Umuna a Surat ken Timoteo 4:1-16
4 Nupay kasta, silalawag nga ibaga ti sao* ti Dios nga addanto dagiti mangpanaw iti pammati kadagiti maudi a tiempo, nga ipangagda dagiti mangallilaw a sasao*+ ken sursuro dagiti demonio,
2 babaen kadagiti agpampammarang a tattao nga agsasao iti ulbod,+ a kimmalio ti konsiensiada a kas iti piglat ti pagmarka a landok.
3 Iparitda ti panagasawa+ ken ibilinda kadagiti tattao a saanda a kanen ti dadduma a taraon,+ ngem pinarsua ti Dios dagita tapno kanen+ dagidiay addaan pammati+ ken agyamanda babaen ti umiso a pannakaammo iti kinapudno.
4 Ta nasayaat ti tunggal parsua ti Dios,+ ket awan ti saan a mabalin a kanen+ no awaten dayta buyogen ti panagyaman,
5 ta nagbalin dagita a nasantuan babaen ti sao ti Dios ken ti panagkararag.
6 No ibalakadmo dagitoy kadagiti kakabsat, agbalinkanto a nasayaat a ministro ni Kristo Jesus, maysa a nataraonan iti mensahe maipapan iti pammati ken nasayaat a sursuro a sinurotmo a naimbag.+
7 Ngem laksidem dagiti ulbod nga estoria,+ kas iti ibagbaga dagiti babbaket. Imbes ketdi, sanayem ti bagim a mangipakita iti debosionmo iti Dios kas panggepmo.
8 Ta bassit ti magunggona iti pisikal a panagsanay,* ngem makagunggona iti amin a banag ti debosion iti Dios, ta mainaig dayta iti kari a biag ita ken biag iti masanguanan.+
9 Mapagtalkan dayta a sasao ken maikari nga awaten a naimpusuan.
10 Isu nga ikagkagumaantayo ti agtrabaho ken agbannog,+ ta agtalektayo iti sibibiag a Dios, a Manangisalakan+ iti amin a kita ti tattao,+ nangnangruna dagidiay matalek.
11 Itultuloymo nga ipaay ken isuro dagitoy a bilin.
12 Dimo ipalubos nga adda asinoman a manglais iti kinaagtutubom. Imbes ketdi, agbalinka nga ulidan kadagidiay matalek no iti panagsao, kababalin, ayat, pammati, kinadalus.*
13 Agingga nga umayak, itultuloymo nga ipamaysa ti panagbasa iti publiko,+ panangparegta, panangisuro.
14 Dimo baybay-an ti sagut a naited kenka babaen ti maysa a padto idi imparabaw kenka ti bagi dagiti panglakayen ti imada.+
15 Utobem* dagitoy a banag; ipamaysam nga asikasuen dagitoy, tapno makita ti amin a tattao ti panagrang-aymo.
16 Kanayon nga asikasuem ti bagim ken ti isursurom.+ Ikagumaam a tungpalen dagitoy a banag, ta no kasta ti aramidem, maisalakanmonto ti bagim ken dagiti dumngeg kenka.+
Footnotes
^ Lit., “espiritu.”
^ Lit., “nga espiritu.”
^ Wenno “panagehersisio.”
^ Wenno “kinasin-aw.”
^ Wenno “Panunotem a naimbag.”
