Ti Umuna a Samuel 31:1-13
-
Ipapatay ni Saul ken ti tallo nga annakna a lallaki (1-13)
31 Makilablaban idi dagiti Filisteo iti Israel.+ Naglibas dagiti lallaki ti Israel iti sanguanan dagiti Filisteo, ket adu kadakuada ti napapatay idiay Bantay Gilboa.+
2 Kinamat dagiti Filisteo ni Saul ken ti annakna ket pinatayda da Jonatan,+ Abinadab, ken Malki-shua, dagiti annak ni Saul.+
3 Nakaro ti pannakilabanda ken Saul, ket idi nabirokan dagiti pumapana, sinugatanda iti nakaro.+
4 Iti kasta, kinuna ni Saul iti paraawit iti kabalna: “Asutem ta espadam ket duyokennak tapno saandak a ranggasan* ken patayen dagiti di nakugit a lallaki.”+ Ngem saan a kayat ti paraawit iti kabalna, ta kasta unay ti butengna. Isu nga innala ni Saul ti espada sa rinugmaanna dayta.+
5 Idi nakita ti paraawit iti kabalna a natayen ni Saul,+ rinugmaanna met ti espadana ket natayda a dua.
6 Iti dayta nga aldaw, natay ni Saul, ti tallo nga annakna, ti paraawit iti kabalna, ken amin a tattaona.+
7 Idi nakita dagiti Israelita nga adda iti tanap* ken iti aglawlaw ti Jordan a nagtatarayen dagiti lallaki ti Israel ken natayen ni Saul ken dagiti annakna, pinanawanda dagiti siudadda ket nagtalawda.+ Kalpasanna, simmangpet dagiti Filisteo ket nagnaedda kadagita.
8 Iti sumaganad nga aldaw, dimteng dagiti Filisteo tapno alaenda ti aruaten dagiti napapatay ket nakitada a natay ni Saul ken ti tallo nga annakna idiay Bantay Gilboa.+
9 Isu a pinugotanda ni Saul ken innalada ti kabalna ket impaibagada iti intero a daga dagiti Filisteo nga iwarasda ti damag+ kadagiti balay* dagiti didiosen+ ken tattao.
10 Kalpasanna, inkabilda ti kabalna iti balay dagiti rebulto ni Astoret ket inlansada ti bangkayna iti pader ti Bet-san.+
11 Idi nadamag dagiti umili ti Jabes-gilead+ ti inaramid dagiti Filisteo ken ni Saul,
12 napan ti amin a mannakigubat ken nagpatnag a nagdaliasatda ket innalada ti bangkay ni Saul ken dagiti annakna iti pader ti Bet-san. Nagsublida idiay Jabes sa pinuoranda dagiti bangkay.
13 Kalpasanna, innalada dagiti tulang ni Saul ken dagiti annakna+ ket inkalida iti sirok ti kayo a tamarisko idiay Jabes,+ sa nagayunarda iti pito nga aldaw.