Ti Umuna a Cronicas 10:1-14
-
Ipapatay ni Saul ken dagiti annakna (1-14)
10 Makilablaban idi dagiti Filisteo iti Israel. Naglibas dagiti lallaki ti Israel iti sanguanan dagiti Filisteo, ket adu kadakuada ti napapatay idiay Bantay Gilboa.+
2 Kinamat dagiti Filisteo ni Saul ken ti annakna ket pinatayda da Jonatan, Abinadab, ken Malki-shua,+ dagiti annak ni Saul.
3 Nakaro ti pannakilabanda ken Saul, ket idi nabirokan dagiti pumapana, sinugatanda.+
4 Iti kasta, kinuna ni Saul iti paraawit iti kabalna: “Asutem ta espadam ket duyokennak tapno saandak a ranggasan* dagiti di nakugit a lallaki.”+ Ngem saan a kayat ti paraawit iti kabalna, ta kasta unay ti butengna. Isu nga innala ni Saul ti espada sa rinugmaanna dayta.+
5 Idi nakita ti paraawit iti kabalna a natayen ni Saul, rinugmaanna met ti espadana ket natay.
6 Iti kasta, natay ni Saul ken ti tallo nga annakna, agraman ti intero a sangakabbalayanna.+
7 Idi nakita dagiti Israelita nga adda iti tanap* a nagtataray ti amin ken natayen ni Saul ken dagiti annakna, pinanawanda dagiti siudadda ket naglibasda. Kalpasanna, simmangpet dagiti Filisteo ket nagnaedda kadagita.
8 Iti sumaganad nga aldaw, dimteng dagiti Filisteo tapno alaenda ti aruaten dagiti napapatay ket nakitada a natay ni Saul ken ti annakna idiay Bantay Gilboa.+
9 Iti kasta, pinugotanda ken innalada ti kabalna ket impaibagada iti intero a daga dagiti Filisteo nga iwarasda ti damag kadagiti balay dagiti didiosenda+ ken kadagiti tattao.
10 Kalpasanna, inkabilda ti kabalna iti balay* ti diosda ken imbitinda ti ulona iti balay ni Dagon.+
11 Idi nadamag dagiti agnanaed idiay Jabes+ iti Gilead ti amin nga inaramid dagiti Filisteo ken ni Saul,+
12 napan ti amin a mannakigubat ket innalada ti bangkay ni Saul ken dagiti annakna. Insangpetda dagita idiay Jabes ket inkalida dagiti tulangda iti sirok ti dakkel a kayo idiay Jabes,+ sa nagayunarda iti pito nga aldaw.
13 Iti kasta, natay ni Saul gapu ta saan a nagmatalek ken Jehova ken saan a nagtulnog iti sao ni Jehova,+ ken gapu ta nagkonsulta iti espiritista+
14 imbes a ken Jehova. Gapuna, pinatay ti Dios ket intedna ti kinaari ken David nga anak ni Jesse.+
