Ezequiel 42:1-20
42 Ket nagin-inut nga inruarnak+ nga agturong iti makinruar a paraangan iti dalan nga agpaamianan.+ Ket impannak iti benneg ti siled a panganan+ nga adda iti sanguanan ti naisina a disso+ ken adda iti sanguanan ti patakder iti agpaamianan.
2 Iti sanguanan ti nagatiddogan ti sangagasut a kasiko adda ti pagserkan iti amianan, ket ti kaakabana limapulo a kasiko.
3 Iti sanguanan ti duapulo a kasiko a paset ti makin-uneg a paraangan+ ken iti sanguanan ti dappat+ a paset ti makinruar a paraangan adda galeria+ iti batog ti galeria a tallo a kadsaaran.
4 Ket iti sanguanan dagiti siled a panganan adda pagnaan a sangapulo a kasiko ti kaakabana nga agpauneg,+ dalan a maysa a kasiko, ket dagiti pagserkanda agpaamianan.
5 Ket no maipapan kadagiti siled a panganan, ab-ababa dagidiay makinngato-amin, ta dagiti galeria nangalada kadakuada, nga ad-adda ngem kadagidiay kababaan ken kadagidiay nagtengnga, no maipapan iti patakder.
6 Ta addada iti tallo a kadsaaran,+ ket awananda iti ad-adigi a kas iti ad-adigi dagiti paraangan. Dayta ti makagapu a nalawlawa ti nakissay ngem kadagidiay kababaan ken kadagidiay nagtengnga manipud iti suelo.
7 Ket ti bato a pader nga adda iti ruar asideg idi kadagiti siled a panganan iti turong ti makinruar a paraangan iti sanguanan ti dadduma a siled a panganan. Ti kaatiddogna ket limapulo a kasiko.
8 Ta ti kaatiddog dagiti siled a panganan iti turong ti makinruar a paraangan limapulo a kasiko, ket, adtoy! iti sanguanan ti templo sangagasut a kasiko.
9 Ket manipud iti baba dagitoy a siled a panganan, ti seserrekan tumurong iti daya, no ti maysa sumrek kadakuada manipud iti makinruar a paraangan.
10 Iti nagakabaan ti bato a pader ti paraangan nga agpadaya, iti sanguanan ti naisina a disso+ ken iti sanguanan ti patakder, adda silsiled a panganan.+
11 Ket adda maysa a dalan iti sanguananda a kas iti langa ti dalan dagiti siled a panganan nga agpaamianan,+ kasta ti kaatiddogda ken kasta ti kaakabada; ket amin dagiti pagruaranda agpapada, ket dagiti planoda agpapada ken dagiti pagserkanda agpapada.
12 Ket kas kadagiti pagserkan dagiti siled a panganan nga agpaabagatan kasta ti pagserkan iti pamunganayan a dalan, ti dalan iti sanguanan ti maitupag a bato a pader nga agpadaya, no ti maysa sumrek kadakuada.+
13 Ket kinunana kaniak: “Dagiti siled a panganan iti amianan ken dagiti siled a panganan iti abagatan nga adda iti sanguanan ti naisina a disso,+ isuda dagiti nasantuan a siled a panganan, a sadiay ti papadi nga umad-adani+ ken Jehova kanenda ti kasasantuan a bambanag.+ Sadiay nga ikabilda ti kasasantuan a bambanag ken ti daton a bukbukel ken ti daton gapu iti basol ken ti daton gapu iti babak, agsipud ta ti disso nasantuan.+
14 No isuda, ti papadi, nakastrekdan, saandanto met a rummuar manipud iti nasantuan a disso nga agturong iti makinruar a paraangan, no di ket sadiay ikabildanto dagiti kawesda a nakayugalianda a pagserbi,+ ta nasantuanda a banag. Agkawesdanto kadagiti sabali a kawes,+ ket masapul nga umasidegda iti adda pakainaiganna kadagiti umili.”
15 Ket nalpasna dagiti rukod ti makin-uneg a balay, ket inruarnak iti ruangan a ti sangona tumurong iti daya,+ ket rinukodna dayta iti intero nga aglikmut.
16 Rinukodna ti makindaya a sikigan babaen iti runo a pagrukod. Dayta ket lima gasut a runo, babaen iti runo a pagrukod,+ iti aglikmut.
17 Rinukodna ti makin-amianan a sikigan, lima gasut a runo, babaen iti runo a pagrukod, iti aglikmut.
18 Ti makin-abagatan a sikigan rinukodna, lima gasut a runo, babaen iti runo a pagrukod.
19 Isu naglikaw iti makinlaud a sikigan. Nangrukod iti lima gasut a runo, babaen iti runo a pagrukod.
20 Maipaay iti uppat a sikigan rinukodna dayta. Addaan dayta iti pader iti intero nga aglikmut,+ nga addaan iti kaatiddog a lima gasut a runo ken kaakaba a lima gasut a runo,+ tapno mangaramid iti paglasinan iti nagbaetan ti nasantuan ken ti di nasantuan.+
