Zacarias 2:1-13
2 Ket intangadko dagiti matak ket kimmitaak; ket, adtoy! adda maysa a lalaki, ket iti imana adda tali a pagrukod.+
2 Gapuna kinunak: “Sadino ti papanam?”
Kinunana kaniak kalpasanna: “Mapanko rukoden ti Jerusalem, tapno kitaek ti pakadagupan ti kaakabana ken ti pakadagupan ti kaatiddogna.”+
3 Ket, adtoy! rumrummuar idi ti anghel a makisasao kaniak, ket adda sabali pay nga anghel a rumrummuar a sumabet kenkuana.
4 Idin kinunana kenkuana: “Agtarayka, agsaoka iti agtutubo a lalaki nga adda sadiay, a kunaem, ‘“Kas iti nawayang nga aw-away a pagilian mapagnaedanto ti Jerusalem,+ gapu iti kinaadu ti tattao ken naamo nga an-animal iti tengngana.+
5 Ket siak agbalinakto kenkuana,” kuna ni Jehova, “a maysa a pader nga apuy iti intero nga aglikmut,+ ket maysa a dayag ti pagbalinakto iti tengngana.”’”+
6 “Ay dakayo! Ay dakayo! Pumanawkayo, ngarud, iti daga ti amianan,”+ kuna ni Jehova.
“Ta iti turong ti uppat nga angin ti langlangit inwaraskayo a sisasaknap,”+ kuna ni Jehova.
7 “Ay sika, Sion!+ Agtalawka, sika a makipagnanaed iti anak a babai ti Babilonia.+
8 Ta daytoy ti kinuna ni Jehova ti buybuyot, ‘Sumaruno iti dayag+ imbaonnak kadagiti nasion a nangag-agaw kadakayo;+ ta ti mangsagid kadakayo+ sagidenna ti bukel ti matak.+
9 Ta adtoy iwadwadawadko ti imak maibusor kadakuada,+ ket kasapulanto nga agbalinda a samsam kadagiti adipenda.’+ Ket sigurado a maammuanyonto a ni met laeng Jehova ti buybuyot imbaonnak.+
10 “Umkiska a sipipigsa ket agrag-oka, O anak a babai ti Sion;+ ta adtoy umayak,+ ket agtaengakto iti tengngam,”+ kuna ni Jehova.
11 “Ket adu a nasion ti sigurado a maikapponto ken Jehova iti dayta nga aldaw,+ ket pudno nga agbalindanto nga ilik;+ ket agtaengakto iti tengngam.” Ket kasapulanto a maammuam a ni met laeng Jehova ti buybuyot imbaonnak kenka.+
12 Ket ni Jehova sigurado a tagikuaennanto ti Juda kas bingayna iti rabaw ti nasantuan a daga,+ ket piliennanto manen ti Jerusalem.+
13 Agulimekkayo, isuamin a lasag, iti sanguanan ni Jehova,+ ta bimmangon a mismo+ iti nasantuan a pagnaedanna.+
