Josue 3:1-17
3 Idin ni Josue bimmangon a nasapa iti bigat, ket isu ken ti amin nga annak ti Israel pimmanawda manipud Sittim+ ket dimtengda agingga iti Jordan; ket binusbosda sadiay ti rabii sakbay a bumallasiwda.
2 Iti kasta naaramid iti ngudo ti tallo nga aldaw+ a dagiti opisial+ limmasatda iti tengnga ti pakarso
3 ket nagbilinda kadagiti umili, a kunkunada: “Apaman a makitayo ti lakasa ti tulag ni Jehova a Diosyo, ken ti papadi, dagiti Levita, a mangaw-awit iti dayta,+ iti kasta dakayo pumanawkayto iti lugaryo, ket masapul a surotenyo,
4 —isuna laeng ta addanto koma pagbaetanyo iti dayta nga agarup dua ribu a kasiko ti rukodna;+ dikay umasideg iti dayta—tapno maammuanyo ti dalan a rumbeng a papananyo, ta saankayo pay a limmaslasat idi iti dayta a dalan.”
5 Kinuna itan ni Josue kadagiti umili: “Santipikarenyo+ ti bagbagiyo, ta inton bigat mangaramid ni Jehova iti nakaskasdaaw a bambanag iti tengngayo.”+
6 Idin kinuna ni Josue iti papadi: “Alaenyo ti lakasa ti tulag+ ket lumasatkayo iti sanguanan dagiti umili.” Gapuna innalada ti lakasa ti tulag ket napanda iti sanguanan dagiti umili.
7 Ket ni Jehova kinunana ken Josue: “Iti daytoy nga aldaw rugiankanto a pagbalinen a naindaklan iti imatang ti intero nga Israel,+ tapno maammuanda a kas iti kaaddak idi ken Moises+ addaakto kenka.+
8 Ket sika—bilinemto+ ti papadi a mangaw-awit iti lakasa ti tulag, a kunaem, ‘Apaman a makagtengkayo agingga iti igid ti dandanum ti Jordan, rebbeng nga agintekkayo+ iti Jordan.’”
9 Ket kinuna ni Josue iti annak ti Israel: “Umasidegkayo ditoy ket imdenganyo ti sasao ni Jehova a Diosyo.”
10 Kalpasan dayta kinuna ni Josue: “Babaen iti daytoy maammuanyonto a maysa a sibibiag a Dios ti adda iti tengngayo,+ ket di bumurong a pagtalawennanto iti sanguananyo dagiti Canaanita ken dagiti Heteo ken dagiti Heveo ken dagiti Perizeo ken dagiti Girgaseo ken dagiti Amoreo ken dagiti Jebuseo.+
11 Adtoy! Ti lakasa ti tulag ti Apo iti intero a daga lumaslasat iti sanguananyo nga agturong iti Jordan.
12 Ket ita mangalakayo maipaay kadakayo iti sangapulo ket dua a lallaki manipud kadagiti tribu ti Israel, maysa a lalaki maipaay iti tunggal tribu.+
13 Ket mapasamakto nga iti kanito a dagiti dapan ti saksaka ti papadi a mangaw-awit iti lakasa ni Jehova, ti Apo iti intero a daga, agsaad iti dandanum ti Jordan, magessatto ti dandanum ti Jordan, ti dandanum a sumalsalog manipud surong, ket agintekdanto kas maysa a puttot.”+
14 Ket naaramid nga idi a pimmanaw dagiti umili kadagiti toldada sakbay unay a ballasiwenda ti Jordan, a ti papadi aw-awitenda ti lakasa+ ti tulag iti sanguanan dagiti umili,
15 ken iti kanito a dagiti agaw-awit iti Lakasa dimtengda agingga iti Jordan ket ti saksaka ti papadi a mangaw-awit iti Lakasa naitapogda iti igid ti dandanum (ita ti Jordan agliplippias iti amin nga ig-igidna+ iti amin nga al-aldaw ti panagani),
16 idin nangrugi nga agintek ti dandanum a sumalsalog manipud surong. Timmakderda a kas maysa a puttot+ iti adayo unay idiay Adan, ti siudad iti bangir ti Zaretan,+ bayat a dagidiay sumalsalog nga agturong iti baybay ti Araba, ti Asin a Baybay,+ naibusda. Nagessatda, ket bimmallasiw dagiti umili iti sanguanan ti Jerico.
17 Kabayatanna ti papadi a mangaw-awit iti lakasa ti tulag ni Jehova nagtalinaedda a sitatakder a di aggargaraw iti namaga a daga+ iti tengnga ti Jordan bayat a bumalballasiw idi ti intero nga Israel iti namaga a daga,+ agingga a ti intero a nasion nalpasen a bimmallasiw iti Jordan.
