Proverbio 21:1-31
21 Ti puso ti maysa nga ari ket kas barbaresbes ti danum iti ima ni Jehova.+ Iti sadinoman a pakaragsakanna, iturongna dayta.+
2 Tunggal dalan ti maysa a tao nalinteg kadagiti bukodna a mata,+ ngem ni Jehova tingitingenna dagiti puso.+
3 Ti panagaramid iti kinalinteg ken panangukom kaykayat ni Jehova ngem iti sakripisio.+
4 Dagiti natangsit a mata ken ti napangas a puso,+ ti pagsilawan dagidiay nadangkes, ket basol.+
5 Dagiti gakat daydiay nasaet sigurado a mangipaay iti pagsayaatan,+ ngem tunggal maysa a nadarasudos sigurado nga agturong iti panagkasapulan.+
6 Ti pananggun-od kadagiti gameng babaen iti ulbod a dila ket sang-aw a maipalais,+ no iti kasasaad dagidiay agsapsapul iti ipapatay.+
7 Ti mismo a panangagaw dagidiay nadangkes ulodennanto ida,+ ta nagkedkedda a mangaramid iti kinahustisia.+
8 Ti maysa a tao, ti mismo a ganggannaet, ket nakillo ti dalanna;+ ngem daydiay nasin-aw ket nalinteg ti aramidna.+
9 Nasaysayaat ti agnaed iti rabaw ti nagsulian ti atep+ ngem ti makipagnaed iti mannakirupir nga asawa a babai, nupay addada iti maymaysa a balay.+
10 Ti mismo a kararua daydiay nadangkes ginartemanna ti dakes;+ ti kaduana saanto a maipakitaan iti pabor kadagiti matana.+
11 Babaen ti panangipatay iti multa iti managuy-uyaw agbalin a masirib daydiay awanan kapadasan;+ ket babaen ti panangipaay ti maysa iti pannakatarus iti masirib a tao isu makagun-od iti pannakaammo.+
12 Daydiay Nalinteg us-usigenna ti balay daydiay nadangkes,+ nga iluodna dagidiay nadangkes nga agturong iti pannakadidigrada.+
13 No maipapan iti asinoman a mangsullat iti lapayagna iti ikkis ti panagreklamo daydiay nanumo,+ isu umawagto met ket saan a masungbatan.+
14 Ti sagut a naited a sililimed parukmaenna ti unget;+ ket ti pasuksok iti saklot,+ ti napigsa a pungtot.
15 Maysa a panagrag-o maipaay iti daydiay nalinteg ti panagaramid iti kinahustisia,+ ngem adda banag a nakaam-ames maipaay kadagidiay agar-aramid iti makapasakit.+
16 No maipapan iti tao nga agallaalla manipud iti dalan ti pannakatarus,+ agsaadto iti mismo a kongregasion dagidiay inutil ken patay.+
17 Daydiay agayat iti panagraragsak maysanto a tao nga agkasapulan;+ daydiay agayat iti arak ken lana saanto a makagun-od iti kinabaknang.+
18 Ti nadangkes maysa a subbot maipaay iti daydiay nalinteg;+ ket daydiay makilanglangen a sigugulib alaenna ti lugar dagidiay napalungdo.+
19 Nasaysayaat ti agnaed iti let-ang a daga ngem ti makipagnaed iti mannakirupir nga asawa a babai a napakuyogan iti panagluksaw.+
20 Ti matarigagayan a gameng ken lana addada iti pagyanan daydiay masirib,+ ngem ti tao a maag alun-onennanto dayta.+
21 Daydiay mangsurot iti kinalinteg+ ken naayat a kinamanangngaasi masarakannanto ti biag, kinalinteg ken dayag.+
22 Ti maysa a masirib kinalay-atna uray ti siudad dagiti nabileg a lallaki, tapno maipababana ti pigsa ti pagkammatalkan dayta.+
23 Daydiay mangsalsaluad iti ngiwatna ken dilana salsaluadanna ti kararuana kadagiti rigat.+
24 Nadursok, napalangguad a pangas isu ti nagan daydiay nga agtigtignay buyogen ti rungsot ti kinadursok.+
25 Ti mismo a panaggartem daydiay nasadut isunto ti mangpapatay kenkuana, ta dagiti imana nagkedkedda nga agtrabaho.+
26 Iti intero nga aldaw impakitana a sigagagar nga aggargartem, ngem daydiay nalinteg mangted ket awan igawidna.+
27 Ti sakripisio dagidiay nadangkes ket nakarimrimon.+ Anian nga ad-adda pay no ti maysa iyegna dayta a napakuyogan iti nalulok a kababalin.+
28 Ti naulbod a saksi mapukawto,+ ngem ti tao nga umim-imdeng agsaonto uray iti agnanayon.+
29 Ti nadangkes a tao pinaturedna ti rupana,+ ngem ti napalungdo isu daydiay mangipasdekto a sititibker iti daldalanna.+
30 Awan ti sirib, wenno uray aniaman a panangilasin, wenno uray aniaman a pammatigmaan a maibusor ken Jehova.+
31 Ti kabalio ket banag a maisagana maipaay iti aldaw ti bakal,+ ngem ti panangisalakan kukua ni Jehova.+
