Proverbio 14:1-35
14 Ti pudpudno a masirib a babai binangonna ti balayna,+ ngem daydiay maag rebbaenna dayta babaen kadagiti bukodna nga ima.+
2 Daydiay magmagna iti kinapalungdona agbuteng ken Jehova,+ ngem daydiay nakillo iti daldalanna Isu umsienna.+
3 Ti pagbaut ti kinatangsit adda iti ngiwat daydiay maag,+ ngem saluadanto ida dagiti mismo a bibig dagidiay masirib.+
4 No sadino nga awan ti bakbaka nadalus ti kulluong, ngem naruay ti apit gapu iti bileg ti maysa a toro.
5 Ti matalek a saksi isu daydiay saanto nga agulbod,+ ngem ti ulbod a saksi agyesngaw kadagiti kinaulbod laeng.+
6 Ti managuy-uyaw inkagumaanna ti makasarak iti sirib, ket awan; ngem iti daydiay mannakaawat nalaka a banag ti pannakaammo.+
7 Pumanawka iti sanguanan ti maag a tao,+ ta sigurado a saanmonto nga imutektekan dagiti bibig ti pannakaammo.+
8 Ti sirib ti nasaldet isu ti panangitarus iti dalanna,+ ngem ti kinamaag dagidiay maag panangallilaw.+
9 Maag dagidiay manguyaw iti pannakabasol,+ ngem kadagidiay napalungdo adda panagtutunos.+
10 Ti puso ammona ti kinapait ti kararua ti maysa,+ ket iti panagrag-ona awanto ti ganggannaet a makibiang.
11 Ti balay dagiti nadangkes a tattao matalipuposto,+ ngem ti tolda dagidiay napalungdo rumangpayanto.+
12 Adda dalan a nalinteg iti sanguanan ti maysa a tao,+ ngem dagiti dalan ni patay isuda ti tungpal dayta kalpasanna.+
13 Uray iti katawa mabalin nga agpapaut-ot ti puso;+ ket ladingit ti pagtungpalan ti panagrag-o.+
14 Daydiay nga iti pusona awanan iti pammati mapnekto kadagiti ibunga ti bukodna a daldalan,+ ngem ti naimbag a tao mapnek kadagiti ibunga dagiti pannakilangenna.+
15 Ti asinoman nga awanan kapadasan maaddaan pammati iti tunggal sao,+ ngem daydiay nasaldet utobenna dagiti addangna.+
16 Daydiay masirib agbuteng ket umadayo iti kinadakes,+ ngem ti maag agrungsot ken agbalin a managtalek iti bagi.+
17 Daydiay nadaras nga agunget makaaramidto iti kinamaag,+ ngem ti tao nga addaan kadagiti pannakabael nga agpanunot magurgura.+
18 Dagidiay awanan kapadasan sigurado a tagikuaendanto ti kinamaag,+ ngem dagidiay nasaldet agdalungdongdanto iti pannakaammo.+
19 Dagiti dakes a tattao kasapulanto nga agruknoyda iti sanguanan dagidiay naimbag,+ ken dagiti nadangkes a tattao iti ruruangan daydiay nalinteg.
20 Daydiay bassitan iti sanikua puntiria ti pananggura uray ti padana a tao,+ ngem adu ti gagayyem ti nabaknang a tao.+
21 Daydiay mangumsi iti mismo a padana a tao agbasol,+ ngem naragsak daydiay mangipakita iti pabor kadagidiay naparigatan.+
22 Saan aya nga agallaallanto dagidiay mangigakgakat iti pannakadangran?+ Ngem adda naayat a kinamanangngaasi ken kinapudno no maipapan kadagidiay mangigakgakat iti naimbag.+
23 Babaen iti tunggal kita ti panagbannog maadda ti pagsayaatan,+ ngem ti laeng sao dagiti bibig mamagannayas iti panagkasapulan.
24 Ti korona dagiti masirib isu ti kinabaknangda; ti kinamaag dagidiay maag ket kinamaag.+
25 Ti pudno a saksi mangispal kadagiti kararua,+ ngem daydiay manangallilaw agyesngaw kadagiti kinaulbod laeng.+
26 Iti panagbuteng ken Jehova adda napigsa a panagtalek,+ ket maipaay iti annakna addanto ti maysa a kamang.+
27 Ti panagbuteng ken Jehova maysa nga ubbog ti biag,+ tapno umadayo kadagiti silo ni patay.+
28 Iti kinaadu dagiti tattao adda arkos ti maysa nga ari,+ ngem iti kinakurang ti populasion isu ti pannakarba ti nangato nga opisial.+
29 Daydiay nabannayat nga agunget naruay iti panangilasin,+ ngem ti maysa a di makaanus itantan-okna ti kinamaag.+
30 Ti natalinaay a puso isu ti biag ti nainlasagan a bagi,+ ngem ti imon ket kinarinuker kadagiti tulang.+
31 Ti mangsasaur iti daydiay nanumo inumsina ti Nangaramid kenkuana,+ ngem ti mangipakpakita ti pabor iti daydiay napanglaw Isu padayagenna.+
32 Gapu iti kinadakesna maimamegto ti nadangkes,+ ngem ti nalinteg makasarakto iti pagkamangan iti kinatarnawna.+
33 Iti puso daydiay mannakaawat sadiay nga agsaad ti sirib,+ ket iti tengnga dagidiay maag maammuan dayta.
34 Kinalinteg ti mangitan-ok iti maysa a nasion,+ ngem ti basol ket banag a nakababain kadagiti nasional a bunggoy.+
35 Ti pakaragsakan ti maysa nga ari adda iti adipen nga agtigtignay a buyogen ti pannakatarus,+ ngem ti rungsotna maadda iti daydiay agtigtignay a nakababain.+
