Ti Umuna a Cronicas 18:1-17
18 Di nagbayag, inabak ni David dagiti Filisteo ken pinarmekna ida ket innalana kadakuada ti Gat+ ken dagiti ili iti aglawlawna.+
2 Kalpasanna, inabakna ti Moab,+ ket nagbalin dagiti Moabita nga adipen ni David ken nagbayadda iti buis kenkuana.+
3 Inabak ni David ni Ari Hadadezer+ ti Zoba+ idiay asideg ti Hamat+ bayat a mapmapan idiay Karayan Eufrates a mangisaknap iti panagturayna.+
4 Tiniliw ni David ti 1,000 a karuahe, 7,000 a kumakabalio, ken 20,000 a soldado ni Hadadezer.+ Kalpasanna, pinilay ni David ti amin a kabalio malaksid iti 100 a kabalio ti karuahe.+
5 Idi napan dagiti Siriano a taga-Damasco tapno tulonganda ni Ari Hadadezer ti Zoba, pinapatay ni David ti 22,000 a Siriano.+
6 Nangaramid ni David kadagiti kampo idiay Siria iti Damasco, ket nagbalin dagiti Siriano nga adipen ni David ken nagbayadda iti buis kenkuana. Pinagballigi* ni Jehova ni David iti sadinoman a napananna.+
7 Innala met ni David dagiti nagtimbukel a kalasag a balitok dagiti adipen ni Hadadezer sa impanna idiay Jerusalem.
8 Nangala ni David iti nagadu a gambang idiay Tibat ken Cun, dagiti siudad ni Hadadezer. Dagita ti inusar ni Solomon a nangaramid iti gambang a Baybay,+ kadagiti adigi, ken kadagiti alikamen a gambang.+
9 Idi nadamag ni Ari Tou ti Hamat nga inabak ni David ti intero nga armada ni Ari Hadadezer+ ti Zoba,+
10 dagus nga imbaonna ni Hadoram nga anakna tapno komustaen ken padayawanna ni Ari David ta nakilaban ken inabakna ni Hadadezer (ta masansan idi a makigubat ni Hadadezer ken ni Tou), ket nangitugot iti amin a kita ti alikamen a balitok, pirak, ken gambang.
11 Pinagbalin ni Ari David dagitoy a nasantuan iti sanguanan ni Jehova,+ agraman dagiti pirak ken balitok nga innalana iti amin a nasion: manipud Edom ken Moab, kadagiti Ammonita,+ Filisteo,+ ken Amalekita.+
12 Pinapatay ni Abisai+ nga anak ni Zeruia+ ti 18,000 nga Edomita idiay Tanap ti Asin.+
13 Nangaramid ni David kadagiti kampo idiay Edom, ket nagbalin nga adipenna ti amin nga Edomita.+ Pinagballigi* ni Jehova ni David iti sadinoman a napananna.+
14 Nagtultuloy a nagturay ni David iti intero nga Israel,+ ket impakatna ti hustisia ken kinalinteg iti amin nga iturayanna.+
15 Ni Joab nga anak ni Zeruia ti pangulo ti armada,+ ket ni Jehosafat+ nga anak ni Ahilud ti paralista.
16 Ni Zadok nga anak ni Ahitub ken ni Ahimelec nga anak ni Abiatar ti papadi, ken ni Savsa ti sekretario.
17 Ni Benaias nga anak ni Jehoiada ti panguluen dagiti Kereteo+ ken Peleteo.+ Dagiti annak ni David ti sumaruno iti saad ti ari.
