Ti Umuna nga Ar-ari 22:1-53
22 Tallo a tawen nga awan ti napasamak a gubat iti nagbaetan ti Siria ken Israel.
2 Iti maikatlo a tawen, napan ni Jehosafat+ nga ari ti Juda iti ari ti Israel.+
3 Kinuna ti ari ti Israel kadagiti adipenna: “Ammoyo kadi a kukuatayo ti Ramot-gilead?+ Ngem ditay agtigtignay a mangala iti dayta iti ari ti Siria.”
4 Kalpasanna, kinunana ken Jehosafat: “Kumuyogkanto kadi kaniak a makigubat idiay Ramot-gilead?” Insungbat ni Jehosafat iti ari ti Israel: “Kumuyogak kenka agraman dagiti tattaok ken dagiti kabaliok.”+
5 Ngem kinuna ni Jehosafat iti ari ti Israel: “Pangngaasim ta agsaludsodka nga umuna+ no ania ti ibaga ni Jehova.”+
6 Iti kasta, inummong ti ari ti Israel dagiti propeta, agarup 400 a lallaki, ket kinunana: “Gubatek kadi ti Ramot-gilead wenno saan?” Insungbatda: “Mapanka, ket pagballigiennakanto ni Jehova.”
7 Kinuna ni Jehosafat: “Awan kadi ditoy ti propeta ni Jehova? Agsaludsodtayo met koma kenkuana.”+
8 Insungbat ti ari ti Israel ken ni Jehosafat: “Adda pay maysa a lalaki a mabalin a pagsaludsodantayo no ania ti ibaga ni Jehova;+ ngem kagurgurak,+ ta awan a pulos ti naimbag nga ipadtona maipapan kaniak, dakes laeng+—ni Mikaias nga anak ni Imla.” Nupay kasta, kinuna ni Jehosafat: “Saan koma a kasta ti ibaga ti ari.”
9 Iti kasta, nangayab ti ari ti Israel iti maysa nga opisial ti palasio ket kinunana: “Darasem, iyegmo ditoy ni Mikaias nga anak ni Imla.”+
10 Nakatugaw idi ti ari ti Israel ken ni Jehosafat nga ari ti Juda iti tronoda a nakasuotda iti bado ti ari. Addada iti pagirikan idiay pagserkan ti ruangan ti Samaria. Agipadpadto idi iti sanguananda ti amin a propeta.+
11 Nangaramid ni Zedekias nga anak ni Kenaana kadagiti sara a landok ket kinunana: “Daytoy ti kinuna ni Jehova, ‘Dagitoyto ti pangsangdom* kadagiti Siriano agingga a maibusmo ida.’”
12 Kasta met laeng ti ipadpadto ti dadduma pay a propeta, nga ibagbagada: “Mapanka idiay Ramot-gilead ket agballigikanto. Itedto dayta kenka ni Jehova.”
13 Inayaban ngarud ti mensahero ni Mikaias, ket kinunana: “Naimbag amin ti imbaga dagiti propeta iti ari. Pangngaasim ta naimbag met ti ibagam a kas kadakuada.”+
14 Ngem kinuna ni Mikaias: “Isapatak iti nagan ti sibibiag a Dios a ni Jehova, ibagakto no ania ti ibaga kaniak ni Jehova.”
15 Napan iti ari ket insaludsod ti ari: “Mikaias, gubatenmi kadi ti Ramot-gilead wenno saan?” Dagus nga insungbatna: “Mapanka ket agballigika. Itedto dayta kenka ni Jehova.”
16 Kinuna kenkuana ti ari: “Mamin-ano a pagsapataenka a kinapudno laeng ti ibagam iti nagan ni Jehova?”
17 Gapuna, insungbatna: “Makitak ti amin nga Israelita a naiwarawara kadagiti bantay,+ kas kadagiti karnero nga awanan iti pastor. Kinuna ni Jehova: ‘Awanan dagitoy iti pangulo. Agsubli koma a sitatalna ti tunggal maysa iti balayna.’”
