Ti Umuna a Samuel 11:1-15
11 Kalpasanna, nagkampo ni Nahas nga ari dagiti Ammonita+ ken dagiti soldadona tapno rautenda ti Jabes+ idiay Gilead. Kinuna ti amin nga umili ti Jabes ken ni Nahas: “Agaramidtayo koma iti tulagan, ket agserbikaminto kenka.”
2 Kinuna kadakuada ni Nahas nga Ammonita: “Makitulagak kadakayo iti maysa a kondision: suatenyo ti makannawan a matayo. Aramidek daytoy tapno maibabainko ti intero nga Israel.”
3 Kinuna dagiti panglakayen iti Jabes: “Ikkannakami iti pito nga aldaw a pawayway tapno makaibaonkami kadagiti mensahero iti amin a teritoria ti Israel. No awanto ti mangisalakan kadakami, sumukokaminto kenka.”
4 Idi nakadanon dagiti mensahero idiay Gibea+ nga ayan ni Saul, imbagada dayta kadagiti umili ket nagsasangitda iti nakapigpigsa.
5 Apag-isu a sumangpet ni Saul manipud iti panagipastorna iti arbanna, ket dinamagna: “Ania ti napasamak kadagiti tattao? Apay nga agsasangitda?” Isu nga inestoriada kenkuana ti imbaga dagiti taga-Jabes.
6 Idi nangngeg dayta ni Saul,+ ti espiritu ti Dios ti nangpabileg kenkuana, ket nakapungtot.
7 Isu a nangala iti dua a kalakian a baka ket rinangrangkayna ida, sana impaiwaras kadagiti mensahero a napan nangibaga iti amin a teritoria ti Israel: “Kastoy ti mapasamak iti baka ti asinoman a saan a sumurot kada Saul ken Samuel!” Ket nagbuteng dagiti tattao ken Jehova isu a simmurotda a sangsangkamaysa.*
8 Binilangna ida idiay Bezek, ket 300,000 dagiti Israelita ken 30,000 a lallaki ti naggapu iti Juda.
9 Kinunada kadagiti immay a mensahero: “Ibagayo kadagiti lallaki ti Jabes idiay Gilead, ‘Sakbay ti tengnga ti aldaw inton bigat, naisalakankayon.’” Nagsubli dagiti mensahero ket impadamagda dayta kadagiti lallaki idiay Jabes isu a kasta unay ti ragsakda.
10 Kinuna ngarud dagiti lallaki ti Jabes: “Inton bigat, sumukokami kadakayo, ket mabalinyonton nga aramiden kadakami ti ammoyo a nasayaat.”+
11 Kabigatanna, biningay ni Saul dagiti tattaona iti tallo a grupo, ket napanda iti tengnga ti kampo bayat ti panagbantay iti bigat* ken pinapatayda dagiti Ammonita+ agingga iti tengnga ti aldaw. Ti la napnapanan dagiti nakalasat, ket awanen a pulos ti nagkakadua kadakuada.
12 Imbaga dagiti tattao ken Samuel: “Ayandan dagidiay nangibaga a saan a rumbeng nga agari ni Saul kadatayo?+ Iyegyo ida ta papatayenmi.”
13 Ngem kinuna ni Saul: “Awan ti rumbeng a mapapatay ita nga aldaw,+ ta insalakan ita ni Jehova ti Israel.”
14 Kalpasanna, kinuna ni Samuel kadagiti umili: “Umaykayo ket intayo idiay Gilgal+ tapno ideklaratayo manen ti kinaari ni Saul.”+
15 Isu a napan ti amin nga umili idiay Gilgal, ket pinagbalinda sadiay ni Saul kas ari iti imatang ni Jehova. Kalpasanna, nagidatonda sadiay kadagiti daton a pakikappia iti imatang ni Jehova,+ ket nagragragsak da Saul ken ti amin nga Israelita.+
Footnotes
^ Lit., “kas maysa a tao.”
^ Kayatna a sawen, agarup 2:00 ti parbangon agingga iti 6:00 ti bigat.
