Ti Umuna a Cronicas 29:1-30
29 Ita, kinuna ni Ari David iti amin a naguummong: “Ni Solomon nga anakko, a pinili ti Dios,+ ket ubing pay ken awanan iti kapadasan.*+ Ngem nagdakkel ti trabaho, ta templo* daytoy para ken Jehova a Dios+ saan nga iti tao.
2 Inaramidko ti amin a kabaelak a mangisagana kadagiti materiales a mausar iti balay ti Diosko. Nangipaayak kadagiti balitok, pirak, gambang, landok,+ troso,+ bato nga onix, ken dagiti espesial a bato, babassit ken namaris a batbato a dekorasion, amin a kita ti napateg a bato, ken nakaad-adu a bato nga alabastro.
3 Maysa pay, gapu iti panangipategko iti balay ti Diosko,+ nangtedak iti balitok ken pirak manipud iti sanikuak+ para iti balay ti Diosko malaksid pay iti amin nga insaganak para iti nasantuan a balay,
4 agraman ti 3,000 a talento* a balitok manipud Ofir+ ken 7,000 a talento a napasudi a pirak, a pangkalupkop iti diding dagiti siled ti balay,
5 dagiti balitok, pirak, ken ti amin a kasapulan dagiti eksperto a trabahador. Ita, asino ti agboluntario a mangted iti sagut ken Jehova?”+
6 Gapuna, nagboluntario a nangted dagiti prinsipe dagiti pamilia, dagiti prinsipe dagiti tribu ti Israel, dagiti panguluen ti rinibu ken ti ginasut,+ ken dagiti mangas-asikaso kadagiti aktibidad ti ari.+
7 Dagitoy ti intedda para iti balay ti pudno a Dios: 5,000 a talento a balitok, 10,000 a darik,* 10,000 a talento a pirak, 18,000 a talento a gambang, ken 100,000 a talento a landok.
8 Nangted iti sagut ti asinoman nga addaan kadagiti napateg a bato para iti pagidulinan iti gameng iti balay ni Jehova, iti panangaywan ni Jehiel+ a Gersonita.+
9 Naragsakan dagiti tattao a nangted kadagitoy a boluntario a daton, ta naimpusuan+ nga intedda dagitoy ken Jehova. Naragsakan met unay ni Ari David.
10 Iti kasta, indaydayaw ni David ni Jehova iti sanguanan dagiti naguummong a tattao ket kinunana: “Maidaydayawka koma iti agnanayon,* O Jehova a Dios ni Israel nga amami.
11 Kukuam, O Jehova, ti kinanaindaklan,+ pannakabalin,+ kinangayed, ken kinadayag,*+ ta kukuam ti amin nga adda iti langit ken daga.+ Kukuam ti pagarian, O Jehova.+ Sika ti nangitan-ok iti bagim kas panguluen ti amin.
12 Naggapu kenka ti kinabaknang ken dayag,+ ken iturturayam ti amin.+ Adda iti imam ti pannakabalin+ ken bileg,+ ken makaaramidka iti nakaskasdaaw a bambanag,+ ken kabaelam nga ikkan iti bileg ti asinoman.+
13 Ket ita, O Diosmi, agyamankami kenka ken idaydayawmi ti nadayag a naganmo.
14 “Kaskasdi, asinoak ken asino ti ilik, tapno mangtedkami kadagiti boluntario a daton a kas kadagitoy? Ta naggapu kenka ti amin a banag, ket intedmi kenka ti naggapu iti bukodmo nga ima.
15 Ta ganggannaet ken makipaggigiankami laeng iti sanguanam, a kas kadagidi amin nga ammami.+ Ta ti biagmi ditoy daga ket kas iti anniniwan+—awanan iti namnama.
16 O Jehova a Diosmi, naggapu iti imam ti amin a banag nga insaganami a pangibangon iti balaymo para iti nasantuan a naganmo. Kukuam amin dagitoy.
