Ti Maikadua nga Ar-ari 2:1-25
2 Idi asidegen nga ipangato ni Jehova ni Elias+ iti langit* babaen ti napigsa nga angin,+ pimmanaw da Elias ken Eliseo+ idiay Gilgal.+
2 Kinuna ni Elias ken ni Eliseo: “Pangngaasim ta agbatika ditoy ta imbaonnak ni Jehova idiay Bethel.” Ngem kinuna ni Eliseo: “Isapatak iti nagan ti sibibiag a Dios a ni Jehova, saankanto a panawan.” Gapuna, napanda idiay Bethel.+
3 Napan ken Eliseo ti annak dagiti propeta* idiay Bethel ket kinunada kenkuana: “Ammom kadi nga ipanaw ni Jehova ita nga aldaw ti apom ken pannakaulom?”+ Insungbat ni Eliseo: “Ammokon. Diyo pagsasaritaan dayta.”
4 Kinuna ni Elias: “Eliseo, pangngaasim ta agbatika ditoy ta imbaonnak ni Jehova idiay Jerico.”+ Ngem insungbat ni Eliseo: “Isapatak kenka ken iti nagan ti sibibiag a Dios a ni Jehova, saankanto a panawan.” Gapuna, napanda idiay Jerico.
5 Immasideg ken Eliseo ti annak dagiti propeta idiay Jerico ket kinunada: “Ammom kadi nga ipanaw ni Jehova ita nga aldaw ti apom ken pannakaulom?” Insungbat ni Eliseo: “Ammokon. Diyo pagsasaritaan dayta.”
6 Kinuna manen ni Elias: “Pangngaasim ta agbatika ditoy ta imbaonnak ni Jehova idiay Jordan.” Ngem insungbat ni Eliseo: “Isapatak kenka ken iti nagan ti sibibiag a Dios a ni Jehova, saankanto a panawan.” Gapuna, napanda a dua.
7 Simmurot ti 50 nga annak dagiti propeta ket nagtakderda iti adayo a mangbuybuya kadagiti dua a nakatakder iti igid ti Jordan.
8 Inikkat ni Elias ti opisial a kagayna+ sa linukotna ken imbautna iti danum. Nabisngay ti danum iti kannigid ken kannawan, isu a bimmallasiwda iti namaga a daga.+
9 Apaman a nakaballasiwda, kinuna ni Elias ken ni Eliseo: “Ibagam no ania ti kayatmo nga aramidek para kenka sakbay a mayadayoak kenka.” Gapuna, kinuna ni Eliseo: “Pangngaasim ta ikkannak iti doble a bingay*+ ti espiritum.”+
10 Kinuna ni Elias: “Nagrigat ti kiddawmo. No makitanak inton mayadayoak kenka, mapatganto ti kiddawmo; ngem no saan, saanto a mapatgan dayta.”
11 Bayat nga agsarsaritada a magmagna, dagus a pinagsina ida ti umap-apuy a karuahe ken dagiti umap-apuy a kabalio.+ Naipangato ni Elias iti langit* babaen ti napigsa nga angin.+
12 Bayat a kumitkita ni Eliseo, ipukpukkawna: “Apok, apok!* Ti karuahe ti Israel ken dagiti kumakabaliona!”+ Idi saannan a makita, pinisangna ti badona.+
13 Kalpasanna, pinidutna ti natnag nga opisial a kagay+ ni Elias sa nagsubli ken nagtakder iti igid ti Jordan.
14 Innalana ti natnag nga opisial a kagay ni Elias sa imbautna iti danum ken kinunana: “Sadino ti ayan ni Jehova a Dios ni Elias?” Idi naibautna dayta iti danum, nabisngay iti kannigid ken kannawan, isu a bimmallasiw ni Eliseo.+
15 Idi nakita ti annak dagiti propeta ni Eliseo manipud iti adayo, kinunada: “Immalis ken Eliseo ti espiritu ni Elias.”+ Gapuna, sinabatda ken nagruknoyda kenkuana.
16 Kinunada kenkuana: “Adda 50 a makabael a lallaki kadagiti adipenmo. Pangngaasim ta palubosam ida a mangbirok iti apom. Nalabit impangato ti espiritu* ni Jehova sa impanna iti maysa kadagiti bantay wenno tanap.”+ Ngem kinunana: “Dikay ibaon ida.”
17 Ngem intultuloyda a pinilit agingga a nabainan, isu a kinuna ni Eliseo: “Ibaonyo ida.” Imbaonda ti 50 a lallaki ket tallo nga aldaw a nagbirbirokda ngem saanda a nasarakan.
18 Adda idiay Jerico ni Eliseo idi nagsublida kenkuana.+ Kinunana kadakuada: “Saan kadi nga imbagak a dikay mapan?”
19 Idi agangay, imbaga dagiti lallaki iti siudad ken ni Eliseo: “Ammo ti apok a nasayaat ti lokasion ti siudad,+ ngem saan a nasayaat ti danum, ken ti daga ket lupes.”*
20 Insungbatna: “Ikkandak iti bassit a baro a malukong ken ikkanyo iti asin.” Intedda dayta kenkuana.
21 Napan ni Eliseo iti paggapgapuan ti danum ket pinuruakanna iti asin+ sa kinunana: “Daytoy ti kinuna ni Jehova, ‘Pinagbalinkon a nasayaat daytoy a danum. Saanen a makapapatay wenno pakaigapuan ti kinalupes.’”*
22 Nagbalin a nasayaat ti danum agingga ita nga aldaw, maitunos iti sinao ni Eliseo.
23 Manipud sadiay, nagturong ni Eliseo idiay Bethel. Iti dalanna, adda ubbing a lallaki a rimmuar iti siudad ket inuy-uyaw+ ken imbagbagada: “Pumanawka ditoy, kalbo! Pumanawka ditoy, kalbo!”
24 Timmaliaw ken inlunodna ida iti nagan ni Jehova. Kalpasanna, adda dua a kabaian nga oso+ a naggapu iti kabakiran a nangrangrangkay iti 42 nga ubbing.+
25 Intultuloyna ti nagturong idiay Bantay Carmelo,+ ket manipud sadiay, nagsubli idiay Samaria.
Footnotes
^ Wenno “tangatang.”
^ Ti “annak dagiti propeta” ket mabalin a tumukoy iti maysa a pagsanayan dagiti propeta wenno grupo dagiti propeta.
^ Wenno “dua a paset.”
^ Wenno “tangatang.”
^ Lit., “Amak, amak!”
^ Wenno “angin.”
^ Wenno mabalin a, “pakaigapuan ti pannakaalis.”
^ Wenno mabalin a, “pannakaalis.”
