Nehemias 6:1-19
6 Ket naaramid nga, apaman a naibaga kada Sanballat+ ken Tobias+ ken ni Gesem+ nga Arabiano+ ken iti dadduma pay kadagiti kabusormi a nabangonko manen ti pader+ ket awan ti nabati iti dayta a maysa a giwang (nupay dagiti met laeng ridaw+ saanko a naisaad kadagiti ruangan agingga iti dayta a tiempo),+
2 da Sanballat ken Gesem dagus a nagbaonda kaniak, a kunkunada: “Umayka, ket babaen ti tulagan agsasaraktayo+ a sangsangkamaysa kadagiti purok ti ginget a tanap ti Ono.”+ Ngem ganggandatenda idi a dangrandak.+
3 Gapuna nangibaonak kadagiti mensahero a mapan kadakuada,+ a kinunak: “Dakkel a trabaho ti ar-aramidek,+ ket saanko a mabalin ti sumalog. Apay koma nga agsardeng ti trabaho bayat nga umikkatak iti dayta ket kasapulan a sumalogak a mapan kadakayo?”+
4 Nupay kasta, uppat a daras nga impatulodda kaniak ti isu met laeng a sao, ket simmungsungbatak kadakuada iti isu met laeng a sao.
5 Kamaudiananna ni Sanballat+ imbaonna kaniak ti katulonganna buyogen ti isu met laeng a sao iti maikalima a daras, nga addaan iti silulukat a surat iti imana.
6 Adda a naisurat iti dayta: “Iti tengnga dagiti nasion nangngeganen, ket ni Gesem+ kunkunaenna dayta, a sika ken dagiti Judio ganggandatenyo ti agrebelde.+ Dayta ti makagapu a bangbangonenyo ti pader; ket agbalbalinka nga ari kadakuada,+ sigun kadagitoy a sasao.
7 Ket addada pay mammadto a dinutokam nga agpukkaw maipapan kenka iti intero a Jerusalem, a kunkunada, ‘Adda maysa nga ari iti Juda!’ Ket ita ti bambanag a kas kadagitoy maibaganto iti ari. Gapuna ita umayka, ket agiinnumantayo a sangsangkamaysa.”+
8 Nupay kasta, nagbaonak kenkuana, a kinunak: “Ti bambanag a kas iti sasawem saan a napasamak,+ no di ket manipud bukodmo a puso a parpartuatem ida.”+
9 Ta isuda amin padpadasendakami idi a pagbutngen, a kunkunada: “Dagiti imada+ agsalupaypayto manipud iti trabaho iti kasta saanto a maaramid dayta.” Ngem ita papigsaem dagiti imak.+
10 Ket siak simrekak iti balay ni Semaias nga anak ni Delaias nga anak ni Mehetabel bayat a sipupupok.+ Ket kinunana: “Agsarakta babaen ti tulagan+ idiay balay ti pudno a Dios, iti uneg ti templo,+ ket serraanta dagiti ruangan ti templo; ta umayda a mangpapatay kenka, iti mismo a rabii+ umayda a mangpapatay kenka.”
11 Ngem kinunak: “Rebbeng aya nga agtaray ti maysa a lalaki a kas kaniak?+ Ket siasino ti adda a kas kaniak a makabalin a sumrek iti templo ket agbiag?+ Saanakto a sumrek!”
12 Gapuna nagusisaak, ket adtoy saan a ti Dios+ ti nangibaon kenkuana, no di ket sinaona+ daytoy a padto maibusor kaniak yantangay da met laeng Tobias ken Sanballat+ ti nangtangdan kenkuana.+
13 Iti daytoy a rason isu natangdanan+ tapno agbutengak+ koma ket aramidek ti kasta, ket pudno unay nga agbasolakto+ ken pudno unay nga ikutanda dayta kas dakes a pakasarsaritaan,+ tapno maumsidak.+
14 Lagipem,+ O Diosko, da Tobias+ ken Sanballat, maitunos kadagitoy nga ar-aramid ti tunggal maysa, ken kasta met ni Noadias a mammadto a babai+ ken ti dadduma pay kadagiti mammadto nga agtultuloy a mangpadpadas a mamagbuteng kaniak.
15 Idi agangay nairingpasen ti pader+ iti maikaduapulo ket lima nga aldaw ti Elul, iti limapulo ket dua nga aldaw.
16 Ket naaramid nga, apaman nga amin dagiti kabusormi+ nangngegda dayta ket amin dagiti nasion nga adda iti aglikmutmi nakitada dayta, dagus a nabainanda iti kasta unay kadagiti bukodda a mata, ket naammuanda a ti Diosmi+ ti nagtaudan ti pannakaaramid daytoy a trabaho.
17 Kadagidi met nga aldaw pinaadu dagiti natan-ok+ iti Juda dagiti suratda a mapan ken Tobias+ ken dagiti surat ni Tobias nga um-umay kadakuada.
18 Ta adu idiay Juda ti nagsapata kenkuana, ta isu ket manugang ni Secanias nga anak ni Arah;+ ket ni Jehohanan nga anakna innalana a mismo ti anak a babai ni Mesullam+ nga anak ni Berekias.
19 Kasta met, ti naimbag a bambanag maipapan kenkuana nagtultuloy a sinaoda iti sanguanak.+ Ket ti bukodko a sasao nagtultuloy nga impanda kenkuana. Adda idi sursurat nga impatulod ni Tobias tapno pagbutngennak.+
