Ti Umuna a Cronicas 14:1-17
14 Nangibaon ni Ari Hiram+ ti Tiro kadagiti mensahero a mapan ken David ket nangipatulod kadagiti kayo a sedro, parakabite iti bato,* ken karpintero a mangibangon iti balayna.*+
2 Napaneknekan ni David a ni Jehova ti nangisaad kenkuana kas ari ti Israel+ ken pinagbalinna a nabileg ti panagturayna para iti ilina nga Israel.+
3 Adu pay ti innala ni David kas assawa+ idiay Jerusalem, ket immadu ti annakna a lallaki ken babbai.+
4 Dagitoy ti nagan dagiti annakna a nayanak idiay Jerusalem:+ Samua, Sobab, Natan,+ Solomon,+
5 Ibar, Elisua, Elpelet,
6 Noga, Nefeg, Jafia,
7 Elisama, Beliada, ken Elifelet.
8 Idi nadamag dagiti Filisteo a nadutokan* ni David kas ari iti intero nga Israel,+ binirbirok ti amin a Filisteo ni David.+ Idi nadamag dayta ni David, rimmuar tapno labananna ida.
9 Immay dagiti Filisteo ket rinautda ti Tanap* ti Refaim.+
10 Dinamag ni David iti Dios: “Labanak kadi dagiti Filisteo? Iyawatmonto kadi ida kaniak?” Insungbat ni Jehova: “Mapanka, ta iyawatkonto ida kenka.”+
11 Gapuna, napan ni David idiay Baal-perazim,+ ket pinatayna ida sadiay. Kinuna ni David: “Pinarmek ti pudno a Dios dagiti kabusorko, a kas iti pannakarba ti pader gapu iti napegges a danum.” Dayta ti makagapu a pinanagananda dayta a lugar iti Baal-perazim.*
12 Pinanawan dagiti Filisteo dagiti diosda sadiay, ket napuoran dagita kas imbilin ni David.+
13 Di nagbayag, rimmaut manen dagiti Filisteo idiay tanap.*+
14 Nagsaludsod manen ni David iti Dios, ket insungbat ti pudno a Dios: “Saanka a rumaut iti sanguananda. Imbes ketdi, manglikawka iti likudanda, ket rautem ida iti sango dagiti babassit a kayo a baca.+
15 Inton mangngegmo dagiti kasla danapeg dagiti tattao iti ngatuen dagiti babassit a kayo a baca, rumautkan, ta umun-unanto ti pudno a Dios a mangpapatay iti armada dagiti Filisteo.”+
16 Inaramid ni David ti imbilin ti pudno a Dios,+ ket naparmekda ti armada dagiti Filisteo manipud Gibeon agingga idiay Gezer.+
17 Nagdindinamag ni David iti intero a daga, ket tinignay ni Jehova ti amin a nasion nga agbuteng kenkuana.+
Footnotes
^ Wenno “agibangon kadagiti pader.”
^ Wenno “palasiona.”
^ Wenno “napulotan.”
^ Wenno “Kapatagan.”
^ Kaipapananna, “Eksperto iti Panangraut.”
^ Wenno “kapatagan.”
