
15 “Anak ti tao, no maipapan iti kakabsatmo,+ ti kakabsatmo, dagiti lallaki a maseknan iti kalintegam a mangsaka, ken ti intero a balay ti Israel, intero dayta, isuda dagidiay nagkunaan dagiti agnanaed iti Jerusalem, ‘Umadayokayo ken Jehova. Kukuami dayta; ti daga naited kadakami kas banag a tagikuaen’;+
16 gapuna kunaem, ‘Daytoy ti kinuna ti Soberano nga Apo Jehova: “Nupay inyadayok ida nga inkabil kadagiti nasion, ken nupay inwarawarak ida iti dagdaga,+ kaskasdi nga agbalinakto kadakuada a maysa a santuario iti apagbiit a kanito kadagiti daga a nakagtenganda.”’+
17 “Gapuna kunaem, ‘Daytoy ti kinuna ti Soberano nga Apo Jehova: “Ummongenkayto met manipud kadagiti ili ket tiponenkayo manipud iti dagdaga a nakaiwarawaraanyo, ket itedkonto kadakayo ti daga ti Israel.+
18 Ket sigurado nga umaydanto sadiay ket ikkatenda amin a makarimon a bambanagna ken amin a nakarimrimon a bambanagna manipud iti dayta.+
19 Ket ikkakto ida iti maysa a puso,+ ket ti baro nga espiritu ikabilkonto iti unegda;+ ket sigurado nga ikkatekto iti lasagda ti puso a bato+ ket ikkakto ida iti puso a lasag,+
20 tapno magnada kadagiti bukodko a paglintegan ken salimetmetanda dagiti bukodko a hudisial a pangngeddeng ket pudno nga itungpalda ida;+ ket pudno unay nga agbalinda nga ilik+ ket siak agbalinak a Diosda.”’+
21 “‘“Ngem no maipapan kadagidiay a ti pusoda magmagna iti makarimon a bambanagda ken iti nakarimrimon a bambanagda,+ sigurado nga iyegkonto iti rabaw ti uloda ti bukodda a dalan,” kuna ti Soberano nga Apo Jehova.’”+
22 Ket dagiti kerubin+ intag-ayda itan dagiti payakda, ket dagiti pilid adda iti asidegda,+ ket ti dayag+ ti Dios ti Israel adda iti rabawda, manipud ngato.+
23 Ket ti dayag ni Jehova+ nagpangato manipud iti ngatuen ti tengnga ti siudad ket nangrugi nga agtalinaed iti ngatuen ti bantay+ nga adda iti daya ti siudad.+
24 Ket ti maysa nga espiritu+ a mismo impangatonak+ ket iti kamaudiananna impannak idiay Caldea kadagiti naidestiero nga umili,+ iti sirmata babaen ti espiritu ti Dios; ket ti sirmata a nakitak nagpangato manipud kaniak.
25 Ket rinugiak a sawen kadagiti naidestiero nga umili amin a bambanag ni Jehova nga impakitana kaniak.+
