Josue 2:1-24
2 Idin ni Josue nga anak ni Nun nangibaon a sililimed iti dua a lallaki manipud Sittim+ kas managsimisim, a kunkunana: “Inkayo, kitaenyo ti daga ken ti Jerico.” Iti kasta napanda ket dimtengda iti balay ti maysa a balangkantis a babai nga agnagan Rahab,+ ket nagdagusda sadiay.
2 Idi agangay naikuna iti ari ti Jerico: “Adtoy! Dagiti lallaki manipud iti annak ti Israel simrekda ditoy ita a rabii tapno sukimatenda ti daga.”
3 Iti kasta ti ari ti Jerico nagbaon ken Rahab, a kunkunana: “Iruarmo dagiti lallaki nga immay kenka, a simrek iti balaymo, ta immayda tapno sukimatenda ti intero a daga.”+
4 Kabayatanna ti babai innalana ti dua a lallaki ket inlemmengna ida. Ket kinunana: “Wen, immay kaniak dagiti lallaki, ket diak ammo no sadino ti naggapuanda.
5 Ket naaramid iti pannakaiserra ti ruangan+ idi sumipngeten a rimmuar dagiti lallaki. Diak laeng ammo no sadino ti napanan dagiti lallaki. Darasenyo a kamaten ida, ta makamakamyonto ida.”
6 (Nupay kasta, inyulina ida iti pangatepan,+ ket inlemmengna ida kadagiti ungkay ti lino a naintaintar nga agpaay kenkuana iti rabaw ti pangatepan.)
7 Ket kinamat ida dagiti lallaki iti turong ti Jordan kadagiti pagballasiwan,+ ket inrikepda a dagus ti ruangan kalpasan a nakaruaren dagidiay kumamkamat kadakuada.
8 No maipapan kadagitoy, sakbay a makaiddada, isu immuli a napan kadakuada iti pangatepan.
9 Ket kinunana kadagiti lallaki: “Ammok a ni Jehova sigurado nga itednanto kadakayo ti daga,+ ket ti panagaliaw kadakayo immapay kadakami,+ ket amin dagiti agnanaed iti daga kimmapuyda gapu kadakayo.+
10 Ta nangngegmi no kasano a pinagmaga ni Jehova ti dandanum ti Nalabaga a Baybay manipud sanguananyo idi rimmuarkayo manipud Egipto,+ ken no ania ti inaramidyo iti dua nga ari dagiti Amoreo nga adda iti ballasiw ti Jordan, awan sabali, da Sihon+ ken Og,+ isuda nga impaayyo iti pannakadadael.+
11 Idi mangngegmi dayta, iti kasta nangrugi a marunaw ti puspusomi,+ ket awan pay timmaud nga espiritu iti asinoman gapu kadakayo,+ ta ni Jehova a Diosyo ket Dios iti langlangit sadi ngato ken iti daga ditoy baba.+
12 Ket ita, pangngaasiyo, isapatayo kaniak babaen ken Jehova+ a, gapu ta winatwatko maipaay kadakayo ti naayat a kinamanangngaasi, sigurado a watwatenyonto met ti naayat a kinamanangngaasi maipaay iti sangakabbalayan ni amak,+ ket masapul nga ikkandak iti mapagpiaran a pagilasinan.+
13 Ket taginayonenyonto a sibibiag ni amak+ ken ni inak ken ti kakabsatko a lallaki ken ti kakabsatko a babbai ken dagiti amin a kukuada, ket ispalenyonto dagiti kararuami manipud ken patay.”+
14 Iti kasta kinuna kenkuana dagiti lallaki: “Dagiti kararuami ti matay imbes a dakayo!+ No saanyonto nga ibagbaga ti maipapan iti daytoy banag a maipanggep kadakami, mapasamakto met nga inton ited kadakami ni Jehova ti daga, sigurado a watwatenminto met maipaay kadakayo ti naayat a kinamanangngaasi ken kinamapagpiaran.”+
15 Kalpasan dayta pinaulogna ida iti tawa babaen iti tali, ta ti balayna adda iti maysa a sikigan ti pader, ket agnanaed iti rabaw ti pader.+
16 Ket kinunana kadakuada: “Inkayo iti nakabambantay a rehion, tapno saandakayo a makamakam dagidiay kumamkamat; ket masapul nga agtalinaedkayo a silelemmeng sadiay iti tallo nga aldaw, agingga a makasubli dagidiay kumamkamat, ket kalpasanna mabalinyon ti mapan iti bukodyo a turong.”
17 Kalpasanna kinuna kenkuana dagiti lallaki: “Siwayawayakami iti pannakabasol maipapan iti daytoy sapatam a pinaisapatam kadakami.+
18 Adtoy! Umaykami iti daga. Daytoy a tali nga eskarlata a linabag igalutmo iti tawa a nangpaulogam kadakami, ket ni amam ken ni inam ken ti kakabsatmo ken ti isuamin a sangakabbalayan ni amam ummongem kenka iti balay.+
19 Ket mapasamakto nga asinoman a rummuar kadagiti ruangan ti balaymo a mapan iti nawayang,+ ti darana maiparabawto iti mismo nga ulona, ket siwayawayakamto iti pannakabasol; ket tunggal maysa a makipagtalinaed kenka iti balay, ti darana addanto kadagiti ulomi no adda ima a mangsagid kenkuana.
20 Ket no ipadamagmo daytoy banag a maipanggep kadakami,+ kasta met a nawayawayaankamton iti pannakabasol maipapan iti daytoy a sapata a pinaisapatam kadakami.”
21 Iti daytoy kinunana: “Maitunos kadagiti saoyo maaramid koma a kasta.”
Gapuna pinalubosanna ida, ket napanda iti dalanda. Kalpasan dayta inggalutna ti tali nga eskarlata iti tawa.
22 Iti kasta napanda ket dimtengda iti nakabambantay a rehion ket nagnanaedda sadiay iti tallo nga aldaw, agingga a nakasublin dagiti kumamkamat. Ita dagiti kumamkamat sinapsapulda ida iti tunggal dalan, ket saanda a nasarakan ida.
23 Ket ti dua a lallaki simmalogda manen manipud iti nakabambantay a rehion ken bimmallasiwda ket dimtengda ken Josue nga anak ni Nun, ket rinugianda a salaysayen kenkuana ti amin a bambanag a napasamak kadakuada.
24 Ket kinunada ken Josue: “Ni Jehova intedna ti intero a daga iti imatayo.+ Iti kasta dagiti amin nga agnanaed iti daga napakapuyda met gapu kadatayo.”+
