Ezequiel 48:1-35
48 “Ket dagitoy ti nagnagan dagiti tribu. Manipud iti makin-amianan nga ungto, iti deppaar iti dalan ti Hetlon+ agingga iti seserkan iti Hamat,+ Hazar-enan,+ ti beddeng ti Damasco nga agpaamianan, iti deppar ti Hamat; ket addaanto iti makindaya a ketegan ken ti makinlaud, ti Dan+ maysa a bingay.
2 Ket iti beddeng ti Dan, manipud iti makindaya a ketegan agingga iti makinlaud a ketegan, ti Aser+ maysa.
3 Ket iti beddeng ti Aser, manipud iti makindaya a ketegan agingga a mismo iti makinlaud a ketegan, ti Neftali+ maysa.
4 Ket iti beddeng ti Neftali, manipud iti makindaya a ketegan agingga iti makinlaud a ketegan, ti Manases+ maysa.
5 Ket iti beddeng ti Manases, manipud iti makindaya a ketegan agingga iti makinlaud a ketegan, ti Efraim+ maysa.
6 Ket iti beddeng ti Efraim, manipud iti makindaya a ketegan agingga a mismo iti makinlaud a ketegan, ti Ruben+ maysa.
7 Ket iti beddeng ti Ruben, manipud iti makindaya a ketegan agingga iti makinlaud a ketegan, ti Juda+ maysa.
8 Ket iti beddeng ti Juda, manipud iti makindaya a ketegan agingga iti makinlaud a ketegan, ti kontribusion a rebbeng nga ikontribusionyo masapul a duapulo ket lima a ribu a kasiko ti kaakabana,+ ket ti kaatiddogna maitunos iti maysa kadagiti bingay manipud iti makindaya a ketegan agingga iti makinlaud a ketegan. Ket ti santuario masapul nga adda iti tengngana.+
9 “No maipapan iti kontribusion a rebbeng nga ikontribusionyo ken Jehova, duapulo ket lima a ribu a kasiko ti kaatiddognanto ket sangapulo a ribu ti kaakabana.
10 Ket no maipapan kadagitoy rebbeng nga adda ti nasantuan a kontribusion a maipaay iti papadi,+ iti agpaamianan duapulo ket lima a ribu a kasiko, ket iti agpalaud maysa a kaakaba a sangapulo a ribu, ket iti agpadaya maysa a kaakaba a sangapulo a ribu, ket iti agpaabagatan maysa a kaatiddog a duapulo ket lima a ribu. Ket ti santuario ni Jehova masapul nga adda iti tengngana.+
11 Maipaayto dayta iti papadi, dagidiay a nasantipikar manipud iti annak ni Sadok,+ isuda a nangaywan iti pagrebbengan kaniak, isuda a saan a nagtawataw idi nagtawataw ti annak ti Israel, kas iti panagtawataw dagiti Levita.+
12 Ket masapul a maaddaanda iti kontribusion manipud iti kontribusion ti daga kas kasasantuan a banag, iti beddeng dagiti Levita.+
13 “Ket dagiti Levita rebbeng a maaddaanda,+ iti mismo a denna ti teritoria ti papadi, iti duapulo ket lima a ribu a kasiko ti kaatiddogna, ket ti kaakabana sangapulo a ribu; a ti intero a kaatiddogna duapulo ket lima a ribu ket ti kaakabana sangapulo a ribu.+
14 Ket rebbeng a saanda nga ilako ti aniaman iti dayta, ti maysa saan met a makisinnukat, saanna met a pagbalinen a maipanaw kadakuada ti kasayaatan iti daga; ta nasantuan a banag dayta ken Jehova.+
15 “No maipapan iti lima ribu a kasiko a nabatbati iti kaakaba iti abay ti duapulo ket lima a ribu, maysa dayta a banag a di nasantuan maipaay iti siudad,+ maipaay a disso a pagnaedan ken maipaay a pagpaaraban. Ket ti siudad maaddanto iti tengngana.+
16 Ket dagitoy dagiti rukod ti siudad: ti makin-amianan a ketegan uppat a ribu lima gasut a kasiko, ket ti makin-abagatan a ketegan uppat a ribu lima gasut, ket ti makindaya a ketegan uppat a ribu lima gasut, ket ti makinlaud a ketegan uppat a ribu lima gasut.
17 Ket ti siudad masapul a maaddaan iti pagpaaraban,+ iti agpaamianan dua gasut ket limapulo a kasiko, ket iti agpaabagatan dua gasut ket limapulo, ket iti agpadaya dua gasut ket limapulo, ket iti agpalaud dua gasut ket limapulo.
