Proverbio 7:1-27
7 Anakko, salimetmetam ti sasaok,+ ket idulinmo koma kenka dagiti bukodko a bilin.+
2 Salimetmetam dagiti bilinko ket agtultuloyka nga agbiag,+ ken ti lintegko kas iti alintatao+ dagita matam.
3 Igalutmo ida kadagita ramaymo,+ ket isuratmo ida iti tapi ta pusom.+
4 Sawem iti sirib:+ “Sika ti kabsatko a babai”; ket ti met laeng pannakaawat awagam koma iti “Kabagian a babai,”
5 tapno saluadandaka iti babai a sangsangaili,+ iti ganggannaet a nangpalamuyot iti bukodna a sasao.+
6 Ta iti tawa ti balayko, iti barandiliasko+ timmannawagak,
7 tapno maimatangak dagidiay awanan kapadasan.+ Iti tengnga ti annak interesadoak idi a makailasin iti maysa nga agtutubo a lalaki nga awanan puso,+
8 a lumablabas iti kalsada iti asideg ti nagsulianna, ket iti dalan nga agturong iti balayna isu agmartsa,+
9 iti apagriwet, iti sardam ti aldaw,+ iti iyaadani ti rabii ken ti daguyemyem.
10 Ket, adtoy! adda idi maysa a babai a sumabet kenkuana, addaan iti kawes ti balangkantis+ ken kinasikap ti puso.
11 Isu naariwawa ken nasungit.+ Iti balayna saan nga agtataeng dagiti sakana.+
12 Ita addan iti ruar, ita addan kadagiti publiko a plasa,+ ket agpadpadaan iti asideg ti tunggal nagsulian.+
13 Ket isu ginammatanna ken inagepanna.+ Pinaturedna ti rupana, ket rugianna a kunaen kenkuana:
14 “Naiparebbeng kaniak dagiti pakikaykaysa a sakripisio.+ Ita nga aldaw tinungpalkon dagiti karik.+
15 Dayta ti makagapu a rimmuarak a sumabet kenka, a mangsapul ita rupam, tapno masarakanka koma.
16 Inarkosak ti iddak kadagiti pagabbong, iti aduan maris a bambanag, lienso ti Egipto.+
17 Winarsiak ti pagiddaak iti mirra, aloe ken kanela.+
18 Umayka, uminumta nga agpennek iti ayat agingga iti bigat; tagiragsakenta ti maysa ken maysa buyogen dagiti ebkas ti ayat.+
19 Ta ti asawa a lalaki awan idiay balayna; napan nagdaliasat iti adayo.+
20 Nangitugot iti sangasupot a kuarta iti imana. Umayto iti balayna iti aldaw ti kabus.”
21 Isu inyaw-awanna babaen iti kinaruay ti panangguyugoyna.+ Sinulisogna babaen iti kinalamuyot dagiti bibigna.+
22 Pagammuan ta isu sumurot kenkuana,+ kas iti toro nga agturong iti mismo a pannakaparti, ken kasla no nagriliosan maipaay iti pannakadisiplina ti maag a tao,
23 agingga a ti dalemna pisien ti maysa a pana,+ kas iti panagganat ti maysa a tumatayab nga agturong iti silo,+ ket saanna nga ammo a nairaman ti mismo a kararuana.+
24 Ket ita, O annak, umimdengkayo kaniak ket ipangagyo ti sasao ti ngiwatko.+
25 Saan koma a sumiasi ta pusom nga agturong iti daldalanna. Dika agallaalla kadagiti danana.+
26 Ta adu dagiti impasagna a napapatay,+ ket amin dagidiay napapatay babaen kenkuana nakaad-aduda.+
27 Ti balayna isu dagiti dalan nga agturong iti Sheol;+ agpababada kadagiti makin-uneg a siled ni patay.+
