Ezequiel 33:1-33
33 Ket ti sao ni Jehova dimteng kaniak, a kunkunana:
2 “Anak ti tao, agsaoka iti annak dagiti kailiam,+ ket masapul a kunaem kadakuada,“‘No maipapan iti maysa a daga, no kas pagarigan mangipagtengak iti dayta iti kampilan+ ket dagiti umili ti daga, isuda amin, pudno a mangalada iti lalaki ket isaadda a kas managwanawanda,+
3 ket pudno a makitana ti kampilan nga um-umay iti daga ket puyotenna ti tangguyob ket pakdaaranna dagiti umili,+
4 ket ti agdengdengngeg pudno a mangngegna ti uni ti tangguyob ngem saanna a pulos ipangag ti pakdaar,+ ket umay ti maysa a kampilan ket ipanawna isuna, ti bukodna a dara maiparabawto iti mismo nga ulona.+
5 Nangngegna ti uni ti tangguyob, ngem saanna nga impangag ti pakdaar. Ti bukodna a dara maiparabawto kenkuana a mismo. Ket no isu impangagna koma ti pakdaar, nakatalaw koma ti bukodna a kararua.+
6 “‘Ita no maipapan iti managwanawan, no kas pagarigan makitana ti kampilan nga um-umay ket pudno a saanna a puyoten ti tangguyob+ ket ti met laeng ili saan a mapakdaaran a pulos ket umay ti maysa a kampilan ket mangipanaw kadakuada iti kararua, gapu iti bukodna a biddut dayta met laeng maipanawto,+ ngem ti darana singirekto iti ima ti mismo a managwanawan.’+
7 “Ita no maipapan kenka, O anak ti tao, inaramidka a managwanawan iti balay ti Israel,+ ket iti ngiwatko masapul a denggem ti sao ket ipaayam ida iti pammakdaar manipud kaniak.+
8 No kunaek iti maysa a nadangkes, ‘O nadangkes, di bumurong a mataykanto!’+ ngem pudno a dika agsao tapno pakdaaram daydiay nadangkes manipud dalanna,+ isu kas maysa a nadangkes matayto gapu iti bukodna a biddut,+ ngem ti darana singirekto iti bukodmo nga ima.
9 Ngem no maipapan kenka, no kas pagarigan pudno a pakdaaram ti maysa a nadangkes manipud iti dalanna tapno tumallikud iti dayta ngem pudno a saan a tumallikud iti dalanna, isu matayto gapu iti bukodna a biddut,+ idinto ta sika sigurado a maispalmonto ti bukodmo a kararua.+
10 “Ita no maipapan kenka, O anak ti tao, kunaem iti balay ti Israel, ‘Iti kasta kinunayo: “Gapu ta adda kadakami dagiti iyaalsami ken dagiti basolmi ket kadakuada agrunrunotkami,+ kasano, ngarud, ti panagtultuloymi nga agbiag?”’+
11 Kunaem kadakuada, ‘“Kas sibibiagak,” kuna ti Soberano nga Apo Jehova, “maragsakanak, saan nga iti ipapatay ti nadangkes,+ no di ket iti daydiay itatallikud ti maysa a nadangkes+ manipud iti dalanna ket pudno nga agtultuloy nga agbiag.+ Tumallikudkayo, tumallikudkayo kadagiti dakes a dalanyo,+ ta apay koma a mataykayo, O balay ti Israel?”’+
12 “Ket no maipapan kenka, O anak ti tao, kunaem iti annak dagiti kailiam, ‘Ti kinalinteg daydiay nalinteg saanto nga isu ti mangispal kenkuana iti aldaw ti iyaalsana.+ Ngem no maipapan iti kinadakes daydiay nadangkes, isu saanto a maitibkol babaen iti dayta iti aldaw ti itatallikudna iti kinadakesna.+ Uray ti asinoman nga addaan kinalinteg saanto a makapagtultuloy nga agbiag gapu iti dayta iti aldaw ti panagbasolna.+
13 No kunaek iti daydiay nalinteg: “Di bumurong nga agtultuloykanto nga agbiag,” ket isu pudno nga agtalek iti bukodna a kinalinteg ket agaramid iti di kinahustisia,+ amin a bukodna a nalinteg nga ar-aramid saanto a malagip, no di ket maigapu iti di kinahustisia nga inaramidna—gapu itoy isu matayto.+
14 “‘Ket no kunaek iti daydiay nadangkes: “Di bumurong a mataykanto,”+ ket pudno a tumallikud iti basolna+ ket agaramid iti kinahustisia ken kinalinteg,+
15 ket daydiay nadangkes isublina ti mismo a naitani a banag,+ bayadanna ti mismo a bambanag nga innalana babaen iti panangtakaw,+ ket pudno a magna kadagiti mismo a paglintegan ti biag babaen iti saan a panangaramid iti di kinahustisia,+ di bumurong nga agtultuloyto nga agbiag.+ Saanto a matay.
