Ti Maikadua nga Ar-ari 10:1-36
10 Addaan ni Ahab+ iti 70 nga annak a lallaki idiay Samaria. Nangaramid ngarud ni Jehu kadagiti surat ket impatulodna dagita idiay Samaria, kadagiti prinsipe ti Jezreel, panglakayen,+ ken agay-aywan kadagiti annak ni Ahab.* Kuna ti surat:
2 “Adda kadakayo ti annak ni apoyo, kasta met dagiti karuahe a pakigubat, dagiti kabalio, maysa a napaderan a siudad, ken dagiti armas. Inton maawatyo daytoy a surat,
3 pilienyo ti kasayaatan ken maikari unay* kadagiti annak ni apoyo ket pagtugawenyo iti trono ni amana. Kalpasanna, idepensayo ti balay ni apoyo.”
4 Ngem nagbutengda unay ket kinunada: “No saan a kabaelan nga abaken ti dua nga ari,+ kabaelantayto kadi?”
5 Gapuna, ti mangay-aywan iti palasio,* ti gobernador ti siudad, dagiti panglakayen, ken dagiti agay-aywan impaibagada ken Jehu: “Ad-adipennakami, ket aramidenminto ti amin nga ibagam kadakami. Awan ti asinoman nga isaadmi nga ari. Aramidem ti aniaman a naimbag iti imatangmo.”
6 Nangaramid ni Jehu iti maikadua a surat, ket kinunana: “No addakayo iti dasigko ken situtulokkayo nga agtulnog kaniak, alaenyo ti ulo dagiti annak a lallaki ni apoyo ket umaykayo kaniak inton bigat iti kastoy met laeng a tiempo idiay Jezreel.”
Ti 70 nga annak a lallaki ti ari ket kadua idi dagiti mabigbigbig a lallaki iti siudad a mangay-aywan kadakuada.
7 Apaman a naawatda ti surat, innalada dagiti annak ti ari ket pinapatayda ida, 70 a lallaki,+ sa inkabilda dagiti uloda kadagiti basket ken impatulodda kenkuana idiay Jezreel.
8 Simrek ti mensahero ket imbagana ken Jehu: “Inyegda ti ulo dagiti annak ti ari.” Insungbatna: “Pagbalinenyo dagita a dua a bunton iti ruangan ti siudad ket pagtalinaedenyo sadiay agingga iti bigat.”
9 Idi rimmuar iti bigat, nagtakder iti sango dagiti umili ket kinunana: “Awan basolyo.* Pudno a nakikumplotak maibusor iti apok, ket pinatayko,+ ngem asino ti nangpapatay amin kadagitoy?
10 Laglagipenyo nga awan ti saan a matungpal* a sao ni Jehova nga imbaga ni Jehova maibusor iti sangakabbalayan ni Ahab,+ ket inaramid ni Jehova ti imbagana babaen ken Elias nga adipenna.”+
11 Pinapatay pay ni Jehu ti amin a nabati iti sangakabbalayan ni Ahab idiay Jezreel, kasta met ti amin a mabigbigbig a lallaki, gagayyem, ken papadina,+ agingga nga awanen ti natda.+
12 Kalpasanna, napan idiay Samaria. Adda idi iti igid ti kalsada ti maysa a balay a pagigalutan* dagiti pastor.
13 Nasabat sadiay ni Jehu dagiti kakabsat ni Ari Ahazias+ ti Juda, ket kinunana, “Siasinokayo?” Insungbatda: “Kakabsatnakami ni Ahazias, ket mapanmi bisitaen dagiti annak ti ari ken dagiti annak ti reyna.”
14 Dagus a kinunana: “Tiliwenyo ida a sibibiag!” Tiniliwda ida a sibibiag sa pinapatayda iti pagurnongan iti danum iti balay a pagigalutan, 42 a lallaki. Awan ti uray maysa nga inteddana.+
15 Idi pimmanaw sadiay, nasabatna ni Jehonadab+ nga anak ni Rekab,+ nga umay sumabet kenkuana. Kimmablaaw* ket kinunana ken Jehonadab: “Napudno* kadi ti pusom kaniak, kas iti kapudno ti pusok kenka?”
Insungbat ni Jehonadab: “Wen.”
“No kasta, iyawatmo ta imam.”
Inyawatna ti imana, ket ginuyod ni Jehu nga inlugan iti karuahe.
16 Kinuna ni Jehu: “Kumuyogka kaniak, ket kitaem ti saanko a panangipalubos nga adda karibal* ni Jehova.”+ Iti kasta, pinagtalinaedda a nakalugan ni Jehonadab iti karuahe ni Jehu.
17 Idi nakadanon idiay Samaria, pinapatayna ti amin a natda iti sangakabbalayan ni Ahab agingga a naibusda,+ maitunos iti sao ni Jehova nga imbagana ken Elias.+
18 Inummong met ni Jehu ti amin nga umili ket kinunana: “Saan a naan-anay ti panagdayaw ni Ahab ken ni Baal,+ ngem naan-anayto ti panagdayaw ni Jehu.
