Zacarias 3:1-10
3 Ket impakitana kaniak ni Josue+ a nangato a padi a sitatakder iti sanguanan ti anghel ni Jehova, ken ni Satanas+ a sitatakder iti makannawanna tapno isu busorenna.+
2 Idin [ti anghel+ ni] Jehova kinunana ken Satanas: “Babalawennaka ni Jehova,+ O Satanas, wen, babalawennaka ni Jehova, isuna a mangpili iti Jerusalem!+ Saan aya a daytoy ket tarikayo a narabsut iti apuy?”+
3 Ita no maipapan ken Josue, sikakawes idi kadagiti narugitan a kawes+ ken sitatakder iti sanguanan ti anghel.
4 Idin simmungbat ket kinunana kadagidiay sitatakder iti sanguananna: “Ikkatenyo kenkuana dagiti narugitan a kawes.” Ket kinunana kenkuana: “Kitaem, pinalabasko kenka ti biddutmo,+ ket makawesanka kadagiti nadaeg a pagan-anay.”+
5 Iti kasta kinunak: “Mangikabilda koma iti nadalus a turbante iti rabaw ti ulona.”+ Ket inkabilda ti nadalus a turbante iti rabaw ti ulona ket kinawesanda kadagiti pagan-anay; ket ti anghel ni Jehova sitatakder idi iti asideg.
6 Ket ti anghel ni Jehova nangrugi a mangsaksi ken Josue, a kunkunana:
7 “Daytoy ti kinuna ni Jehova ti buybuyot, ‘No iti daldalanko ti pagnaamto, ken no ti pagrebbengak ti salimetmetamto,+ iti kasta sikanto met ti mangukom iti balayko+ ken aywanam met dagiti paraanganko; ket sigurado nga ipaaykonto kenka ti siwayawaya nga iyaadani iti tengnga dagitoy a sitatakder iti asideg.’
8 “‘Denggem, pangngaasim, O Josue a nangato a padi, sika ken dagiti kaduam a situtugaw iti sanguanam, ta lallakida nga agserserbi a kas dagiti tanda;+ ta adtoy iyegko ni adipenko+ a Tarubong!+
9 Ta, adtoy! ti bato+ nga insaadko iti sanguanan ni Josue! Iti rabaw ti maysa a bato adda pito a mata.+ Adtoy ikitikitko ti kitikitna,’+ kuna ni Jehova ti buybuyot, ‘ket ikkatekto ti biddut dayta a daga iti maysa nga aldaw.’+
10 “‘Iti dayta nga aldaw,’ kuna ni Jehova ti buybuyot, ‘umawagkayto, tunggal maysa iti sabali, bayat ti kaaddayo iti sirok ti puon ti ubas ken bayat ti kaaddayo iti sirok ti kayo a higos.’”+
