Umuna a Surat ni Juan 2:1-29
2 Ay-ayatek nga annak, isursuratko kadakayo dagitoy tapno dikay agbasol. Ngem no adda asinoman nga agbasol, addaantayo iti katulongan* a kadua ti Ama, ni Jesu-Kristo,+ daydiay nalinteg.+
2 Isu ti pakikappia a daton*+ para kadagiti basoltayo,+ ngem saan laeng a kadagiti basoltayo no di ket kadagiti basol ti tattao iti intero a lubong.+
3 Ket no itultuloytayo a tungpalen dagiti bilinna, nalawag a naam-ammotayon isuna.
4 Daydiay mangibagbaga: “Naam-ammokon isuna,” ngem dina tungtungpalen dagiti bilinna, isu ket ulbod, ket awan ti kinapudno iti dayta a tao.
5 Ngem asinoman a mangtungpal iti saona, nalawag a talaga nga ay-ayatenna ti Dios.+ Babaen iti dayta, ammotayo a naikaykaysatayo kenkuana.+
6 Daydiay mangibaga nga isu ket agtalinaed a naikaykaysa kenkuana ket obligado nga agtultuloy a magna a kas iti pannagna idi ni Jesus.+
7 Patpatgek a kakabsat, saan a baro a bilin ti isursuratko kadakayo no di ket ti daan a bilin nga addan kadakayo manipud idi damo.+ Daytoy daan a bilin ket ti sao a nangngegyo.
8 Ngem baro a bilin ti isursuratko kadakayo, ti bilin a sinurotna ken sinurotyo, ta lumablabasen ti kinasipnget ken agsilsilnagen ti pudno a lawag.+
9 Daydiay mangibagbaga nga adda isuna iti lawag ngem gurguraenna+ ni kabsatna ket adda pay laeng iti sipnget.+
10 Daydiay agayat iti kabsatna agtalinaed iti lawag,+ ken awan ti pakaitibkolanna.
11 Ngem daydiay manggurgura iti kabsatna adda iti sipnget ken magmagna iti sipnget,+ ken dina ammo ti papananna,+ ta binulsek ti sipnget dagiti matana.
12 Sursuratankayo ay-ayatek nga annak, ta napakawanen dagiti basolyo maigapu iti naganna.+
13 Sursuratankayo nga amma, ta naam-ammoyon daydiay addan sipud idi un-unana. Sursuratankayo nga agtutubo a lallaki, ta naparmekyon daydiay managdakdakes.+ Sursuratankayo nga ubbing, ta naam-ammoyon ti Ama.+
14 Sursuratankayo nga amma, ta naam-ammoyon daydiay addan sipud idi un-unana. Sursuratankayo nga agtutubo a lallaki, ta napigsakayo+ ket agtalinaed kadakayo ti sao ti Dios+ ken naparmekyon daydiay managdakdakes.+
15 Diyo ayaten ti lubong wenno uray dagiti bambanag iti lubong.+ No adda asinoman nga agayat iti lubong, awan kenkuana ti ayat ti Ama.+
16 Ta amin a banag iti lubong—ti tarigagay* ti lasag+ ken ti tarigagay dagiti mata+ ken ti panangiparammag iti sanikua a pagbiag ti maysa*—ket saan nga agtaud iti Ama, no di ket iti lubong.
17 Kanayonanna, ti lubong ket aglabas agraman ti tarigagayna.+ Ngem daydiay agaramid iti pagayatan ti Dios ket agtalinaed iti agnanayon.+
18 Annakko, addatayon iti maudi nga oras. Nangngegyo nga umay ti antikristo.+ Uray pay ita, adun ti antikristo;+ isu nga ammotayo nga addatayon iti maudi nga oras.
19 Pinanawandatayo, ngem saantayo ida a kakadua;*+ ta no kakaduatayo koma ida, didatay koma pinanawan. Ngem pimmanawda tapno maipakita a saantayo ida a kakadua.+
20 Dinutokannakayo* daydiay nasantuan,+ ket ammoyo amin dayta.
21 Sursuratankayo saan a gapu ta diyo ammo ti kinapudno,+ no di ket gapu ta ammoyo dayta, ken gapu ta awan ti ulbod nga agtaud iti kinapudno.+
22 Asino ti naulbod no di daydiay mangilibak a ni Jesus ti Kristo?+ Isu daytoy ti antikristo,+ daydiay mangilibak iti Ama ken iti Anak.
23 Asinoman a mangilibak iti Anak awan met kenkuana ti Ama.+ Ngem ti asinoman a mangbigbig iti Anak+ adda met kenkuana ti Ama.+
24 No maipapan kadakayo, itultuloyyo nga aramiden dagiti nangngegyo manipud idi damo.+ No itultuloyyo nga aramiden dagiti nangngegyo manipud idi damo, agtalinaedkayonto a naikaykaysa iti Anak ken iti Ama.
25 Kanayonanna, daytoy ti inkarina kadatayo—ti biag nga agnanayon.+
26 Agsuratak kadakayo maipapan kadagidiay mangpadpadas a mangallilaw kadakayo.
27 No maipapan kadakayo, dinutokannakayo* ti Dios babaen ti espirituna+ ket agtalinaed dayta kadakayo, isu a diyo kasapulan ti mangisuro kadakayo. Ngem pudno ken saan nga ulbod ti pannakadutokyo babaen ti espiritu ken isursuronakayo iti amin a banag.+ Agtalinaedkayo a naikaykaysa kenkuana kas iti insuro kadakayo ti espiritu.+
28 Gapuna, ay-ayatek nga annak, agtalinaedkayo a naikaykaysa kenkuana, tapno inton maipalgak, naturedtayo nga agsao*+ ket ditay mabain a sumango kenkuana inton kaaddana.
29 No ammoyo nga isu ket nalinteg, ammoyo met a ti tunggal maysa a mangannurot iti kinalinteg ket nayanak manipud iti Dios.+
Footnotes
^ Wenno “mangsuporta.”
^ Wenno “pangabbong a daton; pamay-an a pangay-ayo.”
^ Wenno “panangipalastog iti sanikua ti maysa.”
^ Wenno “derrep.”
^ Wenno “saanda a kas kadatayo.”
^ Wenno “pinulotannakayo.”
^ Wenno “pinulotannakayo.”
^ Wenno “adda wayawayatayo nga agsao.”