16 Awan kadagiti basolna a kadagita a nagbasol ti malagipto maibusor kenkuana.+ Kinahustisia ken kinalinteg ti inaramidna. Di bumurong nga agtultuloyto nga agbiag.’+
17 “Ket kinuna ti annak dagiti kailiam, ‘Ti dalan ni Jehova saan a siuumiso a naatur,’+ ngem, no maipapan kadakuada, ti dalanda ti saan a siuumiso a naatur.
18 “No ti maysa a nalinteg tumallikud iti kinalintegna ket pudno nga agaramid iti di kinahustisia, masapul met a matay gapu kadakuada.+
19 Ket no ti maysa a nadangkes tumallikud iti kinadangkesna ket pudno nga agaramid iti kinahustisia ken kinalinteg, maigapunto kadakuada nga isu agtultuloyto nga agbiag.+
20 “Ket kinunayo, ‘Ti dalan ni Jehova saan a siuumiso a naatur.’+ Tunggal maysa maitunos kadagiti dalanna nga ukomenkayto,+ O balay ti Israel.”
21 Idi agangay napasamak iti maikasangapulo ket dua a tawen, iti maikasangapulo a bulan, iti maikalima nga aldaw ti bulan ti pannakaidestieromi, nga immay kaniak ti maysa a nakatalaw manipud Jerusalem,+ a kunkunana: “Nakabilen ti siudad!”+
22 Ita ti mismo nga ima ni Jehova naadda kaniak iti rabii sakbay ti iyaay daydiay nakatalaw,+ ket Isu linuktanna ti ngiwatko sakbay ti iyaay kaniak dayta a tao iti bigat, ket naluktan ti ngiwatko ket saanakon nga umel.+
23 Ket ti sao ni Jehova nangrugi a dumteng kaniak, a kunkunana:
24 “Anak ti tao, dagiti agnanaed kadagitoy walangwalang a disso+ kunkunaenda maipapan a mismo iti daga ti Israel, ‘Ni Abraham maymaysa idi ket kaskasdi a tinagikuana ti daga.+ Ket adukami; naited kadakami ti daga kas maysa a banag a tagikuaen.’+
25 “Gapuna kunaem kadakuada, ‘Daytoy ti kinuna ti Soberano nga Apo Jehova: “Agraman iti dara itultuloyyo ti mangan,+ ket dagiti matayo itultuloyyo nga itangad kadagiti makadurmen nga idoloyo,+ ket itultuloyyo nga ibuyat ti dara.+ Gapuna rebbeng kadi a tagikuaenyo ti daga?+
26 Nagpannuraykayo iti kampilanyo.+ Nagaramidkayo iti nakarimrimon a banag,+ ket tinulawanyo tunggal maysa ti asawa a babai ti kaduana.+ Gapuna rebbeng kadi a tagikuaenyo ti daga?”’+
27 “Daytoy ti rebbeng a kunaem kadakuada, ‘Daytoy ti kinuna ti Soberano nga Apo Jehova: “Kas sibibiagak, sigurado a dagidiay adda kadagiti walangwalang a disso mapasagdanto babaen ti mismo a kampilan;+ ket daydiay adda iti rabaw ti tay-ak, sigurado nga isu itedkonto a taraon ti atap nga animal;+ ket dagidiay adda kadagiti natibker a disso ken kadagiti rukib+ mataydanto babaen iti angol a mismo.
28 Ket pudno a pagbalinekto ti daga a maysa a langalang a rebbek,+ langalang a mismo, ket ti pagpannakkel ti pigsana mapagpukawto+ ket ti bambantay ti Israel mapaglangalangto,+ nga awan ti lumasat.
29 Ket kasapulanto a maammuanda a siak ni Jehova inton pagbalinek ti daga a maysa a langalang a rebbek,+ langalang a mismo, maigapu iti amin a nakarimrimon a bambanagda nga inaramidda.”’+
30 “Ket no maipapan kenka, O anak ti tao, ti annak dagiti kailiam pagsasaritaanda ti maipapan kenka iti abay dagiti pader ken kadagiti pagserkan ti balbalay,+ ket ti maysa nakisao iti sabali, tunggal maysa iti kabsatna, a kunkunana, ‘Umaykayo, pangngaasiyo, ket denggentayo no ania ti sao a rumrummuar manipud ken Jehova.’+
31 Ket umaydanto kenka, kas iti iyaay dagiti umili, ket agtugawda iti sanguanam a kas ilik;+ ket sigurado a denggendanto ti sasaom ngem saandanto nga aramiden dagitoy,+ ta babaen iti ngiwatda mangyebkasda kadagiti dinederrep a tarigagay ket ti nakillo a gunggonada isu ti sursuroten ti pusoda.+
32 Ket, adtoy! kadakuada kaslaka iti kanta dagiti naderrep nga ayat, kas iti maysa nga addaan napintas a timek ken nalaing nga agtokar iti pagtokar nga adda kuerdasna.+ Ket sigurado a mangngegdanto ti sasaom, ngem awan ti mangaramid kadakuada.+
33 Ket inton pumudno dayta—adtoy! masapul a pumudno+—kasapulan a maammuandanto met a maysa a mammadto a mismo ti adda idi iti tengngada.”+
