Ti Maikadua nga Ar-ari 16:1-20
16 Iti maika-17 a tawen ti panagturay ni Peka nga anak ni Remalias, nagbalin nga ari ni Ahaz+ nga anak ni Ari Jotam ti Juda.
2 Agtawen ni Ahaz iti 20 idi nagbalin nga ari, ket nagturay iti 16 a tawen idiay Jerusalem. Saanna nga inaramid ti umiso iti imatang ni Jehova a Diosna kas iti inaramid ni David nga apongna.+
3 Tinuladna ketdi dagiti ari ti Israel,+ ken impalasatna pay iti apuy ti bukodna nga anak,+ a tinuladna dagiti dakes nga aramid dagiti nasion+ a pinapanaw ni Jehova iti sanguanan dagiti Israelita.
4 Nangipapaay met iti daton a mangpataud iti asuk kadagiti nangato a disso,+ turod, ken sirok ti tunggal narukbos a kayo.+
5 Iti daydi a tiempo, immay ni Ari Rezin ti Siria ken ni Peka nga ari ti Israel nga anak ni Remalias tapno gubatenda ti Jerusalem.+ Pinalawlawanda ni Ahaz ngem saanda a naparmek ti siudad.
6 Insubli ni Rezin nga ari ti Siria ti Elat+ iti Edom iti daydi a tiempo, sa pinapanawna dagiti Judio* idiay Elat. Simrek dagiti Edomita idiay Elat, ket nagnaedda sadiay agingga ita nga aldaw.
7 Gapuna, nangibaon ni Ahaz kadagiti mensahero tapno ibagada ken Ari Tiglat-pileser+ ti Asiria: “Adipennak ken anaknak. Umayka ket isalakannak iti ima ti ari ti Siria ken ari ti Israel, a manggubgubat kaniak.”
8 Innala ni Ahaz dagiti pirak ken balitok iti balay ni Jehova ken iti pagidulinan iti gameng iti balay* ti ari ket impatulodna iti ari ti Asiria kas pasuksok.+
9 Pinatgan ti ari ti Asiria ti kiddawna, ket pinarmekna ti Damasco ken impanna idiay Kir dagiti umilina,+ sa pinatayna ni Rezin.+
10 Kalpasanna, napan ni Ari Ahaz idiay Damasco tapno agkitada ken Ari Tiglat-pileser ti Asiria. Idi nakita ni Ari Ahaz ti altar idiay Damasco, impatulodna ken Uria a padi ti plano ti altar, a pakakitaan iti diseniona ken no kasano a naaramid.+
11 Nangaramid ni Uria+ a padi iti maysa nga altar+ maitunos iti plano nga impatulod ni Ari Ahaz manipud Damasco. Naibangon dayta ni Uria a padi sakbay a nakasubli ni Ari Ahaz manipud Damasco.
12 Idi nakasubli ti ari manipud Damasco ket nakitana ti altar, immasideg sa nagidaton iti dayta.+
13 Nangipaay kadagiti daton a mapuoran ken daton a bukbukel a mangpataud iti asuk. Nangibukbok pay iti daton nga inumen ken nangiwarsi iti dara dagiti datonna a pakikappia iti rabaw ti altar.
14 Kalpasanna, inyakarna ti altar a gambang+ nga adda iti sanguanan ni Jehova manipud iti sango ti balay, iti nagbaetan ti bukodna nga altar ken ti balay ni Jehova, sa inkabilna dayta iti amianan a sikigan ti bukodna nga altar.
15 Imbilin ni Ari Ahaz ken ni Uria+ a padi: “Puoram ti daton a mapuoran iti bigat iti rabaw ti dakkel nga altar,+ kasta met ti daton a bukbukel iti rabii,+ ti daton a mapuoran a kukua ti ari, ken ti daton a bukbukelna, agraman dagiti daton a mapuoran, daton a bukbukel, ken daton nga inumen a kukua ti amin nga umili. Iwarsim met iti dayta ti amin a dara dagiti daton a mapuoran ken dadduma pay a daton. Ngem panunotek pay no ania ti aramidek iti altar a gambang.”
16 Inaramid ni Uria a padi ti amin nga imbilin ni Ari Ahaz.+
17 Pinutedputed pay ni Ari Ahaz ti diding dagiti kareton+ ken inikkatna dagiti palanggana nga adda kadagita,+ sa imbabana ti Baybay manipud kadagiti gambang a baka+ a nakaiparabawan dayta ket imparabawna iti suelo a bato.+
18 Inikkatna iti balay ni Jehova ti nalinongan a patakder para iti Sabbath a naibangon iti balay ken iti makinruar a pagserkan ti ari. Inaramidna dayta gapu iti ari ti Asiria.
19 Ti dadduma pay a pasamak iti pakasaritaan ni Ahaz, ti inaramidna, ket naisurat iti libro dagiti pasamak idi tiempo dagiti ari ti Juda.+
20 Naginana ni Ahaz a kas kadagidi ammana ket naitabon a kas kadakuada iti Siudad ni David. Ni Ezekias*+ nga anakna ti simmaruno nga ari.
Footnotes
^ Wenno “dagiti lallaki ti Juda.”
^ Wenno “palasio.”
^ Kaipapananna, “Mangpapigsa ni Jehova.”