18 Kinuna ti ari ti Israel ken ni Jehosafat: “Saan aya nga imbagak kenka, ‘Awan a pulos ti naimbag nga ipadtona maipapan kaniak, dakes laeng’?”+
19 Iti kasta, kinuna ni Mikaias: “Denggem ngarud ti kuna ni Jehova: Nakitak ni Jehova a nakatugaw iti tronona+ ken ti intero nga armada ti langit nga agtaktakder iti abayna, iti kannawan ken kannigidna.+
20 Kinuna ni Jehova, ‘Asino ti mangallilaw ken Ahab, tapno mapan makigubat ket matay idiay Ramot-gilead?’ Simmungbat ti maysa nga anghel ket sabali met ti imbaga ti maysa pay nga anghel.
21 Immasideg ti maysa nga espiritu*+ ket nagtakder iti sanguanan ni Jehova sa kinunana, ‘Siak ti mangallilaw.’ Insaludsod ni Jehova, ‘Anianto ti aramidem?’
22 Insungbatna, ‘Mapanak ket mangikabilak iti kinaulbod iti dila ti amin a propetana.’+ Iti kasta, kinuna ti Dios, ‘Sika ti mangallilaw, ket agballigikanto. Mapanka ket aramidem dayta.’
23 Gapuna, pinalubosan ni Jehova ti maysa nga anghel tapno pagsawenna iti ulbod ti amin a propetam,+ ngem impakaammo ni Jehova a madidigrakanto.”+
24 Immasideg ni Zedekias nga anak ni Kenaana ket tinungpana ni Mikaias sa kinunana: “Ibagbagam kadi a pimmanaw kaniak ti espiritu ni Jehova ket agsasaon kenka?”+
25 Insungbat ni Mikaias: “Makitamto dayta inton aldaw nga aglemmengka iti kaunegan a siled.”
26 Kinuna ti ari ti Israel: “Alaem ni Mikaias ket iyawatmo ken Amon a panguluen ti siudad ken ni Joas nga anak ti ari.
27 Ibagam kadakuada, ‘Daytoy ti kinuna ti ari: “Ibaludyo+ daytoy a tao ket bassit laeng ti itedyo kenkuana a tinapay ken danum agingga a makasubliak a sitatalged.”’”
28 Ngem kinuna ni Mikaias: “No makasublika a sitatalged, saan a nagsao kaniak ni Jehova.”+ Imbagana pay: “Laglagipenyo daytoy, dakayo amin.”
29 Nagturong ngarud idiay Ramot-gilead ti ari ti Israel ken ni Jehosafat nga ari ti Juda.+
30 Kinuna ti ari ti Israel ken ni Jehosafat: “Agpammarangakto ken makigubatak, ngem isuotmo ti badom kas ari.” Iti kasta, nagpammarang+ ti ari ti Israel ket nakigubat.
31 Imbilin ti ari ti Siria iti 32 a komander dagiti karuahena:+ “Saankayo a makilaban iti asinoman, soldado wenno opisial, no di laeng iti ari ti Israel.”
32 Imbaga dagiti komander dagiti karuahe idi nakitada ni Jehosafat: “Sigurado nga isu ti ari ti Israel.” Iti kasta, dinarupda ni Jehosafat, ngem nagpatulong.
33 Idi nabigbig dagiti komander dagiti karuahe a saan nga isu ti ari ti Israel, saandan a sinurot.
34 Ngem adda lalaki a nangipaspasarak a nangibiat iti panana, ket napuntaanna ti ari ti Israel iti nagsaipan ti kabalna. Iti kasta, kinuna ti ari iti kumakaruahena: “Agatrasta ket umadayota iti paggugubatan,* ta nakaro ti sugatko.”+
35 Nagmalmalem ti gubat, ket masapul a matulongan nga agtakder ti ari iti karuahe, a nakasango kadagiti Siriano. Nagayus ti darana iti uneg ti karuahe a pakigubat, ket natay idi sumipngeten.+
