Ti Umuna a Cronicas 13:1-14
13 Nagkonsulta ni David kadagiti panguluen ti rinibu ken ti ginasut ken iti tunggal lider.+
2 Kalpasanna, kinuna ni David iti intero nga Israel: “No pagayatanyo ken pakaragsakan ni Jehova a Diostayo, paayabantayo ti amin a kakabsattayo iti intero a paset ti Israel ken dagiti papadi ken Levita nga adda kadagiti siudadda+ nga addaan kadagiti pagpastoran ket makikaduada kadatayo.
3 Isublitayo ditoy ti Lakasa+ ti Diostayo.” Ta saanda a naaywanan dayta idi kaaldawan ni Saul.+
4 Immanamong amin a tattao ta ammoda a dayta ti umiso.
5 Gapuna, inummong ni David ti intero nga Israel, manipud iti karayan* ti Egipto agingga idiay Lebo-hamat,*+ tapno alaenda ti Lakasa ti pudno a Dios manipud Kiriat-jearim.+
6 Napan ni David ken ti intero nga Israel idiay Baala,+ idiay Kiriat-jearim a kukua ti Juda, tapno alaenda sadiay ti Lakasa ti pudno a Dios, ni Jehova, a nakatugaw iti trono iti ngatuen* dagiti kerubin,+ a sadiay nga umawag dagiti tattao iti naganna.
7 Ngem inluganda ti Lakasa ti pudno a Dios iti baro a kareson+ ken inruarda iti balay ni Abinadab, ket da Uza ken Ahio ti nangiturong iti kareson.+
8 Agragragsak ni David ken ti intero nga Israel iti sanguanan ti pudno a Dios ket nagkankanta ken nagtoktokarda kadagiti arpa, dadduma pay a dekuerdas nga instrumento, pandereta,+ piangpiang,+ ken trumpeta.+
9 Ngem idi nakadanonda iti pagirikan a maawagan iti Kidon, sinarapa ken tinengngel ni Uza ti Lakasa ta dandani natnag dayta gapu kadagiti baka.
10 Gapuna, nakapungtot ni Jehova ken ni Uza, isu a pinatayna ta iniggamanna ti Lakasa.+ Natay ni Uza iti sanguanan ti Dios.+
11 Ngem nakaunget* ni David ta nakapungtot ni Jehova ken ni Uza; ket naawagan dayta a disso iti Perez-uza* agingga ita nga aldaw.
12 Iti kasta, nagbuteng ni David iti pudno a Dios iti dayta nga aldaw, ket kinunana: “Kasanok ngarud a maala ti Lakasa ti pudno a Dios?”+
13 Saan a naipan ni David ti Lakasa iti ayanna iti Siudad ni David, no di ket impaipanna dayta iti balay ni Obed-edom a Gitita.
14 Nagtalinaed ti Lakasa ti pudno a Dios iti balay ni Obed-edom iti tallo a bulan, ket binembendisionan ni Jehova ti sangakabbalayan ni Obed-edom ken ti amin nga adda kenkuana.+
Footnotes
^ Wenno “manipud Sihor.”
^ Wenno “pagserkan ti Hamat.”
^ Wenno mabalin a, “nagbaetan.”
^ Wenno “naupay.”
^ Kaipapananna, “Pungtot Maibusor ken Uza.”
