Josue 11:1-23
11 Ket naaramid nga apaman a nangngeg dayta ni Jabin nga ari ti Hasor, nagbaon ken Jobab nga ari ti Madon+ ken iti ari ti Simron ken ti ari ti Acsaf,+
2 ken iti ar-ari nga adda idi iti agpaamianan iti nakabambantay a rehion ken iti desierto a tantanap iti abagatan ti Kinneret+ ken iti Sefela+ ken kadagiti pantok ti bantay ti Dor+ iti agpalaud,
3 dagiti Canaanita+ iti daya ken iti laud, ken dagiti Amoreo+ ken dagiti Heteo+ ken dagiti Perizeo+ ken dagiti Jebuseo+ iti nakabambantay a rehion ken dagiti Heveo+ iti arisadsad ti Hermon+ iti daga ti Mizpa.+
4 Iti kasta rimmuarda, isuda ken amin dagiti pakarsoda a naikuyog kadakuada, maysa nga ili a nakaad-adu kas kadagiti binukel ti darat nga adda iti aplaya ti kinaaduda,+ ken adu unay a kabalio+ ken karuahe a pakigubat.
5 Idin amin dagitoy nga ar-ari nagsasarakda babaen ti tulagan ket immayda ket nagpakarsoda a sangsangkamaysa iti dandanum ti Merom tapno makirupakda iti Israel.+
6 Gapu itoy ni Jehova kinunana ken Josue: “Dika agbuteng gapu kadakuada,+ ta inton bigat iti agarup kastoy nga oras isuda amin baybay-ak a napapatay iti Israel. Dagiti kabalioda lugpiemto,+ ket dagiti karuaheda puoramto iti apuy.”+
7 Ket ni Josue ken amin a tattao ti gubat a naikuyog kenkuana kellaat nga immayda a bumusor kadakuada iti dandanum ti Merom ket dimmuklosda kadakuada.
8 Idin inyawat ida ni Jehova iti ima ti Israel,+ ket kinabilda ida ken kinamatda ida agingga iti aduan umilina a Sidon+ ken Misrefot-maim+ ken iti ginget a tanap ti Mizpe+ iti agpadaya; ket intultuloyda a kinabil ida agingga nga awan inteddada a makalasat a kukuada.+
9 Kalpasan dayta inaramid kadakuada ni Josue kas iti kinuna ni Jehova kenkuana: dagiti kabalioda linugpina,+ ket dagiti karuaheda pinuoranna iti apuy.+
10 Ad-adda pay ngem iti dayta, ni Josue bimmaw-ing iti dayta a tiempo+ ket kinautibona ti Hasor;+ ket ti arina kinabilna babaen ti kampilan,+ agsipud ta ti Hasor sakbay dayta isu ti ulo dagitoy amin a pagarian.
11 Ket kinabilda ti tunggal kararua nga adda iti dayta babaen ti tadem ti kampilan, nga impaayda ida iti pannakadadael.+ Awan a pulos agang-anges a banag a natedda,+ ket pinuoranna ti Hasor iti apuy.
12 Ket amin dagiti siudad dagitoy nga ar-ari ken amin nga ar-arida kinautibo ni Josue ket kinabilna ida babaen ti tadem ti kampilan.+ Impaayna ida iti pannakadadael,+ kas iti imbilin ni Moises nga adipen ni Jehova.+
13 Dagidiay laeng amin a siudad nga agtaktakder kadagiti bukodda a munturod ti saan a pinuoran ti Israel, malaksid ti mismo a Hasor a pinuoran ni Josue.
14 Ket ti isuamin a ginam-ud dagitoy a siudad ken dagiti naamo nga animal sinamsam ti annak ti Israel maipaay iti bagbagida.+ Amin a tattao laeng ti kinabilda babaen ti tadem ti kampilan agingga a natalipuposda ida.+ Saanda a nangitedda iti asinoman nga adda angesna.+
15 Kas iti imbilin ni Jehova ken Moises nga adipenna, kasta ti imbilin ni Moises ken Josue,+ ket kasta ti inaramid ni Josue. Saan a nangikkat iti maysa a sao iti isuamin nga imbilin ni Jehova ken Moises.+
16 Ket innala ni Josue ti isuamin daytoy a daga, ti nakabambantay a rehion ken ti intero a Negeb+ ken ti intero a daga ti Gosen+ ken ti Sefela+ ken ti Araba+ ken ti nakabambantay a rehion ti Israel ken ti Sefelana,+
17 manipud Bantay Halac,+ a sumang-at idiay Seir,+ ken agingga idiay Baal-gad+ iti ginget a tanap ti Libano iti arisadsad ti Bantay Hermon,+ ket kinautibona amin nga ar-arida ket kinabilna ida ken pinapatayna ida.+
18 Adu nga aldaw a nakigubgubat ni Josue kadagitoy amin nga ar-ari.
19 Awan idi ti siudad a nakikappia iti annak ti Israel no di dagiti Heveo+ nga agnanaed idiay Gabaon.+ Amin dagiti dadduma innalada babaen iti gubat.+
20 Ta dayta idi ti tignay ni Jehova a bay-an nga agbalin a nasungit dagiti pusoda+ tapno ideklarada ti gubat maibusor iti Israel, tapno iti kasta maipaayna ida iti pannakadadael, iti kasta saanda koma a maipaayan iti naparabur a konsiderasion,+ no di ket tapno matalipuposna ida, kas iti imbilin ni Jehova ken Moises.+
21 Kanayonanna pay, iti dayta met laeng a tiempo napan ni Josue ket ginessatna ti Anakim+ manipud iti nakabambantay a rehion, manipud Hebron, manipud Debir, manipud Anab+ ken manipud iti intero a nakabambantay a rehion ti Juda ken manipud iti intero a nakabambantay a rehion ti Israel.+ Agraman dagiti siudadda impaay ida ni Josue iti pannakadadael.+
22 Awan ti Anakim a natedda iti daga ti annak ti Israel. Idiay laeng Gaza,+ idiay Gat+ ken idiay Asdod+ a nagtalinaedda.+
23 Gapuna ni Josue innalana ti intero a daga, maitunos iti amin nga inkari ni Jehova ken Moises,+ ket kalpasanna inted dayta ni Josue kas tawid iti Israel mayalubog kadagiti binglayda, sigun kadagiti tribuda.+ Ket ti daga awan idi ti pannakasingana iti gubat.+
