Ti Maikadua nga Ar-ari 12:1-21
12 Iti maikapito a tawen ti panagturay ni Jehu,+ nagbalin nga ari ni Jehoas,+ ket nagturay iti 40 a tawen idiay Jerusalem. Ti nanangna ket ni Zibia a taga-Beer-sheba.+
2 Inar-aramid ni Jehoas ti umiso iti imatang ni Jehova iti amin nga aldaw a panangidalan kenkuana ni Jehoiada a padi.
3 Ngem saan a naikkat dagiti nangato a disso,+ ket nangipapaay latta sadiay dagiti umili kadagiti daton a mangpataud iti asuk.
4 Kinuna ni Jehoas kadagiti papadi: “Alaenyo amin a kuarta a naited kas nasantuan a daton+ iti balay ni Jehova, ti naikeddeng a gatad a masapul a bayadan ti maysa,+ ti kuarta nga inkari nga ited dagiti tattao, ken ti amin a kuarta a naimpusuan nga impaay ti tunggal maysa iti balay ni Jehova.+
5 Personal nga alaen dayta dagiti papadi kadagiti agdonar* ken usarenda a mangtarimaan iti balay, iti aniaman a nadadael* a pasetna.”+
6 Iti maika-23 a tawen ti panagturay ni Ari Jehoas, saan pay a natarimaan dagiti papadi dagiti nadadael a paset ti balay.+
7 Gapuna, inayaban ni Ari Jehoas ni Jehoiada+ a padi ken ti dadduma pay a papadi ket kinunana: “Apay a diyo tartarimaanen dagiti nadadael a paset ti balay? Pulos a saankayon a mangala iti kuarta kadagiti agdonar malaksid no usarenyo a pangtarimaan iti balay.”+
8 Immanamong dagiti papadi a pulos a saandan a mangala iti kuarta kadagiti umili ken saandan a responsabilidad a tarimaanen ti balay.
9 Iti kasta, nangala ni Jehoiada a padi iti maysa a kahon+ ket inabutanna ti kalubna sa inkabilna iti abay ti altar iti kannawan no sumrek ti tao iti balay ni Jehova. Dayta ti pangikabilan dagiti papadi a parabantay iti ruangan iti amin a kuarta a maited iti balay ni Jehova.+
10 Kada makitada nga adun ti kuarta iti kahon, umay ti sekretario ti ari ken ti nangato a padi ket kolektaen* ken bilangenda ti kuarta a naited iti balay ni Jehova.+
11 Iyawatda ti kuarta a binilangda kadagiti nadutokan a mangidaulo iti pannakatarimaan ti balay ni Jehova. Sa ibayadda met ti kuarta kadagiti karpintero ken agibangbangon iti balay ni Jehova,+
12 kasta met kadagiti kantero ken paratikap iti bato. Gimmatangda met kadagiti kayo ken bato a pangtarimaan kadagiti nadadael a paset ti balay ni Jehova ken inusarda ti kuarta iti amin a dadduma pay a paggastuan iti pannakatarimaan ti balay.
13 Ngem ti kuarta a naited iti balay ni Jehova ket saan a nausar a pagaramid kadagiti palanggana a pirak, pagiddep iti apuy, malukong, trumpeta,+ wenno iti aniaman nga alikamen a balitok wenno pirak para iti balay ni Jehova.+
14 Intedda laeng dayta kadagiti trabahador, ket inusarda a nangtarimaan iti balay ni Jehova.
15 Saandan a nakikuenta kadagiti lallaki a nakaitalkan ti kuarta a maited kadagiti trabahador, ta mapagtalkanda.+
16 Ngem ti kuarta a maited kas daton gapu iti biddut+ ken daton gapu iti basol ket saan a naipan iti balay ni Jehova, ta kukua dayta dagiti papadi.+
17 Iti daydi a tiempo, rimmaut ni Hazael+ nga ari ti Siria maibusor iti Gat+ ket naparmekna dayta. Kalpasanna, inkeddeng ni Hazael a rauten* ti Jerusalem.+
18 Inummong ni Ari Jehoas ti Juda ti amin a nasantuan a daton a pinagbalin a sagrado dagidi ammana a da Jehosafat, Jehoram, ken Ahazias nga ar-ari ti Juda, kasta met dagiti nasantuan a datonna ken ti amin a balitok kadagiti pagidulinan iti gameng iti balay ni Jehova ken iti balay* ti ari, ket impatulodna dagita ken Hazael nga ari ti Siria.+ Iti kasta, saannan nga intuloy a rauten ti Jerusalem.
19 Ti dadduma pay a pasamak iti pakasaritaan ni Jehoas, ti amin nga inaramidna, ket naisurat iti libro dagiti pasamak idi tiempo dagiti ari ti Juda.
20 Ngem nagkukumplot dagiti adipen ni Jehoas maibusor kenkuana+ ket pinatayda iti balay ti Bunton,*+ iti dalan nga agturong idiay Silla.
21 Dagiti adipenna a nangkabil ken nangpatay kenkuana ket ni Jozacar nga anak ni Simeat ken ni Jehozabad nga anak ni Somer.+ Intabonda iti nakaitaneman dagidi ammana iti Siudad ni David. Ni Amazias nga anakna ti simmaruno nga ari.+
Footnotes
^ Wenno “am-ammoda.”
^ Wenno “nabirri.”
^ Wenno “isupot.” Lit., “galutan.”
^ Lit., “inturong ni Hazael ti rupana maibusor.”
^ Wenno “palasio.”
^ Wenno “iti Bet-millo.”