17 Pagaammok, O Diosko, a suksukimatem ti puso+ ket maragsakanka iti maysa a nalinteg.*+ Sipapasnek* ti pusok a boluntario a nangidaton kadagitoy amin a banag, ken napalalo ti ragsakko a nakakita kadagiti adipenmo nga adda ditoy a mangted kenka kadagiti boluntario a daton.
18 O Jehova a Dios dagidi ammami a da Abraham, Isaac, ken Israel, tulongam koma dagitoy a tattao a mangtaginayon iti kasta a tarigagayda ket agserbida kenka iti amin a pusoda.+
19 Ikkam koma ni Solomon nga anakko iti naan-anay* a puso,+ tapno matungpalna dagiti bilin,+ pammalagip, ken regulasionmo ket aramidenna amin dagitoy ken bangonenna ti templo* nga insaganaak.”+
20 Kalpasanna, kinuna ni David kadagiti tattao a naguummong: “Ita, idaydayawyo ni Jehova a Diosyo.” Ket indaydayaw dagiti tattao ni Jehova a Dios dagidi ammada ket nagrukob ken nagruknoyda ken Jehova ken iti ari.
21 Intultuloyda ti nagidaton ken Jehova. Iti simmaganad nga aldaw, nangipaayda ken Jehova kadagiti daton a mapuoran:+ 1,000 nga urbon a baka, 1,000 a kalakian a karnero, 1,000 nga urbon a kalakian a karnero, ken dagiti kakuyogda a daton nga inumen.+ Nakaad-adu ti indatonda para iti intero nga Israel.+
22 Intultuloyda ti nangan ken imminum iti sanguanan ni Jehova iti dayta nga aldaw ken nagragragsakda.+ Iti maikadua a gundaway, pinagbalinda nga ari ni Solomon nga anak ni David ken dinutokanda* kas lider iti sanguanan ni Jehova,+ ken pinagbalinda met a padi ni Zadok.+
23 Nagtugaw ni Solomon iti trono ni Jehova+ kas ari a kasukat ni David nga amana, ket nagballigi, ken nagtulnog kenkuana ti amin nga Israelita.
24 Nagpasakup ken Solomon nga ari ti amin a prinsipe,+ nabileg a mannakigubat,+ kasta met ti amin nga annak ni Ari David.+
25 Pinagbalin ni Jehova a nakatantan-ok ni Solomon iti sanguanan ti intero nga Israel ken inikkanna iti dayag a saan a napadasan ti asinoman nga ari ti Israel.+
26 Iti kasta, nagari ni David nga anak ni Jesse iti intero nga Israel,
27 ket 40 a tawen ti kapaut* ti panagturayna iti Israel. Nagturay iti 7 a tawen idiay Hebron,+ ken 33 a tawen idiay Jerusalem.+
28 Lakayen ni David idi natay.+ Napnek iti atiddog a biag,* kinabaknang, ken kinadayag; ket ni Solomon nga anakna ti simmaruno kenkuana kas ari.+
29 Ti pakasaritaan ni Ari David, manipud rugi agingga iti ipapatayna, ket nairaman kadagiti surat ni Samuel a pumaparmata, ni Natan+ a propeta, ken ni Gad+ a managsirmata.
30 Dagitoy a surat ket maipapan iti panagari ken kinabilegna, ken iti amin a pasamak a mainaig kenkuana, iti Israel, ken iti amin a pagarian iti aglawlawna.
Footnotes
^ Wenno “kastilio; palasio.”
^ Wenno “nakapuy.”
^ Wenno “manipud iti awan inggana agingga iti awan inggana.”
^ Wenno “dignidad.”
^ Wenno “natarnaw.”
^ Wenno “Nalinteg.”
^ Wenno “saan a nabingay.”
^ Wenno “kastilio; palasio.”
^ Wenno “pinulotanda.”
^ Lit., “dagiti aldaw.”
^ Lit., “iti al-aldaw.”
