Ezequiel 17:1-24
17 Ket ti sao ni Jehova nagtultuloy a dumteng kaniak, a kunkunana:
2 “Anak ti tao, mangidatagka iti burburtia+ ket mangputarka iti pagkukuna a proverbio iti balay ti Israel.+
3 Ket masapul a kunaem, ‘Daytoy ti kinuna ti Soberano nga Apo Jehova: “Ti dakkel nga agila,+ nga addaan dadakkel a payak,+ nga atitiddog dagiti pawisna, napno kadagiti dutdot, a nagduduma ti marisna, dimteng iti Libano+ ket innalana ti aringgawis+ ti sedro.+
4 Kinettelna ti mismo a murdong dagiti naganus a saringitna ket inyegna iti daga ti Canaan;+ inkabilna iti siudad dagiti agtagtagilako.
5 Kanayonanna pay, innalana ti dadduma iti bin-i ti daga+ ket inkabilna iti maysa a talon a kas bin-i. Kas sause iti igid ti nakalawlawa a dandanum,+ kas kayo a sause inkabilna dayta.
6 Ket nangrugi nga agtubo ket nagin-inut a nagbalin a nabaludbod ti itutubona a puon ti ubas a nababa,+ nga agannayas a mangiturong iti bulbulongna nga agpauneg; ket no maipapan kadagiti ramutna, nagin-inut a naaddada iti sirokna. Ket iti kamaudiananna nagbalin a puon ti ubas ket nangpataud kadagiti saringit ken nangisalumpayak kadagiti sanga.+
7 “‘“Ket adda idi sabali pay a dakkel nga agila,+ a dadakkel dagiti payakna, ken dadakkel dagiti pawisna,+ ket, adtoy! daytoy mismo a puon ti ubas sibibisin nga inyunnatna kenkuana dagiti ramutna.+ Ket inturongna kenkuana ti bulbulongna tapno padanumanna dayta, adayo kadagiti minuyongan a nakaimulaanna.+
8 Iti maysa a nasayaat a talon, iti igid ti nakalawlawa a dandanum, nayakaren a naimula dayta,+ iti kasta mangpataud kadagiti kangrunaan a sanga ken agbunga, tapno agbalin a nadaeg a puon ti ubas.”’
9 “Kunaem, ‘Daytoy ti kinuna ti Soberano nga Apo Jehova: “Agballiginto ngata?+ Dagiti mismo a ramutna+ saanto aya a gabuten ti asinoman ket pagbalinenna a marasiksikan dagiti mismo a bungana? Ket saanto ngata a magango amin dagiti kakkettel a tarubongna?+ Magangonto dayta. Uray babaen iti dakkel a takiag wenno uray babaen ti umariwekwek a tattao saanto a kasapulan a mabag-ut kadagiti ramutna.
10 Ket, adtoy! nupay nayakar a naimula, agballiginto ngata? Saanto ngata a naan-anay a magango, a kas met laeng no sagiden dayta ti wayaway nga angin?+ Magangonto dayta kadagiti aray iti minuyongan ti tarubongna.”’”+
11 Ket ti sao ni Jehova nagtultuloy a dumteng kaniak, a kunkunana:
12 “Kunaem, pangngaasim, iti rebelioso a balay,+ ‘Pudno kadi a saanyo nga ammo ti kaipapanan dagitoy a banag?’ Kunaem, ‘Adtoy! Ti ari ti Babilonia immay iti Jerusalem ket innalana ti arina+ ken dagiti prinsipena ket inyegna ida kenkuana idiay Babilonia.+
13 Kanayonanna pay, innalana ti maysa kadagiti naarian a bin-i+ ket namatalged kenkuana iti tulag ket inyegna iti maysa a sapata;+ ket impanawna dagiti kangrunaan a lallaki ti daga,+
14 tapno ti pagarian mapagbalin a nababa,+ a saanna a kabaelan nga ipangato ti bagina, tapno makapagtakder+ babaen ti panangsalimetmetna iti tulagna.
15 Ngem iti kamaudiananna nagrebelde+ kenkuana iti panangibaonna kadagiti mensaherona a mapan idiay Egipto, tapno isu ikkan dayta kadagiti kabalio+ ken iti umariwekwek a tattao. Agballiginto ngata? Makapagtalawto ngata, daydiay mangar-aramid kadagitoy a banag, ken nangrakrak iti tulag? Ket pudno ngata a makatalawto?’+
16 “‘“Kas sibibiagak,”+ kuna ti Soberano nga Apo Jehova, “iti disso ti ari a nangikabil kas ari iti daydiay nangumsi iti sapatana+ ken nangrakrak iti tulagna, matayto a maikanunong kenkuana iti tengnga ti Babilonia.+
17 Ket babaen iti dakkel a puersa militar ken babaen iti umariwekwek a kongregasion isu saanto a pagbalinen ni Faraon nga epektibo iti gubat,+ babaen ti panagibangon iti baluarte a panglakub ken babaen ti panagbangon iti pader a panglakub, tapno gessatenna ti adu a kararua.+
18 Ket inumsina ti maysa a sapata+ iti panangrakrakna iti tulag, ket, adtoy! inyawatna ti imana+ ket inaramidna pay amin dagitoy a banag. Saanto a makapagtalaw.”’+
19 “‘Gapuna daytoy ti kinuna ti Soberano nga Apo Jehova: “Kas sibibiagak, sigurado a ti sapatak nga inumsina+ ken ti tulagko a rinakrakna—iyegkonto a mismo dayta iti rabaw ti ulona.
20 Ket iwayatkonto kenkuana ti iketko, ket sigurado a matiliwto iti iketko a paganup;+ ket isu ipankonto idiay Babilonia ket isaadkonto ti bagik a mangukom kenkuana sadiay maipapan iti saanna a kinamatalek a babaen iti dayta nagtignay maibusor kaniak.+
21 Ket no maipapan kadagiti amin a pugantena kadagiti amin a bunggoyna, mapasagdanto babaen iti kampilan, ket dagidiay mabati sisasaknap a maiwarasdanto a mismo iti tunggal angin.+ Ket kasapulanto a maammuanyo a siak, ni Jehova, sinaok dayta.”’+
22 “‘Daytoy ti kinuna ti Soberano nga Apo Jehova: “Siak mangalaakto met ken mangikabilak iti sumagmamano iti nangato nga aringgawis ti sedro;+ manipud murdong dagiti saringitna mangkettelakto iti maysa a naganus+ ket siak iyakarkonto nga imula iti rabaw ti natayag ken nangato a bantay.+
23 Iti bantay ti kangatuan ti Israel iyakarkonto nga imula,+ ket sigurado a maaddaanto kadagiti kangrunaan a sanga ken mangpataud iti bunga+ ket agbalin a nadaeg a sedro.+ Ket iti sirokna pudno nga agtaengto amin dagiti tumatayab a nadumaduma ti payakda; agtaengdanto iti salinong ti bulbulongna.+
24 Ket amin dagiti kayo iti tay-ak kasapulanto a maammuanda a siak, ni Jehova,+ impababak ti nangato a kayo,+ impangatok ti nababa a kayo,+ ginangok ti naata pay laeng a kayo+ ket pinagsabongko ti nagango a kayo. Siak, ni Jehova, sinaok ket inaramidko+ dayta.”’”
