Ti Maikadua nga Ar-ari 22:1-20
22 Agtawen ni Josias+ iti walo idi nagbalin nga ari, ket nagturay iti 31 a tawen idiay Jerusalem.+ Ti nanangna ket ni Jedida nga anak ni Adaia a taga-Bozkat.+
2 Inaramidna ti umiso iti imatang ni Jehova ken nagna kadagiti dalan ni David nga apongna,+ ket saan a nagturong iti kannawan wenno kannigid.
3 Iti maika-18 a tawen ti panagturay ni Ari Josias, imbaonna ni Safan a sekretario nga anak ni Azalias nga anak ni Mesulam a mapan iti balay ni Jehova,+ ket kinunana:
4 “Mapanka ken Hilkias+ a nangato a padi, ket ibagam a kolektaenna ti amin a kuarta a naipan iti balay ni Jehova,+ a kinolekta dagiti parabantay iti ruangan manipud kadagiti umili.+
5 Ibagam nga iyawatda dayta kadagidiay nadutokan a mangidaulo iti trabaho iti balay ni Jehova, sa ibayadda dayta kadagiti trabahador iti balay ni Jehova a mangtarimaan iti nadadael* a paset ti balay,+
6 kadagiti eksperto a trabahador, agibangbangon, ken kantero; ket usarenda a paggatang kadagiti tarikayo ken natikap a batbato a pangtarimaan iti balay.+
7 Ngem saan a masapul a makuenta ti kuarta a naitalek kadakuada, ta mapagtalkanda.”+
8 Idi agangay, kinuna ni Hilkias a nangato a padi ken ni Safan a sekretario:+ “Nasarakak ti libro ti Linteg+ iti balay ni Jehova.” Inted ni Hilkias ti libro ken Safan, ket rinugian ni Safan a basaen.+
9 Napan ni Safan a sekretario iti ari sa kinunana: “Innala dagiti adipenmo ti kuarta nga adda iti balay, ket inyawatda dayta kadagiti nadutokan a mangidaulo iti trabaho iti balay ni Jehova.”+
10 Imbaga pay ni Safan a sekretario iti ari: “Adda libro+ nga inted kaniak ni Hilkias a padi.” Iti kasta, rinugian ni Safan a basaen dayta iti sanguanan ti ari.
11 Apaman a nangngeg ti ari ti sasao a linaon ti libro ti Linteg, pinisangna ti badona.+
12 Kastoy ti imbilin ti ari kada Hilkias a padi, Ahikam+ nga anak ni Safan, Akbor nga anak ni Mikaias, Safan a sekretario, ken Asaias a katulongan ti ari:
13 “Inkay agsaludsod ken Jehova maipaay kaniak, kadagiti umili, ken iti intero a Juda maipapan iti sasao a linaon daytoy a libro a nasarakan; ta gimmil-ayab kadatayo ti pungtot ni Jehova+ gapu ta saan a nagtulnog dagidi ammatayo iti sasao daytoy a libro ken saanda a tinungpal ti amin a naisurat maipapan kadatayo.”
14 Iti kasta, napan da Hilkias a padi, Ahikam, Akbor, Safan, ken Asaias iti propeta a ni Hulda.+ Isu ti asawa ni Salum nga anak ni Tikva nga anak ni Harhas, ti paraaywan iti pagidulinan ti bado, ken agnanaed iti Maikadua a Purok ti Jerusalem; ket nakisaritada kenkuana sadiay.+
15 Imbagana kadakuada: “Daytoy ti kinuna ni Jehova a Dios ti Israel, ‘Ibagayo iti lalaki a nangibaon kadakayo:
16 “Daytoy ti kinuna ni Jehova, ‘Iyegko ti didigra iti daytoy a lugar ken kadagiti umilina, ti amin a sasao a linaon ti libro a binasa ti ari ti Juda.+
17 Gapu ta pinanawandak ken nangipapaayda kadagiti daton a mangpataud iti asuk kadagiti sabali a dios+ tapno pagpungtotendak babaen ti amin nga ar-aramidenda,+ gumil-ayabto ti pungtotko iti daytoy a lugar ket saanto a maiddep.’”+
18 Ngem kastoy ti ibagayo iti ari ti Juda a nangibaon kadakayo nga agsaludsod ken Jehova, “Daytoy ti kinuna ni Jehova a Dios ti Israel: ‘No maipapan iti sasao a nangngegmo,
19 gapu ta nangipangag* ti pusom ken nagpakumbabaka+ iti sanguanan ni Jehova ta dinengngegmo ti imbagak maibusor iti daytoy a lugar ken kadagiti umilina—tapno agbalinda a pagbutngan ken lunod—ket pinisangmo ti badom+ ken nagsangitka iti sanguanak, impangagka met, kuna ni Jehova.
20 Dayta ti makagapu nga itiponkanto kadagidi ammam,* ket maitabonkanto a sitatalna iti tanemmo, ken saanmonto a makita ti amin a didigra nga iyegko iti daytoy a lugar.’”’” Indanonda ngarud ti sungbat iti ari.
Footnotes
^ Wenno “kadagiti nabirri.”
^ Lit., “limmukneng.”
^ Naindaniwan a sasao para iti ipapatay.
