Ti Umuna a Cronicas 15:1-29
15 Intuloyna ti nagibangon kadagiti balayna iti Siudad ni David, ket nangisagana iti disso para iti Lakasa ti pudno a Dios ken nangipatakder iti tolda a pakaikabilanna.+
2 Iti kasta, kinuna ni David: “Awan ti asinoman a mangawit iti Lakasa ti pudno a Dios no di dagiti Levita, ta isuda ti pinili ni Jehova a mangawit iti Lakasa ni Jehova ken kanayon nga agserbida kenkuana.”+
3 Inummong ni David ti intero nga Israel idiay Jerusalem tapno maipan ti Lakasa ni Jehova iti disso nga insaganana.+
4 Inummong ni David dagiti kaputotan ni Aaron+ ken dagiti Levita:+
5 manipud kadagiti Cohatita, ni Uriel a panguluen ken ti 120 a kakabsatna;
6 manipud kadagiti Merarita, ni Asaias+ a panguluen ken ti 220 a kakabsatna;
7 manipud kadagiti Gersomita, ni Joel+ a panguluen ken ti 130 a kakabsatna;
8 manipud iti kaputotan ni Elizafan,+ ni Semaias a panguluen ken ti 200 a kakabsatna;
9 manipud iti kaputotan ni Hebron, ni Eliel a panguluen ken ti 80 a kakabsatna;
10 manipud iti kaputotan ni Uziel,+ ni Aminadab a panguluen ken ti 112 a kakabsatna.
11 Inayaban pay ni David dagiti papadi a da Zadok+ ken Abiatar+ ken dagiti Levita a da Uriel, Asaias, Joel, Semaias, Eliel, ken Aminadab,
12 ket kinunana: “Dakayo ti ulo dagiti pamilia dagiti Levita. Pagbalinenyo a nasantuan ti bagiyo, dakayo ken dagiti kakabsatyo, ket ipanyo ti Lakasa ni Jehova a Dios ti Israel iti disso nga insaganak.
13 Gapu ta saan a dakayo ti nangawit idi damo,+ nakapungtot kadatayo ni Jehova a Diostayo,+ ta ditay inammo ti umiso a panangawit iti dayta.”+
14 Iti kasta, pinagbalin dagiti papadi ken Levita a nasantuan ti bagida tapno iyawidda ti Lakasa ni Jehova a Dios ti Israel.
15 Gapuna, inassiwan dagiti Levita ti Lakasa ti pudno a Dios sa imbaklayda,+ kas imbilin ni Moises maitunos iti sao ni Jehova.
16 Imbaga ni David kadagiti panguluen dagiti Levita a siraragsak nga agkanta dagiti parakanta a kakabsatda, a danggayan dagiti instrumento ti musika: dagiti dekuerdas nga instrumento, arpa,+ ken piangpiang.+
17 Iti kasta, dinutokan dagiti Levita ni Heman+ nga anak ni Joel ken, manipud kadagiti kakabsatna, ni Asaf+ nga anak ni Berekias ken, manipud kadagiti Merarita a kakabsatda, ni Etan+ nga anak ni Kusaias.
18 Kaduada dagiti kakabsatda iti maikadua a benneg,+ da Zacarias, Ben, Jaaziel, Semiramot, Jehiel, Unni, Eliab, Benaias, Maasias, Matitias, Elifelehu, ken dagiti parabantay iti ruangan a da Miknias, Obed-edom, ken Jeiel.
19 Dagiti kumakanta a da Heman,+ Asaf,+ ken Etan ti nangtokar kadagiti gambang a piangpiang;+
20 ken da Zacarias, Aziel, Semiramot, Jehiel, Unni, Eliab, Maasias, ken Benaias ti nangtokar kadagiti dekuerdas nga instrumento a nayayug iti Alamot;*+
21 ken da Matitias,+ Elifelehu, Miknias, Obed-edom, Jeiel, ken Azazias ti nangtokar kadagiti arpa a nayayug iti Seminit,*+ tapno agakemda kas direktor.
22 Ni Kenanias+ a panguluen dagiti Levita ti nangiwanwan iti panangawit iti Lakasa, ta maysa nga eksperto,
23 ken da Berekias ken Elkana ti nangbantay iti Lakasa.
24 Dagiti papadi a da Sebanias, Josafat, Netanel, Amasai, Zacarias, Benaias, ken Eliezer ti sipipigsa a nangpuyot kadagiti trumpeta iti sanguanan ti Lakasa ti pudno a Dios,+ ket binantayan met da Obed-edom ken Jehias ti Lakasa.
25 Nagnagna a kimmuyog ni David ken dagiti panglakayen ti Israel ken dagiti panguluen ti rinibu tapno siraragsak nga alaenda ti lakasa ti tulag ni Jehova iti balay ni Obed-edom.+
26 Gapu ta tinulongan ti pudno a Dios dagiti Levita a nangawit iti lakasa ti tulag ni Jehova, nangidatonda iti pito nga urbon a kalakian a baka ken pito a kalakian a karnero.+
27 Nakakagay idi ni David iti awan manggasna a dekalidad a lupot, kasta met ti amin a Levita a nangawit iti Lakasa, dagiti kumakanta, ken ni Kenanias a nangiwanwan iti panagawit ken kadagiti kumakanta. Nakasuot met ni David iti lienso nga efod.+
28 Kimmuyog ti amin nga Israelita iti pannakayawid ti lakasa ti tulag ni Jehova ket siraragsak nga agpukpukkawda+ bayat a mapuypuyotan ti tangguyob ken dagiti trumpeta,+ ken matoktokar a sipipigsa dagiti piangpiang, dekuerdas nga instrumento, ken arpa.+
29 Ngem idi nakadanon ti lakasa ti tulag ni Jehova iti Siudad ni David,+ timman-aw iti tawa ni Mical+ nga anak ni Saul ket nakitana ni Ari David nga aglagtolagto ken agragragsak; ket inuyawna iti pusona.+
