Josue 16:1-10
16 Ket ti pannaka-bunot+ rimmuar a maipaay iti annak ni Jose+ manipud iti Jordan+ idiay Jerico nga agturong iti dandanum ti Jerico nga agpadaya, ti let-ang a sumang-at manipud Jerico nga agturong iti nakabambantay a rehion ti Bethel.+
2 Ket rimmuar dayta manipud Bethel a kukua ti Luz+ ket bimmallasiw agingga iti beddeng dagiti Arquita+ idiay Atarot,
3 ket simmalog nga agpalaud agingga iti beddeng dagiti Jafleteo agingga iti beddeng ti Makimbaba a Bet-horon+ ken ti Gezer,+ ket sadiay baybay ti paginggaanna.+
4 Ket ti annak ni Jose,+ da Manases ken Efraim,+ tinagikuada ti daga.+
5 Ket ti beddeng ti annak ni Efraim sigun iti pampamiliada isu idi, wen, ti beddeng ti tawidda nga agpadaya isu idi ti Atarot-addar,+ agingga iti Makinngato a Bet-horon;+
6 ket ti beddeng rimmuar agingga iti baybay. Ti Micmetat+ adda idi iti amianan, ket ti beddeng naglikaw nga agpadaya agingga iti Taanat-silo, ket bimmallasiw nga agpadaya agingga iti Janoa.
7 Ket simmalog dayta manipud Janoa agingga iti Atarot ken iti Naara ket dimmanon agingga iti Jerico+ ken rimmuar agingga iti Jordan.
8 Manipud Tappua+ naglayon nga agpalaud ti beddeng agingga iti naapres a ginget ti Kana,+ ket sadiay baybay ti paginggaanna.+ Daytoy ti tawid ti tribu ti annak ni Efraim sigun iti pampamiliada.
9 Ket ti annak ni Efraim addaanda kadagiti naipasngat a siudad+ iti tengnga ti tawid ti annak ni Manases, amin dagiti siudad ken dagiti purokda.
10 Ket saanda a pinagtalaw dagiti Canaanita+ nga agnanaed idiay Gezer,+ ket dagiti Canaanita agtultuloyda nga agnaed iti tengnga ti Efraim agingga itoy nga aldaw+ ket naipasakupda iti mangadipen a pinuersa a panagtrabaho.+
