Ti Maikadua nga Ar-ari 1:1-18
-
Ipadto ni Elias a matay ni Ahazias (1-18)
1 Kalpasan ti ipapatay ni Ahab, bimmusor ti Moab+ iti Israel.
2 Maysa nga aldaw, natnag ni Ahazias iti rehas ti siled iti tuktok ti balayna idiay Samaria isu a nasugatan iti nakaro. Gapuna, nangibaon kadagiti mensahero ket kinunana kadakuada: “Mapankayo ken Baal-zebub a dios ti Ekron+ ket damagenyo no umimbagak pay.”+
3 Ngem kinuna ti anghel ni Jehova ken ni Elias*+ a Tisbita: “Tumakderka, sabtem dagiti mensahero ti ari ti Samaria ket ibagam kadakuada, ‘Gapu kadi ta awan ti Dios iti Israel isu a mapankayo agdamag ken Baal-zebub a dios ti Ekron?+
4 Daytoy ti kinuna ni Jehova: “Dikanto makabangon iti katrem ta sigurado a mataykanto.”’” Kalpasanna, pimmanaw ni Elias.
5 Idi nagsubli dagiti mensahero, dagus a kinuna ti ari: “Apay a nagsublikayo?”
6 Insungbatda: “Adda lalaki a nangsabet kadakami, ket kinunana, ‘Agsublikayo iti ari a nangibaon kadakayo, ket ibagayo, “Daytoy ti kinuna ni Jehova: ‘Gapu kadi ta awan ti Dios iti Israel isu a mapankayo agdamag ken Baal-zebub a dios ti Ekron? Gapuna, dikanto makabangon iti katrem ta sigurado a mataykanto.’”’”+
7 Dinamag ti ari: “Ania ti langa ti lalaki a nangsabat ken nangibaga iti dayta kadakayo?”
8 Insungbatda: “Maysa a lalaki a nakakagay iti dutdot ti animal+ ken nakasinturon iti lalat.”+ Dagus a kinuna ti ari: “Isu dayta ni Elias a Tisbita.”
9 Kalpasanna, nangibaon ti ari iti maysa a panguluen ti 50 agraman ti 50 a soldadona. Idi napan ti panguluen iti ayan ni Elias, nakitana a nakatugaw iti tuktok ti bantay. Kinunana ken Elias: “Adipen ti pudno a Dios,+ imbaga ti ari, ‘Umayka.’”
10 Ngem kinuna ni Elias iti panguluen ti 50: “No maysaak nga adipen ti Dios, bumaba koma ti apuy manipud langit+ ket uramennaka ken ti 50 a soldadom.” Bimmaba ngarud ti apuy manipud langit ket inuramna ti panguluen ken ti 50 a soldadona.
11 Gapuna, nangibaon manen ti ari iti sabali pay a panguluen ti 50 agraman ti 50 a soldadona. Napan ken Elias ket kinunana: “Adipen ti pudno a Dios, daytoy ti imbaga ti ari, ‘Darasem ti umay.’”
12 Ngem kinuna ni Elias: “No maysaak nga adipen ti pudno a Dios, bumaba koma ti apuy manipud langit ket uramennaka ken ti 50 a soldadom.” Bimmaba ngarud ti apuy ti Dios manipud langit ket inuramna ti panguluen ken ti 50 a soldadona.
13 Nangibaon manen ti ari iti maikatlo a panguluen ti 50 agraman ti 50 a soldadona. Ngem simmang-at ti maikatlo a panguluen ti 50 ket nagparintumeng iti sanguanan ni Elias ken impakaasina: “Adipen ti pudno a Dios, pangngaasim ta napateg koma iti imatangmo ti biagko ken ti biag* dagitoy 50 nga adipenmo.
14 Bimmaban ti apuy manipud langit ket inuramna ti dua nga immun-una a panguluen ti 50 ken ti 50 a soldadoda, ngem ita napateg koma ti biagko* iti imatangmo.”
15 Iti kasta, kinuna ti anghel ni Jehova ken ni Elias: “Inka ket kumuyogka kenkuana. Dika agbuteng.” Gapuna, timmakder ket kimmuyog a bimmaba a napan iti ari.
16 Kinuna ni Elias iti ari, “Daytoy ti imbaga ni Jehova: ‘Nangibaonka kadagiti mensahero nga agdamag ken Baal-zebub a dios ti Ekron.+ Gapu kadi ta awan ti Dios iti Israel?+ Apay a saanmo nga inammo ti saona? Gapuna, dikanto makabangon iti katrem ta sigurado a mataykanto.’”
17 Iti kasta, natay ti ari maitunos iti sao ni Jehova babaen ken Elias. Gapu ta saan a naaddaan iti anak a lalaki, ni Jehoram*+ ti simmukat kenkuana kas ari, idi maikadua a tawen ti panagturay ni Jehoram+ nga anak ni Jehosafat nga ari ti Juda.
18 Ti dadduma pay a pasamak iti pakasaritaan ni Ahazias,+ ti amin nga inaramidna, ket naisurat iti libro dagiti pasamak idi tiempo dagiti ari ti Israel.
Footnotes
^ Kaipapananna, “Ni Jehova ti Diosko.”
^ Wenno “ti kararuak ken ti kararua.”
^ Wenno “kararuak.”
^ Kayatna a sawen, ti kabsat ni Ahazias.