18 “Ket ti mabati iti kaatiddog apag-isunto a kas iti nasantuan a kontribusion,+ sangapulo a ribu a kasiko nga agpadaya, ken sangapulo a ribu nga agpalaud; ket masapul nga apag-isu kas iti nasantuan a kontribusion, ket ti apitna maipaayto a tinapay kadagidiay agserserbi iti siudad.+
19 Ket talonento dayta dagidiay agserserbi iti siudad manipud kadagiti amin a tribu ti Israel.+
20 “Ti intero a kontribusion duapulo ket lima a ribu a kasiko ti kaatiddogna ken duapulo ket lima a ribu ti kaakabana. Maysa a kuadrado a paset ti rebbeng nga ikontribusionyo kas ti nasantuan a kontribusion agraman iti kukua ti siudad.
21 “Ket ti matedda kukuanto ti panguluen,+ iti daytoy a sikigan ken iti dayta a sikigan ti nasantuan a kontribusion ken ti kukua ti siudad,+ iti abay ti duapulo ket lima a ribu a kasiko ti kontribusion agingga iti makindaya a beddeng; ken iti laud iti abay ti duapulo ket lima a ribu a kasiko agingga iti makinlaud a beddeng.+ Apag-isu unay a kas kadagiti bingay, maipaayto dayta iti panguluen. Ket ti nasantuan a kontribusion ken ti santuario ti Balay addanto iti tengngana.
22 “Ket no maipapan iti kukua dagiti Levita ken iti kukua ti siudad, adda koma iti nagbaetan ti kukua ti panguluen. Ti nagbaetan ti beddeng ti Juda+ ken ti beddeng ti Benjamin rebbeng a kukua ti panguluen.
23 “Ket no maipapan iti dadduma pay kadagiti tribu, manipud iti makindaya a ketegan agingga iti makinlaud a ketegan, ti Benjamin+ maysa a bingay.
24 Ket iti denna ti beddeng ti Benjamin, manipud iti makindaya a ketegan agingga iti makinlaud a ketegan, ti Simeon+ maysa.
25 Ket iti denna ti beddeng ti Simeon, manipud iti makindaya a ketegan agingga iti makinlaud a ketegan, ti Isacar+ maysa.
26 Ket iti denna ti beddeng ti Isacar, manipud iti makindaya a ketegan agingga iti makinlaud a ketegan, ti Zabulon+ maysa.
27 Ket iti denna ti beddeng ti Zabulon, manipud iti makindaya a ketegan agingga iti makinlaud a ketegan, ti Gad+ maysa.
28 Ket iti denna ti beddeng ti Gad, iti makin-abagatan a ketegan, agpaabagatanto; ket ti beddeng manipudto iti Tamar+ nga agturong iti dandanum ti Meribat-cades,+ agturong iti naapres a ginget,+ agingga iti Dakkel a Baybay.+
29 “Daytoyto ti daga nga itumpongyo babaen ti binnunot maipaay a tawid kadagiti tribu ti Israel,+ ket dagitoy isunto dagiti binglayda,”+ kuna ti Soberano nga Apo Jehova.
30 “Ket dagitoy dagiti pagruaran ti siudad: Iti makin-amianan a ketegan, uppat a ribu lima gasut a kasiko ti rukodnanto.+
31 “Ket dagiti ruangan ti siudad maitunosto iti nagnagan dagiti tribu ti Israel, a tallo a ruangan ti adda iti amianan, ti ruangan ti Ruben, maysa; ti ruangan ti Juda, maysa; ti ruangan ti Levi, maysa.
32 “Ket iti makindaya a ketegan addanto uppat a ribu lima gasut a kasiko, ken tallo a ruangan, ti mismo a ruangan ti Jose, maysa; ti ruangan ti Benjamin, maysa; ti ruangan ti Dan, maysa.
33 “Ket ti makin-abagatan a ketegan uppat a ribu lima gasut a kasiko no iti rukodna, nga addaan tallo a ruangan, ti ruangan ti Simeon, maysa; ti ruangan ti Isacar, maysa; ti ruangan ti Zabulon, maysa.
34 “Ti makinlaud a ketegan uppat a ribu lima gasut a kasikonto, nga addaan tallo a ruangan, ti ruangan ti Gad, maysa; ti ruangan ti Aser, maysa; ti ruangan ti Neftali, maysa.
35 “Iti aglikmut addanto sangapulo ket walo a ribu a kasiko; ket ti nagan ti siudad manipuden iti dayta nga aldaw isunto ti Ni Jehova a Mismo Adda Sadiay.”+
