Habakuk 1:1-17
1 Ti pammakdaar a nasirmata ni Habakuk a mammadto:
2 Kasano kabayag, O Jehova, a masapul nga agpatulongak, ket saanka a dumngeg?+ Kasano kabayag nga umasugakto kenka iti tulong manipud kinaranggas, ket saanka a mangisalakan?+
3 Apay nga ipakitam kaniak ti makapasakit, ket kumitkitaka iti riribuk laeng? Ket apay nga adda iti sangok ti panangagaw ken kinaranggas, ket apay a mapasamak ti panagririri, ket apay a tumanor ti ringgor?+
4 Gapuna mabibineg ti linteg, ket ti hustisia saan a pulos rummuar.+ Agsipud ta ti nadangkes palpalikmutanna ti nalinteg, iti dayta a rason rumsua a killo ti hustisia.+
5 “Kumitakayo iti tengnga dagiti nasion, ket imatanganyo, ket agmiminnulagatkayo a sisisiddaaw.+ Agsiddaawkayo; ta adda aramid nga ar-aramiden ti maysa iti kaaldawanyo, a saanyonto a patien nupay maisalaysay.+
6 Ta adtoy patakderek dagiti Caldeo,+ ti nasion a sipapait ken nadursok, a mapmapan kadagiti nakalaylayang a disso ti daga tapno mangtagikua kadagiti pagtaengan a saanna a kukua.+
7 Nakaal-aliaw ken nakaam-amak dayta. Manipud kenkuana rummuar ti bukodna a hustisia ken ti bukodna a dayaw.+
8 Ket dagiti kabaliona nasigsiglatda ngem kadagiti leopardo, ket narungrungsotda ngem kadagiti lobo iti rabii.+ Ket dagiti kabaliona a pakigubat kinarukayda ti daga, ket manipud iti adayo umay dagiti bukodna a kabalio a pakigubat. Agtayabda a kas iti agila nga agdardaras tapno mangan iti maysa a banag.+
9 Iti pakabuklanna umay maipaay iti kinaranggas laeng.+ Ti panaguummong dagiti rupada ket kas iti wayaway nga angin,+ ket mangurnong kadagiti kautibo kas iti darat.
10 Ket iti biangna, laisenna ti mismo nga ar-ari, ket dagiti nangato nga opisial maysa a banag a nakakatkatawa kenkuana.+ Iti biangna, katawaanna uray ti tunggal nasarikedkedan a lugar,+ ket mangigabsuon iti tapok ket kautibuenna dayta.
11 Iti dayta a tiempo sigurado nga agpatuloyto nga agtignay a kasla angin ket lumasatto ket pudno nga agbalinto a nakabasol.+ Daytoy a pannakabalinna ket gapu iti diosna.”+
12 Saan aya a manipudka iti nabayagen a tiempo, O Jehova?+ O Diosko, ti Santok, saanka a matay.+ O Jehova, inkeddengmo dayta maipaay iti panangukom; ket, O Bato,+ impasdekmo dayta maipaay iti panangtubngar.+
13 Nasin-aw unay dagiti matam tapno kumita iti dakes; ket saanmo a kabaelan ti kumita iti riribuk.+ Apay a kitaem dagidiay makilanglangen a sigugulib,+ nga agulimekka no daydiay nadangkes alun-onenna daydiay nalinlinteg ngem isu?+
14 Ket apay a pagbalinem ti naindagaan a tao a kas kadagiti ikan ti baybay, kas agkarkarayam a bambanag a kadakuada awan ti agturay?+
15 Amin dagitoy insang-atna babaen iti banniit laeng;+ ulodenna ida nga iyadayo iti iketna a pagdaklis, ket tiponenna ida iti pagkalap nga iketna.+ Dayta ti makagapu nga isu agragsak ket narag-o.+
16 Dayta ti makagapu nga isu mangidaton iti sakripisio iti iketna a pagdaklis ket mangpataud iti asuk a sakripisio iti pagkalap nga iketna; ta babaen kadakuada nataba unay ti bingayna, ket ti taraonna makapasalun-at.+
17 Dayta kadi ti makagapu nga ikkatennanto ti nagyan ti iketna a pagdaklis, ket kasapulan kadi a patinayon a mangpapatay kadagiti nasion, bayat a saan a mangipakita iti panangngaasi?+
