Ti Umuna nga Ar-ari 11:1-43
11 Ngem nagayat ni Ari Solomon iti adu a ganggannaet a babbai+—Moabita,+ Ammonita,+ Edomita, Sidonio,+ ken Heteo+—malaksid pay iti anak a babai ni Faraon.+
2 Naggapuda kadagiti nasion a maipapan kadakuada, imbaga ni Jehova: “Dikay makilaok* kadakuada, ta sigurado nga allukoyenda ti pusoyo nga agserbi kadagiti diosda.”+ Ngem saan nga insina ida ni Solomon no di ket inayatna ida.
3 Naaddaan iti 700 nga assawa a prinsesa ken 300 a sabali pay nga assawa, ket in-inut nga inyadayo dagiti assawana ti pusona.*
4 Idi lakayen ni Solomon,+ intallikud dagiti assawana ti pusona tapno agserbi kadagiti sabali a dios,+ ket saan idi a naan-anay ti pusona* ken Jehova a Diosna a kas iti puso ni David nga amana.
5 Nagdaydayaw ni Solomon ken ni Astoret+ a diosa dagiti Sidonio ken ni Milcom+ a makarimon a dios dagiti Ammonita.
6 Inaramid ni Solomon ti dakes iti imatang ni Jehova, ket saanna a sinurot a naan-anay ni Jehova a kas ken David nga amana.+
7 Nangibangon ni Solomon iti nangato a disso+ para ken Kemos a makarimon a dios ti Moab iti bantay nga adda iti sango ti Jerusalem, ken para ken Molek+ a makarimon a dios dagiti Ammonita.+
8 Kasta ti inaramidna para iti amin a ganggannaet nga assawana a nangidatag kadagiti daton a mangpataud iti asuk para kadagiti diosda.
9 Nakapungtot ni Jehova ken ni Solomon, ta immadayo ti pusona ken Jehova a Dios ti Israel,+ a nagparang kenkuana iti namindua+
10 ken nangpakdaar kenkuana a saan nga agdayaw kadagiti sabali a dios.+ Ngem saan a nagtulnog iti bilin ni Jehova.
11 Iti kasta, kinuna ni Jehova ken ni Solomon: “Gapu ta inaramidmo daytoy ken dimo tinungpal ti tulagko ken dagiti paglintegak kas imbilinko kenka, bingayekto daytoy a pagarian ken itedko iti maysa kadagiti adipenmo.+
12 Ngem saankonto nga aramiden dayta iti kaaldawam maigapu ken David nga amam. Bingayekto dayta iti ima ti anakmo,+
13 ngem saankonto nga ikkaten ti intero a pagarian.+ Maysanto a tribu ti itedko iti anakmo,+ maigapu ken David nga adipenko ken maigapu iti Jerusalem a pinilik.”+
14 Iti kasta, nangpataud ni Jehova iti lalaki a bumusor ken Solomon,+ ni Hadad nga Edomita a kaputotan ti ari ti Edom.+
15 Idi naparmek ni David ti Edom,+ intabon ni Joab a pangulo ti armada dagidiay napapatay, ket inkagumaanna a patayen ti tunggal lalaki idiay Edom.
16 (Ta innem a bulan a nagyan sadiay ni Joab ken ti intero nga Israel agingga a napatayna ti tunggal lalaki idiay Edom.)
17 Ngem nagkamang ni Hadad idiay Egipto agraman ti sumagmamano nga Edomita nga adipen ni amana. Ubing pay idi ni Hadad.
18 Nagrubbuatda ngarud idiay Midian ket nakadanonda idiay Paran.+ Nangikuyogda iti lallaki manipud Paran sa napanda idiay Egipto, ken ni Faraon nga ari ti Egipto. Inikkanna ni Hadad iti balay, rasion a taraon, ken daga.
19 Naragsakan unay ni Faraon ken ni Hadad, ket impaasawana kenkuana ti kabsat ti asawana a ni Tapenes a reyna.*
20 Idi agangay, ti kabsat ni Tapenes ket nangipasngay iti maysa a lalaki, ni Genubat, a pinadakkel* ni Tapenes iti balay ni Faraon. Nagtalinaed ni Genubat iti balay ni Faraon a kadua dagiti annak ni Faraon.
21 Nadamag ni Hadad idiay Egipto a naginanan ni David a kas kadagidi ammana+ ken natayen ni Joab a pangulo ti armada.+ Iti kasta, kinuna ni Hadad ken ni Faraon: “Palubosannak nga agsubli iti dagak.”
22 Ngem kinuna ni Faraon: “Adda kadi saanko a naipaay kenka ta kayatmo ti agsubli iti dagam?” Insungbat ni Hadad: “Awan, ngem palubosannak koma.”
23 Nangpataud ti Dios iti sabali pay a lalaki a bumusor ken Solomon,+ ni Rezon nga anak ni Eliada, a nagtalaw ken apona a Hadadezer+ nga ari ti Zoba.
