Ti Maikadua nga Ar-ari 17:1-41
17 Iti maika-12 a tawen ti panagturay ni Ari Ahaz ti Juda, nagbalin nga ari iti Israel ni Hosea+ nga anak ni Elah idiay Samaria, ket nagturay iti siam a tawen.
2 Inar-aramidna ti dakes iti imatang ni Jehova, ngem saan a kas kakaro dagiti immun-una nga ari ti Israel.
3 Ginubat ni Ari Salmaneser ti Asiria ni Hosea,+ ket nagbalin nga adipenna ken nangrugi nga agbayad iti buis.+
4 Ngem naammuan ti ari ti Asiria a nakikumplot ni Hosea, ta nangibaon kadagiti mensahero a mapan ken Ari So ti Egipto+ ken insardengnan ti tinawen a panagbayadna iti buis iti ari ti Asiria. Iti kasta, impupok ti ari ti Asiria ni Hosea ket nagtalinaed iti pagbaludan.
5 Kalpasanna, rinaut ti ari ti Asiria ti intero a daga, ket napan idiay Samaria ken pinalawlawanna dayta iti tallo a tawen.
6 Iti maikasiam a tawen ti panagturay ni Hosea, sinakup ti ari ti Asiria ti Samaria.+ Impanna kas balud dagiti umili ti Israel+ idiay Asiria ket pinagnaedna ida idiay Hala ken idiay Habor nga abay ti karayan a Gozan+ ken kadagiti siudad dagiti Medo.+
7 Napasamak daytoy ta nagbasol dagiti umili ti Israel ken Jehova a Diosda, a nangiruar kadakuada idiay Egipto manipud iti panangituray ni Faraon nga ari ti Egipto.+ Nagdaydayawda* kadagiti sabali a dios,+
8 tinuladda dagiti kaugalian dagiti nasion a pinapanaw ni Jehova iti sanguanan dagiti Israelita, ken sinurotda dagiti kaugalian nga inaramid dagiti ari ti Israel.
9 Inar-aramid dagiti Israelita ti saan nga umiso iti imatang ni Jehova a Diosda. Nagibangbangonda kadagiti nangato a disso iti amin a siudadda,+ manipud torre a pagwanawanan agingga iti napaderan a siudad.*
10 Nagibangbangonda met kadagiti sagrado nga adigi ken sagrado a poste*+ iti tunggal nangato a turod ken iti sirok ti tunggal narukbos a kayo;+
11 ken nangipapaayda iti daton a mangpataud iti asuk iti amin a nangato a disso kas iti inaramid dagiti nasion a pinapanaw ni Jehova iti sanguananda.+ Nagar-aramidda iti dakes a namagpungtot ken Jehova.
12 Intultuloyda ti nagdayaw kadagiti makarimon nga idolo*+ nupay imbaga kadakuada ni Jehova: “Dikay agdaydayaw kadagita!”+
13 Pinakpakdaaran ni Jehova ti Israel ken ti Juda babaen ti amin a propetana ken tunggal managsirmata,+ ket kinunana: “Tallikudanyo dagiti dakes nga aramidyo!+ Tungpalenyo dagiti bilin ken paglintegak maitunos iti amin a linteg nga imbilinko kadagidi ammayo ken imbagak kadakayo babaen kadagiti adipenko a propeta.”
14 Ngem saanda a dimngeg no di ket nagtalinaedda a nasukir kas kadagidi* ammada a saan a namati ken Jehova a Diosda.+
15 Intuloyda a linaksid dagiti regulasion ken tulagna+ kadagidi ammada ken dagiti pammalagipna kadakuada tapno pakdaaranna ida.+ Nagdaydayawda kadagiti awan serserbina nga idolo+ ket nagbalinda met nga awan serserbina,+ a tinuladda ti amin a nasion iti aglawlawda nga imbilin ni Jehova a saanda a tultuladen.+
16 Kanayon a sukirenda ti amin a bilin ni Jehova a Diosda. Nangaramidda iti dua a metal nga estatua* ti urbon a baka+ ken maysa a sagrado a poste,*+ ket nagrukruknoyda iti intero nga armada ti langit+ ken nagserbida ken Baal.+
17 Impalasatda met iti apuy dagiti annakda a lallaki ken babbai,+ nagbuybuyonda+ ken nagbirbirokda iti partaan, ket inggagarada* nga aramiden ti dakes iti imatang ni Jehova, tapno pagpungtotenda.
18 Iti kasta, nakapungtot unay ni Jehova iti Israel, ket inikkatna ida iti imatangna.+ Awan ti inteddana no di laeng ti tribu ni Juda.
19 Uray ti Juda saanna a tinungpal dagiti bilin ni Jehova a Diosda;+ tinuladda met dagiti kaugalian a sinurot ti Israel.+
20 Linaksid ni Jehova ti amin a kaputotan ni Israel ket imbabain ken inyawatna ida kadagiti managsamsam, agingga a napagtalawna ida iti sanguananna.
21 Insinana ti Israel iti sangakabbalayan ni David, ket pinagbalinda nga ari ni Jeroboam nga anak ni Nebat.+ Ngem inimpluensiaan ni Jeroboam ti Israel a tumallikud ken Jehova, ket insungsongna ida nga agaramid iti nadagsen a basol.
