Ti Umuna a Samuel 23:1-29
23 Idi agangay, naipadamag ken David: “Rarauten dagiti Filisteo ti Keila,+ ket taktakawenda dagiti naani.”
2 Isu nga insaludsod ni David ken Jehova:+ “Mapanko kadi gubaten dagitoy a Filisteo?” Kinuna ni Jehova ken David: “Mapanka, gubatem dagiti Filisteo ket isalakanmo ti Keila.”
3 Ngem kinuna dagiti tattao ni David: “Kitaenyo! Mabutbutengtayo la ngaruden bayat ti kaaddatayo ditoy Juda,+ anianto la ketdin no mapantayo idiay Keila a makigubat kadagiti Filisteo!”+
4 Isu a nagsaludsod manen ni David ken Jehova.+ Insungbat ni Jehova: “Inka idiay Keila ta iyawatko kenka dagiti Filisteo.”+
5 Napan ngarud ni David idiay Keila agraman dagiti tattaona ket rinautda dagiti Filisteo; innalana dagiti animalda ken adu kadakuada ti pinatayna, ket insalakan ni David dagiti umili ti Keila.+
6 Idi nagtalaw ni Abiatar+ nga anak ni Ahimelec tapno mapan ken David idiay Keila, nangitugot iti efod.
7 Naipakaammo ken Saul: “Napan ni David idiay Keila.” Ket kinuna ni Saul: “Inyawaten ti Dios kaniak,*+ ta simrek iti siudad nga addaan kadagiti rikep ken trangka ket saanen a makapanaw.”
8 Isu a pinaayaban ni Saul ti amin a soldado a mapanda makigubat, tapno mapanda idiay Keila ken palawlawanda ni David ken dagiti tattaona.
9 Idi naammuan ni David ti panggep ni Saul maibusor kenkuana, kinunana ken Abiatar a padi: “Iyegmo ditoy ti efod.”+
10 Ket kinuna ni David: “O Jehova a Dios ti Israel, nadamag daytoy adipenmo a panggep ni Saul ti umay ditoy Keila tapno dadaelenna ti siudad gapu kaniak.+
11 Isukodakto kadi dagiti lider* ti Keila kenkuana? Umay kadi ni Saul kas iti nadamag daytoy adipenmo? O Jehova a Dios ti Israel, pangngaasim ta ibagam kaniak nga adipenmo.” Ket kinuna ni Jehova: “Sigurado nga umay.”
12 Insaludsod ni David: “Isukodakto kadi dagiti lider ti Keila agraman dagiti tattaok iti ima ni Saul?” Insungbat ni Jehova: “Isukodakanto.”
13 Timmakder a dagus ni David agraman ti agarup 600 a tattaona.+ Pimmanawda idiay Keila ket napanda iti sadinoman a mabalinda a papanan. Idi naipadamag ken Saul a nagtalaw ni David idiay Keila, dinan intuloy ti panggepna ken David.
14 Naglemmeng ni David kadagiti lugar iti let-ang a narigat a papanan, iti kabambantayan ti let-ang ti Zif.+ Kanayon a binirbirok ni Saul,+ ngem saan nga inyawat ni Jehova kenkuana.
15 Bayat nga adda ni David iti let-ang ti Zif idiay Hores, ammona a* birbiroken ni Saul tapno patayenna.
16 Napan ni Jonatan nga anak ni Saul iti ayan ni David idiay Hores, ket tinulonganna a mangpabileg* iti panagtalekna ken Jehova.+
17 Kinunana kenkuana: “Dika agbuteng, ta saannakanto a masarakan ni Saul nga amak; sika ti agarinto iti Israel,+ ket agbalinakto a maikadua kenka; ammo met dayta ni Saul nga amak.”+
18 Kalpasanna, nagtulagda a dua+ iti imatang ni Jehova. Nagnaed ni David idiay Hores ket nagawid ni Jonatan iti pagtaenganna.
19 Idi agangay, kinuna dagiti lallaki a taga-Zif a napan ken Saul idiay Gibea:+ “Saanyo kadi nga ammo nga aglemlemmeng ni David iti asidegmi,+ kadagiti lugar idiay Hores+ a narigat a papanan, iti turod ti Hakila,+ iti abagatan* ti Jesimon?*+
20 No kayatmo ti umay, O ari, isukomi kenka ni David.”+
21 Kinuna ni Saul: “Bendisionannakayo koma ni Jehova, ta naasiankayo kaniak.
22 Pangngaasiyo ta mapankayo ket ammuenyo ti eksakto nga ayanna ken no asino ti nakakita kenkuana sadiay, ta naipadamag kaniak a nakasiksikap unay.
23 Siputanyo a naimbag ti amin a lugar a paglemlemmenganna ket agsublikayto kaniak agraman ti ebidensia. Kalpasanna, kumuyogakto kadakayo no adda sadiay. Birokekto isuna iti amin a pamilia* iti Juda.”
24 Pimmanawda ket napanda idiay Zif+ nga immun-una ngem ni Saul, bayat nga adda ni David ken dagiti tattaona idiay let-ang ti Maon+ iti Araba iti abagatan ti Jesimon.+
25 Kalpasanna, napan ni Saul ken dagiti soldadona tapno birokenda ni David.+ Idi naammuan dayta ni David, insigida a napan naglemmeng iti dakkel a bato+ idiay let-ang ti Maon. Idi nadamag dayta ni Saul, sinurotna ni David iti let-ang ti Maon.
26 Idi makadanon ni Saul iti maysa a bakras ti bantay, adda met ni David ken dagiti tattaona iti bangir ti bantay. Inalistuan ni David ti pimmanaw+ tapno maitarayanna ni Saul ta umas-asidegen ni Saul ken dagiti soldadona a mangtiliw kadakuada.+
27 Ngem kinuna ti maysa a mensahero a napan ken Saul: “Darasem ti agawid, ta rarautenen dagiti Filisteo ti dagatayo!”
28 Gapu iti dayta, insardeng ni Saul ti panangkamatna ken David+ ket napanna rinaut dagiti Filisteo isu a naawagan dayta a lugar iti Dakkel a Bato ti Panagsisina.
29 Pimmanaw ni David sadiay ket nagnaed kadagiti lugar a narigat a papanan idiay En-gedi.+
Footnotes
^ Lit., “Inlakon ti Dios iti imak.”
^ Wenno mabalin a, “dagiti makinkukua iti daga.”
^ Wenno mabalin a, “mabuteng gapu ta.”
^ Lit., “pinabilegna ti imana.”
^ Lit., “iti kannawan.”
^ Wenno mabalin a, “ti desierto; ti let-ang.”
^ Lit., “rinibu.”
