Ti Maikadua nga Ar-ari 24:1-20
24 Idi kaaldawan ni Jehoiakim, rimmaut iti Juda ni Ari Nabucodonosor+ ti Babilonia, ket nagbalin nga adipenna ni Jehoiakim iti tallo a tawen. Ngem nagrebelde kenkuana ni Jehoiakim.
2 Kalpasanna, nangibaon ni Jehova kadagiti rumaut ken Jehoiakim a grupo dagiti tulisan a Caldeo,+ Siriano, Moabita, ken Ammonita. Intultuloyna ti nangibaon kadagiti bumusor iti Juda tapno parmekenda, maitunos iti sao ni Jehova+ babaen kadagiti adipenna a propeta.
3 Napasamak daytoy iti Juda maitunos iti bilin ni Jehova, tapno maikkatna ida iti imatangna+ gapu iti amin a basol ni Manases,+
4 ken gapu iti panangibukbokna iti dara+ dagiti inosente a tattao, ta pinunnona ti Jerusalem iti darada ket saan a kayat ni Jehova ti mangpakawan.+
5 Ti dadduma pay a pasamak iti pakasaritaan ni Jehoiakim, ti amin nga inaramidna, ket naisurat iti libro dagiti pasamak idi tiempo dagiti ari ti Juda.+
6 Naginana ni Jehoiakim a kas kadagidi ammana,+ ket ni Jehoiakin nga anakna ti simmaruno nga ari.
7 Saanen a pulos a nangibaon ti ari ti Egipto iti armada a mapan makigubat ta innala ti ari ti Babilonia ti amin a kukua ti ari ti Egipto,+ manipud iti Karayan* ti Egipto+ agingga idiay Karayan Eufrates.+
8 Agtawen ni Jehoiakin+ iti 18 idi nagbalin nga ari, ket nagturay iti tallo a bulan idiay Jerusalem.+ Ti nanangna ket ni Nehusta nga anak ni Elnatan a taga-Jerusalem.
9 Inar-aramidna ti dakes iti imatang ni Jehova, kas iti amin nga inaramid ni amana.
10 Iti daydi a tiempo, rimmaut idiay Jerusalem dagiti adipen ni Ari Nabucodonosor ti Babilonia, ket pinalawlawanda ti siudad.+
11 Napan iti siudad ni Ari Nabucodonosor ti Babilonia, bayat a pinalawlawan dayta dagiti adipenna.
12 Idi agangay, simmuko ni Ari Jehoiakin ti Juda iti ari ti Babilonia,+ agraman ti inana, dagiti adipenna, dagiti prinsipena, ken dagiti opisial iti palasiona.+ Innala ida ti ari ti Babilonia kas balud bayat ti maikawalo a tawen ti panagturayna.+
13 Kalpasanna, innalana sadiay ti amin a gameng iti balay ni Jehova ken dagiti gameng iti balay* ti ari.+ Binurburakna ti amin nga alikamen a balitok nga inaramid ni Solomon nga ari ti Israel idiay templo ni Jehova.+ Napasamak daytoy kas impadto ni Jehova.
14 Impanawna kas balud ti amin nga umili ti Jerusalem, amin a prinsipe,+ amin a nabileg a mannakigubat, ken amin nga eksperto a trabahador ken latero*+—10,000 amin. Dagiti laeng kapanglawan nga umili ti nabati.+
15 Impanna ni Jehoiakin+ kas balud idiay Babilonia,+ agraman ti ina ti ari, dagiti assawa ti ari, dagiti opisial iti palasiona, ken dagiti panguluen a lallaki ti daga, impanawna ida idiay Jerusalem sa impanna ida idiay Babilonia.
16 Innala pay ti ari ti Babilonia kas balud ti 7,000 a mannakigubat, kasta met ti 1,000 nga eksperto a trabahador ken latero.* Nabilegda amin ken nasanayda iti gubat.
17 Pinagbalin ti ari ti Babilonia ni Matanias nga angkel ni Jehoiakin+ kas ari a sumukat kenkuana ken binaliwanna ti naganna iti Zedekias.+
18 Agtawen ni Zedekias iti 21 idi nagbalin nga ari, ket nagturay iti 11 a tawen idiay Jerusalem. Ti nanangna ket ni Hamutal+ nga anak ni Jeremias a taga-Libna.
19 Inar-aramidna ti dakes iti imatang ni Jehova, kas iti amin nga inaramid ni Jehoiakim.+
20 Napasamak dagita iti Jerusalem ken Juda gapu iti pungtot ni Jehova, agingga a pinapanawna ida iti imatangna.+ Kalpasanna, nagrebelde ni Zedekias iti ari ti Babilonia.+
Footnotes
^ Karayan a maaddaan laeng iti danum no panagtutudo.
^ Wenno “palasio.”
^ Wenno mabalin nga, “agibangbangon iti baluarte.”
^ Wenno mabalin nga, “agibangbangon iti baluarte.”