36 Lumneken ti init idi naipukkaw kadagiti soldado: “Agawidkayon iti siudadyo! Agawidkayon iti dagayo!”+
37 Gapuna, natay ti ari, ket naipan idiay Samaria sa intabonda sadiay.
38 Idi dinalusanda ti karuahe iti igid ti pagdigusan ti Samaria, dinildilan dagiti aso ti darana ket nagdigus sadiay dagiti balangkantis,* kas imbaga ni Jehova.+
39 Ti dadduma pay a pasamak iti pakasaritaan ni Ahab, ti amin nga inaramidna ken ti balay* a marfil+ nga imbangonna ken ti amin a siudad a binangonna, ket naisurat iti libro dagiti pasamak idi tiempo dagiti ari ti Israel.
40 Naginana ni Ahab a kas kadagidi ammana;+ ket ni Ahazias+ nga anakna ti simmaruno nga ari.
41 Ni Jehosafat+ nga anak ni Asa ti nagbalin nga ari iti Juda iti maikapat a tawen ti panagturay ni Ari Ahab ti Israel.
42 Agtawen ni Jehosafat iti 35 idi nagbalin nga ari, ket 25 a tawen a nagturay idiay Jerusalem. Ni Azuba nga anak ni Silhi ti nanangna.
43 Tinuladna ti amin nga inaramid ni Asa+ nga amana. Saan a nagsukir, ket inaramidna no ania ti umiso iti imatang ni Jehova.+ Ngem saan a naikkat dagiti nangato a disso, ket nangipapaay latta sadiay dagiti umili kadagiti daton a mangpataud iti asuk.+
44 Nagtultuloy a natalna ti relasion ni Jehosafat ken ti ari ti Israel.+
45 Ti dadduma pay a pasamak iti pakasaritaan ni Jehosafat, dagiti naisangsangayan a gapuananna ken ti pannakilabanna, ket naisurat iti libro dagiti pasamak idi tiempo dagiti ari ti Juda.
46 Pinapanawna met dagiti lallaki a balangkantis iti templo+ a natedda idi kaaldawan ni Asa nga amana.+
47 Awan idi ti ari idiay Edom,+ no di ket maysa nga opisial ti agak-akem kas ari.+
48 Nangaramid met ni Jehosafat kadagiti barko a Tarsis* nga agala iti balitok+ idiay Ofir, ngem saanda a nakapan ta nadadael dagita idiay Ezion-geber.+
49 Iti daydi a tiempo, kinuna ni Ahazias nga anak ni Ahab ken ni Jehosafat: “Ipalubosmo nga agkuyog nga aglugan kadagiti barko dagiti adipenko ken dagiti adipenmo,” ngem saan a kinayat ni Jehosafat.
50 Idi agangay, naginana ni Jehosafat a kas kadagidi ammana+ ket naitabon iti Siudad ni David nga apongna. Ni Jehoram+ nga anakna ti simmaruno nga ari.
51 Ni Ahazias+ nga anak ni Ahab ket nagbalin nga ari iti Israel idiay Samaria iti maika-17 a tawen ti panagturay ni Ari Jehosafat ti Juda. Dua a tawen a nagturay idiay Israel.
52 Inar-aramidna ti dakes iti imatang ni Jehova ket tinuladna dagiti nagannakna+ ken ti inaramid ni Jeroboam nga anak ni Nebat, a nakaigapuan ti panagbasol ti Israel.+
53 Intultuloyna ti nagserbi ken nagruknoy ken ni Baal+ ket intultuloyna a pinagpungtot ni Jehova a Dios ti Israel,+ kas iti inaramid ni amana.
Footnotes
^ Wenno “pangiduronmo.”
^ Wenno “anghel.”
^ Lit., “kampo.”
^ Wenno mabalin nga, “iti pagdigdigusan dagiti balangkantis, dinildilan dagiti aso ti darana.”
^ Wenno “palasio.”