24 Nangummong ni Rezon kadagiti lallaki ket nagbalin a panguluen ti grupo dagiti tulisan idi inabak* ida ni David.+ Iti kasta, napanda idiay Damasco+ ket nagnaed sadiay ken nagturay idiay Damasco.
25 Nagbalin a kabusor ti Israel iti amin nga aldaw ni Solomon, a nangyeg iti riribuk iti Israel a kas iti inaramid ni Hadad. Kagurgurana ti Israel bayat ti panagturayna idiay Siria.
26 Nagrebelde* met ken Solomon ni Jeroboam+ nga anak ni Nebat nga Efraimita a taga-Zereda, maysa nga opisial ni Solomon.+ Ti nanangna ket ni Zerua, maysa a balo.
27 Nagrebelde iti ari ta imbangon ni Solomon ti Bunton*+ ken sinerraanna ti giwang iti Siudad ni David nga amana.+
28 Makabael idi a lalaki ni Jeroboam. Idi nakita ni Solomon a nagaget a trabahador daytoy nga agtutubo, pinagbalinna a manangaywan+ iti amin nga inkapilitan a panagtrabaho manipud iti sangakabbalayan ni Jose.
29 Bayat dayta a tiempo, rimmuar ni Jeroboam iti Jerusalem, ket nasabatna iti dalan ni propeta Ahias+ a taga-Shilo. Baro idi ti kagay ni Ahias, ket duduada laeng idi iti away.
30 Inikkat ni Ahias ti baro a kagayna sa pinisangna iti 12 a pedaso.
31 Kinunana ken Jeroboam:
“Mangalaka iti 10 a pedaso, ta imbaga ni Jehova a Dios ti Israel: ‘Bingayek ti pagarian manipud iti ima ni Solomon, ket itedkonto kenka ti 10 a tribu.+
32 Ngem agtalinaedto kenkuana ti maysa a tribu+ maigapu ken adipenko a David+ ken maigapu iti Jerusalem, ti siudad a pinilik iti amin a tribu ti Israel.+
33 Aramidek daytoy gapu ta pinanawandak+ ken nagdaydayawda ken ni Astoret a diosa dagiti Sidonio, ni Kemos a dios ti Moab, ken ni Milcom a dios dagiti Ammonita. Saanda a nagtulnog kaniak ken dida inaramid ti umiso iti imatangko ken saanda a tinungpal dagiti paglintegan ken pangngeddengko a kas ken David nga amana.
34 Ngem saankonto nga alaen iti imana ti intero a pagarian, ket pagtalinaedekto kas panguluen iti amin nga aldaw ti panagbiagna, maigapu ken David nga adipenko a pinilik,+ ta nagtulnog kadagiti bilin ken paglintegak.
35 Ngem alaekto iti ima ti anakna ti kinaari ket itedko kenka ti 10 a tribu.+
36 Itedkonto iti anakna ti maysa a tribu, tapno kanayon nga adda lampara ni David nga adipenko iti sanguanak idiay Jerusalem,+ ti siudad a pinilik a pakaikabilan ti naganko.
37 Dutokankanto ket iturayam ti amin a kayatmo.* Agbalinkanto nga ari iti Israel.
38 No tungpalem ti amin nga ibilinko kenka ken agtulnogka kaniak ken aramidem ti umiso iti imatangko babaen ti panangtungpalmo kadagiti paglintegan ken bilinko, kas ken David nga adipenko,+ addaakto met kenka. Ibangonankanto iti agpaut a sangakabbalayan, kas iti imbangonko para ken David,+ ket itedkonto kenka ti Israel.
39 Ipababakto ti kaputotan ni David maigapu iti daytoy,+ ngem saanto a kanayon.’”+
40 Inkagumaan ni Solomon a papatayen ni Jeroboam, ngem nagkamang ni Jeroboam ken ni Sisak+ nga ari ti Egipto,+ ket nagtalinaed idiay Egipto agingga a natay ni Solomon.
41 Ti dadduma pay a pasamak iti pakasaritaan ni Solomon, ti amin nga inaramidna ken ti kinasiribna, ket naisurat iti libro ti pakasaritaan ni Solomon.+
42 Ti kapaut* ti panagturay ni Solomon idiay Jerusalem iti intero nga Israel ket 40 a tawen.
43 Naginana ni Solomon a kas kadagidi ammana, ket naitabon iti Siudad ni David nga amana. Ni Rehoboam+ nga anakna ti simmaruno nga ari.
Footnotes
^ Wenno “makiinnasawa.”
^ Wenno “napigsa ti impluensia kenkuana dagiti assawana.”
^ Wenno “debosionna.”
^ Saan nga agturturay a reyna.
^ Wenno mabalin a, “pinusot.”
^ Lit., “pinapatay.”
^ Lit., “Inngatona ti imana.”
^ Wenno “Millo.” Hebreo a sao a kaipapananna, “gabur.”
^ Wenno “tarigagayan ti kararuam.”
^ Lit., “Dagiti aldaw.”
