Ruth 3:1-18
3 Kinuna ita kenkuana ni Noemi a katuganganna: “Anakko, saan kadi a rebbeng nga isapulanka iti lugar a paginanaan,+ tapno aglak-amka iti naimbag?
2 Ket ita, saan kadi a kabagianta ni Boaz, a kadagiti agtutubona a babbai ti nakipagtalinaedam?+ Adtoy! Isu agitataep+ iti sebada idiay pagirikan ita a rabii.
3 Ket masapul nga agdiguska ken sapsapuam ta bagim iti lana+ ket ikawesmo dagiti kagaymo + ket sumalogka a mapan iti pagirikan. Dika ipakaammo ti bagim iti lalaki agingga a malpas a mangan ken uminum.
4 Ket mapasamak nga inton agidda, ammuemto met ti lugar a pagiddaanna; ket umaykanto ket lukaisam kadagiti sakana ket agiddaka; ket isu, iti biangna, ibagananto kenka no ania ti rebbeng nga aramidem.”
5 Iti kasta kinunana kenkuana: “Amin a sawem kaniak aramidekto.”
6 Ket simmalog a napan iti pagirikan ket inaramidna ti maitunos iti amin nga imbilin kenkuana ti katuganganna.
7 Kabayatanna nangan ken imminum ni Boaz, ket agragragsak idi ti pusona.+ Kalpasanna napan nagidda iti ungto ti pempen ti bukbukel. Kalpasan dayta isu nagar-arudok nga immay ket linukaisanna kadagiti sakana ket nagidda.
8 Ket naaramid iti tengnga ti rabii a ti lalaki nangrugi nga agpigerger. Gapuna isu nagkukot, ket, adtoy! maysa a babai ti siiidda iti sakaananna!
9 Idin kinunana: “Siasinoka?” Kinunana kalpasanna: “Siak ni Ruth nga adipenmo a babai, ket masapul nga iyarpawmo ta pandilingmo iti adipenmo a babai, ta maysaka a manangsaka.”+
10 Iti kasta kinunana: “Bendituennaka koma ni Jehova,+ anakko. Nasaysayaat ti panangyebkasmo iti naayat a kinamanangngaasim+ iti naud-udi a gundaway ngem iti immuna a gundaway,+ iti saanmo nga isusurot kadagiti agtutubo uray no nanumo wenno nabaknang.
11 Ket ita, anakko, dika agbuteng. Amin a sawem aramidekto maipaay kenka,+ ta tunggal maysa nga adda iti ruangan dagiti kailiak ammona a nakasaysayaatka a babai.+
12 Ket ita nupay maysa a kinapudno a manangsakaak,+ adda pay maysa a manangsaka nga as-asideg ti pannakikabagianna ngem siak.+
13 Agdaguska ditoy ita a rabii, ket mapasamakto iti bigat a no sakaennaka,+ nasayaat! Bay-am nga aramidenna ti panangsaka. Ngem no saan a maragsakan a mangsaka kenka, sakaenkanto ngarud, siak a mismo, kas sibibiag ni Jehova ti kinasigurado dayta.+ Agtalinaedka a siiidda agingga iti bigat.”
14 Ket isu nagtalinaed a siiidda iti sakaananna agingga iti bigat ket kalpasanna bimmangon sakbay a ti asinoman mailasinna ti sabali. Kinunana ita: “Saan koma a maammuan nga immay ti maysa a babai iti pagirikan.”+
15 Ket kinunana: “Iyegmo ta kagay nga adda kenka, ket bistradem.” Gapuna binistradna, ket nangsukat iti innem a kasukat ti sebada ket impaawitna kenkuana, a kalpasan dayta isu napan iti siudad.
16 Ket napan ken katuganganna, a nagkuna ita kenkuana: “Siasinoka, anakko?” Iti kasta imbagana kenkuana ti isuamin nga inaramid kenkuana ti lalaki.
17 Ket kinunana: “Dagitoy innem a kasukat ti sebada intedna kaniak, ta kinunana kaniak, ‘Dika mapan nga ima-ima iti katugangam.’”+
18 Iti kasta kinunana: “Agtugawka a sitatalna, anakko, agingga a maammuam no anianto ti pagbanaganna, ta saanto nga aginana ti lalaki malaksid no nairingpasnan dayta a banag ita nga aldaw.”+
