Habakuk 3:1-19
3 Ti kararag ni Habakuk a mammadto babaen kadagiti dung-aw:
2 O Jehova, nangngegko ti damag maipapan kenka.+ Nagbutengak, O Jehova, iti aramidmo.+
Iti ngalay dagiti tawen O pabiagem dayta! Iti ngalay dagiti tawen ipakaammom koma. Bayat ti pannakariribuk, malagipmo koma ti mangipakita iti asi.+
3 Ti met laeng Dios immay manipud Teman, Daydiay mismo a Santo manipud Bantay Paran.+ Selah.+
Ti kinatan-okna inabbonganna ti langlangit;+ ket ti daga napno iti pakaidaydayawanna.+
4 No maipapan iti kinaraniagna, nagbalin a kas iti lawag.+ Isu addaan dua a sinamar a rumrummuar manipud imana, ket sadiay ti nakailemmengan ti pigsana.+
5 Iti sanguananna nagtultuloy a napan ti angol,+ ket ti nakabarbara a gurigor rummuar kadagiti sakana.+
6 Isu nagintek, tapno mayegyegna ti daga.+ Kimmita, ket kalpasanna pinalagtona dagiti nasion.+
Ket naburak dagiti agnanayon a bantay;+ nagrukob dagiti di nakedngan ti kapautna a turod.+ Kukuana dagiti pannagna iti nabayagen a tiempo.
7 Iti sidong ti makapasakit nakitak dagiti tolda ti Cusan. Nangrugi a madayyeg+ dagiti lupot ti tolda ti daga ti Midian.+
8 Maibusor kadi kadagiti karayan, O Jehova, maibusor kadi kadagiti karayan a bimmara ti ungetmo,+ wenno ti kadi rungsotmo maibusor iti baybay?+ Ta napanka a sisasakay kadagiti kabaliom;+ dagiti karuahem ket pannakaisalakan.+
9 Iti kinalamolamona maipanayag ti baim.+ Ti sinapataan a karkari dagiti tribu isuda ti banag a naisao.+ Selah. Babaen kadagiti karayan binisngaymo ti daga.+
10 Nakitadaka dagiti bantay; nagrigatda iti nakaro.+ Limmabas ti nagurruod a bagyo ti dandanum. Ti nadanum a yuyeng inyesngawna ti unina.+ Iti ngato intag-ayna dagiti imana.
11 Ti init—bulan—nagintek,+ iti nangato a pagyananda.+ Kas iti lawag nagtultuloy a napan dagiti bukodmo a pana.+ Ti kimat ti pikam nagserbi a kinaraniag.+
12 Buyogen ti panangkondenar nagmartsaka iti daga. Iti unget inirikmo dagiti nasion.+
13 Ket rimmuarka maipaay iti pannakaisalakan ti ilim,+ tapno isalakanmo daydiay pinulotam. Rinangrangkaymo daydiay pannakaulo manipud iti balay ti nadangkes.+ Adda idi panangiduyayyat iti pamuon, agingga iti tengnged.+ Selah.
14 Babaen kadagiti bukodna a sarukod sinalputmo+ ti ulo dagiti mannakigubatna idi nagtignayda a sidadawel unay a mangiwarawara kaniak.+ Ti napalalo a ragsakda ket kas iti ragsak dagidiay determinado a mangalun-on iti daydiay naparigatan iti lugar a paglemmengan.+
15 Nagbaddekka iti baybay buyogen kadagiti kabaliom, iti bunton ti nakalawlawa a dandanum.+
16 Nangngegko, ket ti tianko nangrugi a makibur; gapu iti uni nagtayegteg dagiti bibigko; ti kinarinuker nangrugi a sumrek kadagiti tulangko;+ ket iti kasasaadko nariribukanak, tapno urayek koma a siuulimek ti aldaw ti rigat,+ iti isasang-atna kadagiti tattao,+ tapno rubbuotenna ida.
17 Nupay ti met laeng kayo a higos saan nga agsabong,+ ket awan bunga kadagiti puon ti ubas; ti trabaho ti kayo nga olibo mabalin nga agbanag iti pannakapaay, ket dagiti met laeng natukantukad a talon mabalin a saanda a mangpataud iti taraon;+ ti arban pudno a maisina iti kulongan, ket mabalin nga awan pangen kadagiti alug-og;+
18 Kaskasdi, no maipapan kaniak, agragsakakto ken Jehova a mismo;+ agrag-oakto iti Dios ti pannakaisalakanko.+
19 Ni Jehova a Soberano nga Apo isu ti kiredko;+ ket pagbalinennanto dagiti sakak a kas iti saksaka dagiti kabaian nga ugsa,+ ket pabaddekennakto iti rabaw dagiti nangato a dissok.+Iti mangiwanwanwan kadagiti pagtokarko nga adda kuerdasna.