22 Tinultulad dagiti umili ti Israel ti amin a basol ni Jeroboam.+ Kasta ti inar-aramidda
23 agingga nga inikkat ni Jehova ti Israel iti imatangna, kas iti imbagana babaen ti amin nga adipenna a propeta.+ Naipan ngarud ti Israel kas balud idiay Asiria,+ agingga ita nga aldaw.
24 Nangala ti ari ti Asiria kadagiti tattao manipud Babilonia, Cuta, Ava, Hamat, ken Sefarvaim+ ket pinagnaedna ida kadagiti siudad ti Samaria kas sukat dagiti Israelita. Tinagikuada ti Samaria ket nagnaedda kadagiti siudadna.
25 Saanda a nagbuteng* ken Jehova idi damo a nagnaedda sadiay. Iti kasta, nangibaon ni Jehova kadagiti leon,+ a nangpapatay iti dadduma kadakuada.
26 Naipadamag iti ari ti Asiria: “Dagiti nasion nga innalam kas balud ken pinagnaedmo kadagiti siudad ti Samaria ket saanda nga ammo ti relihion* ken ti Dios iti dayta a lugar. Isu a mangibabaon ti Dios kadagiti leon a mangpapatay kadakuada, ta awan ti makaammo kadakuada iti relihion ken iti Dios iti dayta a lugar.”
27 Iti kasta, imbilin ti ari ti Asiria: “Pagsublienyo sadiay ti maysa kadagiti padi nga innalayo ket agnaed sadiay tapno isurona kadakuada ti relihion ken ti Dios iti dayta a lugar.”
28 Gapuna, nagsubli idiay Bethel+ ti maysa kadagiti padi a naala idiay Samaria ket insurona kadakuada no kasano ti rumbeng a panagbuteng* ken Jehova.+
29 Nupay kasta, nangaramid ti tunggal nasion iti bukodna a dios,* nga impanda kadagiti santuario nga adda kadagiti nangato a disso nga inaramid dagiti Samaritano. Kasta ti inaramid ti tunggal nasion kadagiti siudad a nagnaedanda.
30 Isu a nangaramid dagiti taga-Babilonia iti imahen ni Succot-benot, dagiti taga-Cut iti imahen ni Nergal, dagiti taga-Hamat+ iti imahen ni Asima,
31 ken dagiti Aveo iti imahen da Nibhaz ken Tartak. Puoran idi dagiti Sefarvita dagiti annakda iti apuy para kada Adramelek ken Anamelek, a didiosen ti Sefarvaim.+
32 Nupay nagbutengda ken Jehova, nangdutokda kadagiti agserbi a papadi kadagiti nangato a disso manipud kadagiti umili, ket nagserbida para kadakuada kadagiti santuario kadagiti nangato a disso.+
33 Iti kasta, nagbutengda ken Jehova, ngem nagdaydayawda kadagiti bukodda a dios sigun iti relihion* dagiti nasion a naggapuanda.+
34 Sursurotenda dagiti dati a relihionda* agingga ita nga aldaw. Awan kadakuada ti nagdayaw* ken Jehova, ket awan ti nangsurot kadagiti paglintegan, pangngeddeng, Linteg, ken iti bilin nga inted ni Jehova kadagiti annak ni Jacob, a ti naganna ket sinuktanna iti Israel.+
35 Imbilin ni Jehova idi nakitulag kadakuada:+ “Dikay agbuteng kadagiti sabali a dios, ket dikay agruknoy wenno agserbi wenno agdaton kadakuada.+
36 No di ket agbutengkayo ken Jehova,+ a nangiruar kadakayo idiay Egipto babaen ti dakkel a pannakabalin ken nabileg* a takiag,+ ken isu ti rumbeng a pagruknoyan ken pagdatonanyo.
37 Masapul a kanayon a surotenyo dagiti regulasion, pangngeddeng, ti Linteg, ken ti bilin nga insuratna para kadakayo,+ ket dikay agbuteng kadagiti sabali a dios.
38 Diyo liplipatan ti pannakitulagko kadakayo,+ ket dikay agbuteng kadagiti sabali a dios.
39 Ni laeng Jehova a Diosyo ti rumbeng a pagbutnganyo, ta isunto ti mangisalakan kadakayo manipud iti amin a kabusoryo.”
40 Ngem saanda a nagtulnog, ket sinurotda ti dati a relihionda.*+
41 Iti kasta, nagbuteng dagitoy a nasion ken Jehova,+ ngem nagserserbida met kadagiti kinitikitan nga imahenda. Agpada a tinulad dagiti annak ken appokoda ti inaramid dagidi ammada agingga ita nga aldaw.
Footnotes
^ Lit., “Nagbutengda.”
^ Kayatna a sawen, iti tunggal lugar, bassit man wenno adu ti taona.
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
^ Lit., “pinatangkenda ti teltelda kas iti teltel dagidi.”
^ Wenno “sinukog nga estatua.”
^ Lit., “inlakoda ti bagida.”
^ Wenno “nagdaydayaw.”
^ Wenno “dagiti narelihiosuan a kaugalian.”
^ Wenno “panagdayaw.”
^ Wenno “didios.”
^ Wenno “kadagiti narelihiosuan a kaugalian.”
^ Wenno “dagiti dati a narelihiosuan a kaugalianda.”
^ Lit., “nagbuteng.”
^ Lit., “nakaunnat.”
^ Wenno “dagiti dati a narelihiosuan a kaugalianda.”