Ti Umuna a Cronicas 26:1-32
26 Dagitoy ti grupo dagiti parabantay iti ruangan:+ kadagiti Korita, ni Meselemias+ nga anak ni Core iti annak ni Asaf.
2 Dagitoy ti annak ni Meselemias: ni Zacarias ti inauna, ni Jediael ti maikadua, ni Zebadias ti maikatlo, ni Jatniel ti maikapat,
3 ni Elam ti maikalima, ni Jehohanan ti maikanem, ni Elieho-enai ti maikapito.
4 Dagitoy ti annak ni Obed-edom: ni Semaias ti inauna, ni Jehozabad ti maikadua, ni Joa ti maikatlo, ni Sacar ti maikapat, ni Netanel ti maikalima,
5 ni Amiel ti maikanem, ni Isacar ti maikapito, ni Peuletai ti maikawalo. Kasta ti panangbendision ti Dios ken Obed-edom.
6 Ti anakna a ni Semaias ket naaddaan iti annak nga agturay iti pamiliada, ta nabileg ken makabaelda a lallaki.
7 Dagitoy ti annak ni Semaias: ni Otni, Refael, Obed, ken Elzabad. Makabael met a lallaki dagiti kakabsatna a da Elihu ken Semakias.
8 Dagitoy amin ti kaputotan ni Obed-edom; makabaelda amin agraman dagiti annak ken kakabsatda ken kualipikadoda nga agserbi, 62 ti nagtaud ken Obed-edom.
9 Addaan ni Meselemias+ iti annak ken kakabsat, 18 a makabael a lallaki.
10 Ni Hosa a nagtaud iti annak ni Merari ket addaan iti annak. Ni Simri ti pannakaulo, ta dinutokan ti amana kas pannakaulo uray no saan nga isu ti inauna,
11 ni Hilkias ti maikadua, ni Tebalias ti maikatlo, ni Zacarias ti maikapat. Ti annak ken kakabsat ni Hosa ket 13.
12 Kadagitoy a grupo dagiti parabantay iti ruangan, addaan dagiti pannakaulo iti trabaho a kas kadagiti kakabsatda, ti panagserbi iti balay ni Jehova.
13 Gapuna, nagbibinnunotda,+ agpadpada dagiti babassit ken dadakkel iti pamiliada, no ania a ruangan ti bantayanda.
14 Ni Selemias ti nakabunot iti ruangan iti daya. Ti nabunot met ni Zacarias nga anakna, a masirib a mamalbalakad, ket ti ruangan iti amianan.
15 Ni Obed-edom ti nakabunot iti abagatan, ket dagiti annakna+ ti mangbantay kadagiti pagidulinan.
16 Da Supim ken Hosa+ ti nakabunot iti laud, iti asideg ti Ruangan a Saleket iti igid ti dakkel a kalsada a sumang-at. Agaabay ti grupo dagiti guardia;
17 adda innem a Levita iti daya; uppat iti kada aldaw iti amianan, ken uppat iti kada aldaw iti abagatan; ken sagdudua kadagiti pagidulinan;+
18 iti portiko iti laud, adda uppat iti dakkel a kalsada+ ken dua iti portiko.
19 Dagitoy ti grupo dagiti parabantay iti ruangan manipud iti annak dagiti Korita ken Merarita.
20 Kadagiti Levita, ni Ahias ti parabantay kadagiti pagidulinan iti gameng iti balay ti pudno a Dios ken kadagiti pagidulinan iti bambanag a napagbalin a nasantuan.*+
21 Kadagiti annak ni Ladan: iti kaputotan ni Gerson a nagtaud ken Ladan, ni Jehieli,+ a maysa kadagiti ulo dagiti pamilia a nagtaud ken Ladan a Gersonita,
22 ken ti annak ni Jehieli, ni Zetam ken ni Joel a kabsatna. Isuda ti parabantay kadagiti pagidulinan iti gameng iti balay ni Jehova.+
23 Kadagiti Amramita, Izarita, Hebronita, ken Uzielita,+
24 ni Sebuel nga anak ni Gersom nga anak ni Moises ket maysa a lider a mangbantay kadagiti pagidulinan.
25 Dagiti kakabsatna, a kaputotan ni Eliezer,+ ket da Rehabias,+ Jesaias, Joram, Zikri, ken Selomot.
26 Daytoy a Selomot ken ti kakabsatna ti mangbantay iti amin a pagidulinan iti bambanag a pinagbalin a nasantuan+ ni Ari David,+ dagiti ulo dagiti pamilia,+ dagiti panguluen ti rinibu ken ginasut, ken dagiti pangulo ti armada.
27 Pinagbalinda a nasantuan ti dadduma a banag a naala iti gubat+ tapno mamantener ti balay ni Jehova;
28 kasta met dagiti pinagbalin a nasantuan ni Samuel a pumaparmata,+ ni Saul nga anak ni Kis, ni Abner+ nga anak ni Ner, ni Joab+ nga anak ni Zeruia.+ Naipaaywan ken Selomit ken iti kakabsatna ti aniaman a banag a pinagbalin a nasantuan ti asinoman.
29 Kadagiti Izarita,+ naikkan ni Kenanias ken ti annakna iti sabali a trabaho kas opisial ken ukom+ iti Israel.
30 Kadagiti Hebronita,+ ni Hasabias ken ti kakabsatna, a 1,700 a makabael a lallaki, ti mangiwanwan iti Israel iti makinlaud a paset ti Jordan mainaig iti amin a trabaho para ken Jehova ken iti panagserbi iti ari.
31 Iti kaputotan ti pamilia ni Hebron, ni Jerias+ ti pannakaulo. Idi maika-40 a tawen ti panagturay ni David,+ nagbirok ti dadduma kadagiti adipen ni David kadagiti Hebronita a nabileg ken makabael a lallaki, ket adda dagiti nabirokanda idiay Jazer+ iti Gilead.
32 Agdagup dagiti kakabsatna iti 2,700 a makabael a lallaki, nga ulo dagiti pamilia. Gapuna, dinutokan ida ni Ari David a mangiwanwan kadagiti Rubenita, Gadita, ken iti kagudua ti tribu dagiti Manasesita, para iti tunggal banag maipapan iti pudno a Dios ken iti ari.
Footnotes
^ Wenno “bambanag a naidedikar.”
