Ti Umuna a Samuel 27:1-12
-
Inted dagiti Filisteo ti Ziklag ken David (1-12)
27 Ngem kinuna ni David iti bagina: “Addanto la ketdi aldaw a mapataynak ni Saul. Nasaysayaat no agkamangak+ iti daga dagiti Filisteo, tapno agsardengen ni Saul a mangbirbirok kaniak iti intero a teritoria ti Israel,+ ket makalisiak kenkuana.”
2 Pimmanaw ngarud ni David ken ti 600 a tattaona+ ket napanda ken Akis+ nga anak ni Maok, nga ari ti Gat.
3 Nakipagyan ni David ken Akis idiay Gat, agraman dagiti tattaona ken dagiti pamiliada. Kadua met ni David ti dua nga assawana a da Ahinoam+ a taga-Jezreel ken ti taga-Carmelo a ni Abigail+ nga asawa daydi Nabal.
4 Idi naipadamag ken Saul a nagkamang ni David idiay Gat, saannan a kinamat.+
5 Kinuna ni David ken Akis: “No pakaragsakam, ipaayannak koma iti lugar a pagyanak iti maysa kadagiti babassit a siudad. Ta asino koma daytoy adipenmo tapno makipagnaed kenka iti naarian a siudadmo?”
6 Isu nga inted ni Akis kenkuana ti Ziklag+ iti dayta nga aldaw. Dayta ti gapuna a ti Ziklag ket nagbalin a kukua dagiti ari ti Juda agingga ita nga aldaw.
7 Makatawen ken uppat a bulan ti kapaut* ti panagyan ni David iti teritoria dagiti Filisteo.+
8 Ket rinaut ni David ken dagiti tattaona dagiti Gesurita,+ Girzeo, ken Amalekita;+ ta agnanaedda idi kadagiti lugar manipud iti Telam agingga iti Sur+ ken agingga idiay Egipto.
9 No rumaut ni David kadagita a lugar, awan ti ibatina a sibibiag, lalaki man wenno babai.+ Ngem alaenna dagiti karnero, kalding, baka, asno, kamelio, ken bado, sa agsubli ken Akis.
10 Ket saludsoden ni Akis: “Sadino ti rimmautanyo ita?” Ibaga no kua ni David: “Iti abagatan ti Juda”+ wenno “Iti abagatan* ti sakup dagiti Jerameelita”+ wenno “Iti abagatan ti sakup dagiti Keneo.”+
11 Awan ti sibibiag nga ibati ni David, lalaki man wenno babai a mayawid idiay Gat, ta ibagbagana: “Tapno saanda nga ibaga maipapan kadatayo, ‘Kastoy ti inaramid ni David.’” (Kasta ti inar-aramidna bayat a nagnaed iti teritoria dagiti Filisteo.)
12 Namati ni Akis ken David, ket kunana iti bagina: “Sigurado a kagurguran dagiti kailianna nga Israelita; isu nga agbalinto nga adipenko iti unos ti panagbiagna.”