Ezequiel 47:1-23
47 Ket nagin-inut nga insublinak iti pagserkan ti Balay,+ ket, adtoy! adda danum+ a rumrummuar manipud sirok ti arsadanan ti Balay iti agpadaya,+ ta ti sango ti Balay ket iti daya. Ket ti danum bumabbaba manipud iti sirok, manipud makinkannawan a sikigan ti Balay, iti abagatan ti altar.
2 Ket nagin-inut nga inruarnak a dumalan iti ruangan iti amianan+ ket inlikawnak iti dalan iti ruar agingga iti makinruar a ruangan a sumango iti daya,+ ket, adtoy! agar-aruyot ti danum+ manipud iti makinkannawan a sikigan.
3 Idi a ti lalaki rimmuar a nagpadaya nga adda pagrukod a parteng iti imana,+ nangrukod met iti sangaribu a kasiko ket pinalasatnak iti danum, danum nga agingga kadagiti palaypalay.
4 Ket intuloyna ti nangrukod iti sangaribu ket kalpasanna pinalasatnak iti danum, danum nga agingga kadagiti tumeng.
Ket intuloyna ti nangrukod iti sangaribu ket itan pinalasatnak—iti danum nga agingga kadagiti padingpading.
5 Ket intuloyna ti nangrukod iti sangaribu. Maysa dayta a napegges nga ayus a saanko a kabaelan a lasaten, ta ngimmato ti danum, danum a mapaglangoyan, napegges nga ayus a di mabalin a lasaten.
6 Iti kasta kinunana kaniak: “Nakitam kadi daytoy, O anak ti tao?”
Idin pinapagnanak ket pinagsublinak iti igid ti napegges nga ayus.
7 Idi nagsubliak, ay ket, adtoy! iti igid ti napegges nga ayus adda adu unay a kayo, iti daytoy a deppaar ken iti dayta a deppaar.+
8 Ket kinunana kaniak: “Daytoy a danum rummuar nga agturong iti makindaya a rehion ket sumalogto iti Araba.+ Ket dumtengto iti baybay.+ No dimmanonen dayta iti mismo a baybay,+ pudno a mapaimbag met ti danumna.
9 Ket mapasamakto a tunggal sibibiag a kararua nga agpangen,+ iti tunggal disso nga umayan ti mamindua ti kadakkelna a napegges nga ayus, maaddaanto iti biag. Ket mapasamakto nga addanto adu unay nga ikan, agsipud ta sadiay ti sigurado nga umayanto daytoy a danum, ket ti danum ti baybay mapaimbagto,+ ket agbalinto a sibibiag ti isuamin nga umayan ti napegges nga ayus.
10 “Ket mapasamakto a dagiti dumadaklis pudno nga agtakderdanto iti igidna manipud En-gedi+ agingga a mismo idiay En-eglaim. Addanto ti maysa a disso a pagipamagaan kadagiti iket. Iti kakikitada adunto unay ti ikanda, kas iti ikan ti Dakkel a Baybay.+
11 “Adda dagiti nalutlot a dissona ken dagiti naaluguog a dissona, ket saandanto a mapaimbag.+ Sigurado a maiteddanto iti asin.+
12 “Ket iti igid ti napegges nga ayus addanto tumpuar, iti igidna iti daytoy a deppaar ken iti dayta a deppaar, nga amin a kita ti kaykayo a pagtaraon.+ Ti bulbulongda saanto a malaylay,+ saanto met a maibus ti bungada.+ Kadagiti bulanda mangpatauddanto iti baro a bunga, agsipud ta ti danum nga agpaay kadakuada—aggapgapu iti mismo a santuario.+ Ket ti bungada agpaayto a taraon ket ti bulbulongda agpaay a pangpaimbag.”+
13 Daytoy ti kinuna ti Soberano nga Apo Jehova: “Daytoy ti teritoria nga itudingyonto iti bagbagiyo a maipaay a tawid kas ti daga nga agpaay iti sangapulo ket dua a tribu ti Israel, a dua a kadisso a talon ti agpaay ken Jose.+
14 Ket masapul a tawidenyo dayta, tunggal maysa kas met laeng iti kabsatna, nga iti dayta a daga intag-ayko ti imak iti maysa a sapata+ tapno itedko kadagidi ammayo;+ ket daytoy a daga maitumpongto kadakayo babaen ti binnunot maipaay a tawid.+
15 “Ket daytoy ti beddeng ti daga iti makin-amianan a deppaar, manipud iti Dakkel a Baybay iti dalan nga agturong iti Hetlon,+ no ti maysa umay iti Zedad,+
16 Hamat,+ Berota,+ Sibraim, nga adda iti nagbaetan ti beddeng ti Damasco+ ken ti beddeng ti Hamat; Hazer-hatticon, nga agturong iti beddeng ti Hauran.+
17 Ket ti beddeng manipud iti baybay isunto ti Hazar-enon,+ ti beddeng ti Damasco ken amianan—agpaamianan, ken ti beddeng ti Hamat.+ Daytoy ti makin-amianan a deppaar.
18 “Ket ti makindaya a deppaar isu ti manipud iti nagbaetan ti Hauran+ ken Damasco+ ken iti nagbaetan ti Galaad+ ken ti daga ti Israel; ti Jordan,+ manipud iti beddeng agingga iti makindaya a baybay rebbeng a rukodenyo. Daytoy ti makindaya a deppaar.
19 “Ket ti makin-abagatan a deppaar isu ti agpaabagatan, manipud Tamar+ agingga iti dandanum ti Meribat-cades,+ ti naapres a ginget+ agingga iti Dakkel a Baybay. Daytoy ti deppaar iti abagatan, nga agturong iti Negeb.
20 “Ket ti makinlaud a deppaar isu ti Dakkel a Baybay, manipud iti beddeng nga aglayon iti sanguanan nga agturong iti seserkan iti Hamat.+ Daytoy ti makinlaud a deppaar.”
21 “Ket masapul a bingaybingayenyo daytoy a daga iti bagbagiyo, iti sangapulo ket dua a tribu ti Israel.
22 Ket mapasamakto a bingbingayenyo dayta a maipaay a tawid iti bagbagiyo+ ken kadagiti ganggannaet nga agnanaed nga agtataeng kas ganggannaet iti tengngayo,+ isuda a nagbalin nga ama iti annak iti tengngayo. Ket agbalindanto kadakayo a kas katutubo iti tengnga ti annak ti Israel. Babaen ti binnunot maitumpongdanto a maikuyog kadakayo iti maysa a tawid iti tengnga dagiti tribu ti Israel.+
23 Ket mapasamakto nga iti tribu a ti ganggannaet nga agnanaed nagtaeng kas ganggannaet, sadiay nga itedyo ti tawidna,” kuna ti Soberano nga Apo Jehova.
