Nehemias 4:1-23
4 Ita naaramid nga, apaman a nangngeg ni Sanballat+ a bangbangonenmi manen ti pader, nakaunget+ ken nagrurod iti kasta unay, ket inuy-uyawna+ dagiti Judio.
2 Ket rinugianna a kunaen iti sanguanan ti kakabsatna+ ken ti puersa militar ti Samaria, wen, rinugianna a kunaen: “Ania ti ar-aramiden dagiti nakapsut a Judio? Agpannuraydanto kadi iti bagbagida? Agisakripisiodanto kadi?+ Malpasdanto kadi iti maysa nga aldaw? Biagendanto kadi dagiti bato manipud kadagiti bunton ti natapuk a basura+ idinto ta napuoran dagita?”
3 Ita ni Tobias+ nga Ammonita+ adda idi iti sibayna, ket kinunana: “Uray ti bangbangonenda, no ti maysa a sora+ ulienna dayta, sigurado a rebbaenna ti paderda a batbato.”
4 Denggem,+ O Diosmi, ta nagbalinkami a puntiria ti panangumsi;+ ket ti panangumsida+ pagsubliem iti rabaw ti bukodda nga ulo, ket itedmo ida iti pannakasamsam iti daga ti pannakakautibo.
5 Ket dika abbongan ti biddutda+ ken ti basolda manipud sanguanam. Saan koma a mapunas dayta, ta nakaaramidda iti makaparurod maibusor kadagiti managibangon.
6 Gapuna intultuloymi a binangon ti pader, ket ti intero a pader napagsisilpo agingga iti kagudua ti kangatona, ket nagtultuloy a maaddaan dagiti umili iti maysa a puso maipaay iti panagtrabaho.+
7 Ita naaramid nga, apaman a nangngeg ni Sanballat+ ken ni Tobias+ ken dagiti Arabiano+ ken dagiti Ammonita+ ken dagiti Asdodita+ a nagtultuloy ti pannakatarimaan dagiti pader ti Jerusalem, ta nangrugi a masullatan dagiti giwang, nakaungetda unay.
8 Ket isuda amin rinugianda ti agkukumplot+ a sangsangkamaysa nga umay ken makirupak iti Jerusalem ken mangparnuay iti pannakariribukko.
9 Ngem nagkararagkami+ iti Diosmi ket nangisaadkami iti guardia maibusor kadakuada iti aldaw ken rabii maigapu kadakuada.
10 Ket rinugian a kunaen ti Juda: “Ti bileg dagiti agbumbunag iti awit+ nagtibkol, ket nakaad-adu ti basura;+ ket dakami saanmi a kabaelan ti agbangon iti pader.”
11 Mainayon pay, kinunkuna dagiti kabusormi: “Saandanto a maammuan+ ken saandanto a makita agingga a dumtengtayo iti mismo a tengngada, ket sigurado a papatayentayto ida ken pasardengentayo ti trabaho.”
12 Ket naaramid a, kaanoman a sumrek dagiti Judio nga agnanaed iti asidegda, kinunada kadakami iti maminsangapulo a daras: “[Sumang-atdanto] manipud kadagiti amin a lugar a sadiay agsublikayto kadakami.”
13 Gapuna nangisaadak iti lallaki kadagiti kababaan a paset ti lugar iti likudan ti pader kadagiti nalayang a lugar, ket insaadko dagiti umili sigun kadagiti pamilia buyogen dagiti kampilanda,+ dagiti gayangda+ ken dagiti baida.
14 Idi nakitak ti butengda dagus a timmakderak ket kinunak kadagiti natan-ok+ ken kadagiti diputado nga agtuturay+ ken iti dadduma pay kadagiti umili: “Dikay agbuteng+ maigapu kadakuada. Ni Jehova a naindaklan+ ken Daydiay nakaam-amak+ salimetmetanyo iti panunotyo; ket makirupakkayo maipaay iti kakabsatyo,+ iti annakyo a lallaki ken iti annakyo a babbai, iti assawayo ken kadagiti pagtaenganyo.”
15 Ita naaramid nga apaman a nangngeg dagiti kabusormi a naammuanmi dayta, iti kasta ti pudno a Dios pinaayna ti pammatigmaanda+ ket nagsublikami amin iti pader, tunggal maysa iti trabahona,
16 wen, naaramid a manipud iti dayta nga aldaw ken agpatpatuloy kagudua kadagiti agtutubok a lallaki+ ti aktibo iti trabaho ket kagudua kadakuada ti siiiggem kadagiti gayang, kadagiti kalasag ken kadagiti bai ken kadagiti nagsasaip a kabal;+ ket dagiti prinsipe+ addada idi iti likudan ti intero a balay ti Juda.
17 No maipapan kadagiti managibangon iti pader ken kadagidiay mangaw-awit iti dadagsen dagiti agibakbaklay iti awit, tunggal maysa ti aktibo idi iti trabaho buyogen ti maysa nga imana bayat a ti sabali nga ima+ siiiggem iti pika.+
18 Ket dagiti managibangon sibabarikesda, tunggal maysa iti kampilanna iti padingpadingna,+ bayat nga agibangbangonda;+ ket daydiay mangpuyot iti tangguyob+ adda idi iti sibayko.
19 Ket kinunak kadagiti natan-ok ken kadagiti diputado nga agtuturay+ ken iti dadduma pay kadagiti umili: “Ti trabaho dakkel ken nakalawlawa, ket naiwarastayo nga agaaddayo iti maysa ken maysa iti rabaw ti pader.
20 Iti lugar a pakangngeganyo iti uni ti tangguyob, sadiay ti paguummonganyonto a tumipon kadakami. Ti met laeng Diostayo makirupakto maipaay kadatayo.”+
21 Bayat nga aktibokami idi iti trabaho, ti sabali a kagudua kadakuada siiiggemda met kadagiti gayang, manipud iti panagpangato ti bannawag agingga iti iruruar dagiti bituen.
22 Malaksid iti dayta, iti daydi a tiempo kinunak kadagiti umili: “Dagiti lallaki busbosenda koma ti rabii, tunggal maysa agraman ti katulonganna, iti tengnga ti Jerusalem,+ ket masapul nga agbalinda a guardiami iti rabii ken trabahador iti aldaw.”
23 No maipapan kaniak+ ken iti kakabsatko+ ken kadagiti katulongak+ ken kadagiti lallaki ti guardia+ nga adda iti likudak, saanmi idi nga inuksob dagiti kawesmi, a tunggal maysa adda ti pikana+ iti makannawan nga imana.
