Ti Maikadua nga Ar-ari 3:1-27
3 Ni Jehoram+ nga anak ni Ahab ket nagbalin nga ari iti Israel idiay Samaria idi maika-18 a tawen ti panagturay ni Ari Jehosafat ti Juda. Nagturay iti 12 a tawen.
2 Inar-aramidna ti dakes iti imatang ni Jehova, ngem saan a kas kakaro ti inaramid ni ama wenno inana, ta inikkatna ti sagrado nga adigi ni Baal nga inaramid ni amana.+
3 Isuna laeng ta tinuladna dagiti basol ni Jeroboam nga anak ni Nebat a nakaigapuan ti panagbasol ti Israel.+ Saan a nagsardeng a nangaramid kadagita.
4 Ni Mesa nga ari ti Moab ket agtartaraken idi iti karnero. Ik-ikkanna ti ari ti Israel iti 100,000 nga urbon a karnero ken 100,000 a di napukisan a kalakian a karnero kas buis.
5 Apaman a natay ni Ahab,+ nagrebelde ti ari ti Moab iti ari ti Israel.+
6 Iti kasta, rimmuar ni Ari Jehoram iti dayta a tiempo manipud Samaria ket inummongna ti intero nga Israel.
7 Impaibagana met ken Ari Jehosafat ti Juda: “Nagrebelde kaniak ti ari ti Moab. Kumuyogka kadi kaniak a makigubat iti Moab?” Insungbat ni Jehosafat: “Wen.+ Kumuyogak kenka agraman dagiti tattaok ken dagiti kabaliok.”+
8 Dinamag ni Jehosafat: “Sadino ti pagnaantayo?” Insungbat ni Jehoram: “Iti let-ang ti Edom.”
9 Napan ngarud ti ari ti Israel a kaduana ti ari ti Juda ken ti ari ti Edom.+ Kalpasan ti pito nga aldaw, awanen ti danum nga usaren ti kampo ken dagiti tarakenda nga intugotda.
10 Kinuna ti ari ti Israel: “Nagrigat ketdin! Inayaban ni Jehova dagitoy tallo nga ari tapno laeng iyawatna ida iti Moab!”
11 Iti kasta, kinuna ni Jehosafat: “Awan kadi ti propeta ni Jehova ditoy tapno maammuantayo ti ibaga ni Jehova?”+ Insungbat ti maysa kadagiti adipen ti ari ti Israel: “Adda ditoy ni Eliseo+ nga anak ni Safat, nga agserserbi idi ken Elias.”*+
12 Kinuna ni Jehosafat: “Agsasao kenkuana ni Jehova.” Iti kasta, napan ken Eliseo ti ari ti Israel, ni Jehosafat, ken ti ari ti Edom.
13 Kinuna ni Eliseo iti ari ti Israel: “Apay nga immayka kaniak?*+ Mapanka kadagiti propeta ni amam ken dagiti propeta ni inam.”+ Ngem kinuna ti ari ti Israel: “Saan, ta inayabannakami ni Jehova, dakami a tallo nga ari, tapno iyawatnakami iti Moab.”
14 Insungbat ni Eliseo: “Isapatak iti nagan ni Jehova a panguluen dagiti armada, ti sibibiag a Dios a pagserserbiak,* saanka koma nga immay kinita+ no saan a gapu ken Ari Jehosafat+ ti Juda.
15 Mangyegka iti tumutokar iti arpa.”*+ Apaman a nagtokar, nagtignay ken Eliseo ti pannakabalin ni Jehova.+
16 Kinunana, “Daytoy ti imbaga ni Jehova: ‘Mangkalikayo kadagiti kanal iti daytoy a tanap,*
17 ta kastoy ti kinuna ni Jehova: “Awanto ti umay nga angin wenno tudo; ngem mapnonto iti danum daytoy a tanap,*+ ket uminumkayto, dakayo, dagiti tarakenyo, ken ti dadduma pay nga animalyo.”’
18 Bassit laeng a banag daytoy iti imatang ni Jehova,+ ta iyawatnanto met kadakayo ti Moab.+
19 Dadaelenyo ti tunggal napaderan a siudad+ ken tunggal napateg a siudad, pukanenyo ti tunggal nasayaat a kayo, sullatanyo amin nga ubbog ti danum, ken puruakanyo iti batbato ti tunggal nasayaat a talon.”+
20 Kabigatanna, iti tiempo a pannakaidatag ti daton a bukbukel iti bigat,+ bigla a rimmuar ti danum manipud Edom, ket napunno ti daga iti danum.
21 Idi nadamag ti amin a Moabita nga umay makilaban kadakuada ti tallo nga ari, inayabanda ti amin a lallaki a makabael a makigubat,* ket nagpuestoda iti pagpatinggaan ti teritoriada.
22 Idi nasapa a bimmangon iti bigat dagiti Moabita nga adda iti bangir ti karayan, nakitada a nalabaga ti danum a kasla dara gapu iti raniag ti sumingsingising nga init.
23 Kinunada: “Dara daytoy! Nagpipinnatay la ketdi dagiti ari babaen ti espada. Dakayo a Moabita, intay agsamsam+ iti kampoda!”
24 Idi nakadanonda iti kampo ti Israel, dimmarup dagiti Israelita ket pinapatayda dagiti Moabita. Nagtataray dagiti Moabita+ a nagturong idiay Moab, ngem pinatay dagiti Israelita dagiti nakamatanda.
25 Rinebbada dagiti siudad, ket nangipuruakda amin iti bato iti tunggal nasayaat a talon; sinullatanda ti tunggal ubbog ti danum,+ ken pinukanda ti tunggal nasayaat a kayo.+ Kamaudiananna, dagiti laengen bato a pader ti Kir-hareset+ ti nagtalinaed a sitatakder. Pinalawlawan dayta dagiti pumapallatibong sa dimmarupda.
26 Idi nakita ti ari ti Moab a naabakdan iti gubat, nangikuyog iti 700 a lallaki a nakaespada tapno mapanda iti ari ti Edom;+ ngem saanda a nagballigi.
27 Innalana ti inauna nga anakna a sumukatto kenkuana kas ari ket indatonna iti rabaw ti pader kas daton a mapuoran.+ Kasta unay ti unget dagiti Moabita kadagiti Israelita, isu a nagsanud ti Israel ket nagsublida iti dagada.
Footnotes
^ Lit., “a paraibukbok iti danum kadagiti ima ni Elias.”
^ Wenno “Ania ti bibiangko kenka?”
^ Lit., “nga agtaktakderak iti sanguananna.”
^ Wenno “musikero.”
^ Karayan a maaddaan laeng iti danum no panagtutudo.
^ Karayan a maaddaan laeng iti danum no panagtutudo.
^ Lit., “amin a nakabarikes.”