19 Isu nga ibagayo nga umay kaniak ti amin a propeta ni Baal,+ amin nga agdaydayaw kenkuana, ken amin a papadina.+ Siguraduenyo nga addada amin, ta mangaramidak iti dakkel a panagdaton ken Baal. Mapapatayto ti saan nga umay.” Ngem al-allilawen ida ni Jehu tapno mapapatayna dagiti agdaydayaw ken Baal.
20 Kinuna pay ni Jehu: “Mangipakaammokayo* iti dakkel a panagtataripnong para ken Baal.” Iti kasta, impakaammoda dayta.
21 Kalpasanna, impakaammo ni Jehu nga umay ti intero nga Israel, ket immay ti amin nga agdaydayaw ken Baal. Awan uray maysa ti saan a napan. Simrekda iti balay* ni Baal,+ ket napumpunno dayta.
22 Kinuna ni Jehu iti agay-aywan iti pagidulinan ti bado: “Mangiruarka kadagiti bado nga usaren ti amin nga agdaydayaw ken Baal.” Nangiruar ngarud kadagiti bado nga usarenda.
23 Kalpasanna, simrek da Jehu ken Jehonadab+ nga anak ni Rekab iti balay ni Baal. Kinunana kadagiti agdaydayaw ken Baal: “Kitaenyo a naimbag ken siguraduenyo nga awan ditoy dagiti agdaydayaw ken Jehova, no di laeng dagiti agdaydayaw ken Baal.”
24 Kamaudiananna, simrekda tapno mangipaayda kadagiti daton a mapuoran. Nangipuesto ni Jehu iti ruar iti 80 a soldadona ket kinunana: “No adda asinoman a makalibas, ti biagyo ti kasukatna.”
25 Idi naipaayen ni Jehu ti daton a mapuoran, kinunana kadagiti guardia* ken opisial: “Sumrekkayo ket papatayenyo ida! Awan ti palubosanyo a makalibas!”+ Iti kasta, pinapatay ida dagiti guardia ken opisial babaen ti espada sa impalladawda ida iti ruar, ket simrekda agingga iti makin-uneg a santuario* ti balay ni Baal.
26 Inruarda dagiti sagrado nga adigi+ ti balay ni Baal sa pinuoranda amin dagita.+
27 Rinebbada ti sagrado nga adigi+ ni Baal ken rinakrakda ti balay ni Baal+ sa pinagbalinda a pagtakkian, agingga ita nga aldaw.
28 Iti kasta, inikkat ni Jehu ti panagdayaw ken Baal iti Israel.
29 Ngem inar-aramid ni Jehu dagiti basol ni Jeroboam nga anak ni Nebat, a nakaigapuan ti panagbasol ti Israel, kayatna a sawen, ti panagdayaw kadagiti balitok nga urbon a baka idiay Bethel ken idiay Dan.+
30 Kinuna ngarud ni Jehova ken ni Jehu: “Gapu ta inaramidmo ti naimbag ken umiso iti imatangko babaen ti panangtungpalmo iti amin nga inkeddengko nga aramiden iti sangakabbalayan ni Ahab,+ uppat a henerasion dagiti annakmo ti agtugawto iti trono ti Israel.”+
31 Ngem saan a sinurot a naimbag ni Jehu ti Linteg ni Jehova a Dios ti Israel iti amin a pusona.+ Tinuladna dagiti basol ni Jeroboam a nakaigapuan ti panagbasol ti Israel.+
32 Kadagidi nga aldaw, rinugian ni Jehova nga in-inut a kissayan ti Israel. Namin-adu a rinaut ida ni Hazael iti intero a teritoria ti Israel,+
33 manipud Jordan nga agpadaya, ti intero a daga ti Gilead—a pagnanaedan dagiti Gadita, Rubenita, ken Manasesita+—ken manipud Aroer, nga adda iti Tanap ti Arnon,* agingga iti Gilead ken Basan.+
34 Ti dadduma pay a pasamak iti pakasaritaan ni Jehu, ti amin nga inaramid ken gapuananna, ket naisurat iti libro dagiti pasamak idi tiempo dagiti ari ti Israel.
35 Naginana ni Jehu a kas kadagidi ammana, ket intabonda idiay Samaria. Ni Jehoahaz+ nga anakna ti simmaruno nga ari.
36 Ti kapaut* ti panagturay ni Jehu kas ari ti Israel ket 28 a tawen idiay Samaria.
Footnotes
^ Lit., “agay-aywan ken Ahab.”
^ Wenno “kalilintegan.”
^ Lit., “balay.”
^ Wenno “Nalintegkayo.”
^ Lit., “matnag iti daga.”
^ Nalabit maysa a lugar a pakagalutan dagiti karnero sakbay a mapukisan.
^ Wenno “Nangbendision.”
^ Lit., “Nalinteg.”
^ Wenno “kitaem ti regtak para ken.”
^ Lit., “Mangisaganakayo.”
^ Wenno “templo.”
^ Lit., “tumataray.”
^ Lit., “ti siudad,” nalabit kasla torre a patakder.
^ Wenno “Karayan Arnon.”
^ Lit., “Dagiti aldaw.”
